@pmj_o2008: مراد... كلام نحر خلاني مثل التاهيه ماعرف طريقي فوك ضيم فضه وتجاهله الي! رجعت نحر ماتسمع كلامي ورحت اخذتلي بطل وكعدت بالشارع الحمدلله اضلم وليل ومحد يجي الهذه المكان بس المخبلين الي ببيت الرواز وكعدت اشرب وفكر بكل هاي الأحداث وجان يمي 3 ابطاله شراب وتذكرت يمامه شكد اشتاقيت السوالفه بالبيت حسيته بس هي الي كلبه فطير بهذه البيت الي كل سم وأبابيل عرف وطلگه يخاف يصير يلدغونه بالسم مالتهم وحسيته الي سواه شي صواب بس بنفس الوقت خطأ لان باين علي متعود عليه وبس صافن وصرنه مانشوفه الى قليل بالبيت وبين ما أني صافن بالكاع شفت جسم حجب الضوه رفعت راسي وشفت أبابيل انصدمت وبسرعه ضميت البطل ورا ضهري بس هوه ماعصب كعدت بصفي مثل المهموم وستغربت ليش مصار يصيح عليه مثل كل مرهه شفته كعد وسكت نفس الهدوء الي يسبق العاصفة التفت عليه وبيده بطل عرك ثاني سحبه من جواه قميصي ومدلياه وبعيون حمر تذبحني خزرني خزر واني بيدي ضام البطل القديم ووخرته بسرعه من كبال عينه لزم البطل بيده وعصره واني كلبي صار يدك طبول من المنظر أخذت البطل منه وبديت أشرب وعيوني عليه ماكدرت أسكت كلت :- شبيك مهموم تره الدنيا ماتسوه والله وعلي ما تسوه نعيشها بقهر هي هيج وهيج وتخلص صفن بالفراغ وهز راسه بنفي وطلع صوته مبحوح ومكسور وكال :- وخر نحر عن طريقي مراد ماريد اخليها تتلطخ بيه ولا اريدها تنجر لدوامتي وتتأذى مثلي والله اذا شفتها بغير مكان احسن الها ضحكت باستهزاء وعيوني بدت تغيم من السكر وكلت :- على اساس اني موافق هسه ولعباس فلا موافق والي يمسها بكلمه اخرب كلشي عليكم وعلى راسهم كلكهم ولا عبالك لان اختي لا بس هي الوحيدة الي بقت نظيفة وسط هالزبل الي احنا بيه التفت عليه ووجهه شاحب والتوتر ياكل بيه اكل وعيونه تلمع بنظرة غريبة سألني بصوت ناصي :- اكلك مراد هاي الي بيدك وتجرعه مثل الماي هم ينسي الواحد ماضيه؟ هم يخليك تطلع من جسمك وتشوف الدنيا مكان ثاني؟ من كال هيج فرحت وحسيت اكو واحد شاركني نفس المصير كعدت عدل وبدلت قعدتي وكلت :- اييي ولك فدشي يخليك تفقد وتصير بعالم ثاني عالم ما بي عمتي ولا فضه ولا طائفية هالبيت ولا ذكريات سود سودة بس كولي انت شبيك ليش دتسال هيج؟ وجهه تغير وتوتر صار واضح بكل حركة بجسمه ومن ارتباكه عرفت الي بباله واني صرت مثل المصدوم عيوني وسعت وكتله :- سيدنه شبيك؟ تريد تشرب؟ لا لا مستحيل ما اصدك ابداً.. معقولة يمامه سوت بيك هيج وخلتك ماتنساها مثل حظي؟ انا هم نايم بصبخة مثلك وماكو مخرج بس سمع اسم يمامه نار وطلعت من عيونه وعصب بشكل ما طبيعي ودفره قوية بخصرتي وخلاني اتلوى من الوجع وصرخت :- اخخخخ يابه خاصرتيي كمت اضحك من كل كلبي رغم الوجع وكتله :- اييي هي هاي الحقيقة ابابيل انو احنا بشر نضعف وكلنا مكسورين بنفس الطريقة ابابيل التفت عليه وعيونه تشتعل نار وكال :- مراد اذا تعيد اسمها مرة ثانية بهالطرقة وقسماً بآيات الله اكسر راسك هنا بهاي الشارع واخلي دمك يختلط بهالتراب الي جاي تشرب عليه فاهم؟ سكتت وحسيت كل جسمي نحل ومديت روحي بالكاع وضحكت ضحكه طلعت من أعماقي بوجع وجسمي يرجف من البرد وهدوء الليل الي خنكنه رفعت البطل بوجهه وكتله :- هاك اشرب وخل نشوف وين توصل وياك يا سيد يابن الاصول يالماشفت مثلك بهالبيت الملعون أسحب البطل من ايدي بقوة وبعيون ماعرفت اقرأ شنو بيها سحب نفس عميق وغمض عيونه وبعدها نزل البطل وكرع منه كرعة وحدة وبنص صدمتي وشفتي الي بقت مفتوحة من الذهول حسيت الدنيا وكفت الساعة صارت وكتها وكأن الزمان توقف واني كاعد أراقب أعظم متدين واكثر واحد يحسبوله ألف حساب بهالبيت وهو يجرع العرك جره وكأن جاي يطفي نار بداخل صدره كمت اضحك هستيري وبصوت عالي خفت لا أحد يسمعنا من ورا الحياطين بس ما كدرت اكض نفسي كتله :- لا داحت العشيرة والبيت والديوان وكل هيبة المشيخة بعد اليوم! ابابيل يا سيد يا شيخ يلمقدس كدام الكل صرت وياي بنفس القارورة وبنفس القاع والله لو يشوفك جدي هسه لو يشوفك ذوله الي يركعون الك جان شسووا؟ ولك صدمتني والله ما توقعته منك توصل بيك المواصيل هيج؟ أمسح حلكه بايده بعنف وذب البطل بالكاع وانكسر نصين وطلع صوته خشن يرجف من القهر :- العشيرة والمشيخة والعمامة كلها صارت جفني وانا كاعد اندفن بيهن يوم ورا يوم يمامة مو بس خذلتني يمامة كسرت شي بداخلي جان يربطني بالحياة والناس واليوم بطل العرك هذا مو دافع للشرب ولا علمود النسيان هذا دافع حتى أشوف اذا اكو شي يگتل الروح غير الموت ببطء صرت أباوعله بذهول ولهفة وبنفس الوقت بحزن على حالنا الثنين كعدت مقابيله وبديت أسمعه وهو يفضفض لأول مرة وكأنه جان سجن ومفتوح بابه فجأة :-اي كمل ولك فرغ كلبي قبل لا يطك من الهموم احجي شنو الي ببالك ليش يمامة جانت الك كلشي وليش انكسرت لهالدرجة؟ ترا احنا أهل وبنفس الدم!… ____ #fypシ゚viral #tiktok #الشعب_الصيني_ماله_حل #مالي_خلق_احط_هاشتاقات #foryoupage
