@khaledbaghdadyy: في نقاشات كتير مش هدفها الوصول للحقيقة، هدفها إنها تسحبك لدائرة من الاستفزاز والجدال وتستهلك وقتك وتركيزك وطاقة أنت أولى بيهم. مش كل حد مختلف معاك محتاج ترد عليه. ومش كل انتقاد محتاج دفاع. ومش كل شخص لازم يقتنع بيك. في ناس متخصصة إنها تستنزف طاقتك. كل ما ترد، يجيبوا نقطة جديدة. كل ما تشرح، يطلبوا شرح أكتر. مش علشان يفهموا… علشان يفضلوا ساحبينك في النقاش. ومع الوقت تلاقي نفسك صرفت مجهود ذهني وعصبي كبير، وفي الآخر لا أنت غيرت رأيه، ولا هو غير رأيه، ولا حياتك اتحسنت بأي شكل. الطاقة دي لو اتحطت في شغلك، أو تمرينك، أو صحتك، أو تطوير نفسك، كان عائدها أكبر بكتير. مش لازم تكسب كل نقاش. ومش لازم يكون عندك رد على كل شخص. أحيانًا أكبر انتصار إنك تعرف إمتى ما تدخلش النقاش من الأساس