@seyha1248596: ព្រះមហាមោគ្គល្លានយកម្រាមជើងសង្កត់កំពូលប្រាសាទ ក្នុងពាក្យនោះ មានអនុបុព្វីកថាដូចតទៅ បទថា ពុទ្ធេន ចោទិតោ សេចក្តីថា ដែលព្រះសម្ពុទ្ធទ្រង់ដាស់តឿនហើយ គឺទ្រង់បញ្ជូនទៅហើយ ។ បទថា ភិក្ខុសង្ឃស្ស បេក្ខតោ សេចក្តីថា កាលមហាភិក្ខុសង្ឃកំពុងឃើញ។ បទថា មិគារមាតុបាសាទំ បាទង្គុដ្ឋេន កម្បិយ សេចក្តីថា ខ្ញុំធ្វើ មហាប្រាសាទដែល ប្រកបដោយសសរ ១០០០ ដែលនាងវិសាខាមហា ឧបាសិកាឱ្យសាងក្នុងបុព្វារាម ឱ្យញាប់ញ័រដោយម្រាមមេជើងរបស់ខ្លួន ។ គ្រាមួយ កាលព្រះមានព្រះភាគ គង់នៅក្នុងប្រាសាទ តាមដែលពោលហើយ ក្នុងបុព្វារាម ពួកភិក្ខុជាច្រើនអង្គុយក្នុងប្រាសាទជាន់លើ មិនគិតដល់សូម្បីតែព្រះសាស្តា ផ្តើមពោលតិរច្ឆានកថា ព្រះមានព្រះភាគទ្រង់ស្តាប់ដូច្នោះ ទ្រង់បំណងឱ្យភិក្ខុទាំងនោះសង្វេគ ហើយត្រឡប់ជាភាជនៈ ទទួលព្រះធម្មទេសនារបស់ព្រះអង្គ ទើបត្រាស់ហៅព្រះមហាមោគ្គល្លានត្ថេរមកថា ម្នាលមោគ្គល្លាន ចូរអ្នកមើលពួកភិក្ខុដែលបួសថ្មី ដែលវង្វេងក្នុងការពោល តិរច្ឆានកថា ។ ព្រះថេរៈបានស្តាប់ព្រះតម្រាស់នោះ ជ្រាបព្រះអធ្យាស្រ័យ របស់ព្រះសាស្តា ទើបចូលចតុត្ថជ្ឈាន មានអាបោកសិណជាអារម្មណ៍ មានអភិញ្ញាជាបាទ ហើយចេញចាកចតុត្ថជ្ឈាន អធិដ្ឋានថា ឱកាសដែលប្រាសាទតាំងនៅ ចូរជាទឹក ហើយយកម្រាមជើងឆ្កឹះកំពូលប្រាសាទ ។ ប្រាសាទបានផ្អៀងទៅម្ខាង ព្រះថេរៈសង្កត់ម្តងទៀត ប្រាសាទក៏ផ្អៀងទៅម្ខាងទៀត ភិក្ខុទាំងនោះ ភិតភ័យ ភ្ញាក់ផ្អើល ព្រោះប្រាសាទរលំ ទើបចេញ អំពីប្រាសាទនោះ ហើយឈរក្នុងទីជិតព្រះមានព្រះភាគ ។ ព្រះសាស្តា ទ្រង់ប្រមើលមើលអធ្យាស្រ័យរបស់ភិក្ខុទាំងនោះហើយ ទ្រង់សម្តែងធម៌ ។ ព្រោះ បានស្តាប់ព្រះធម៌នោះ បណ្តាភិក្ខុទាំងនោះ ពួកខ្លះ តាំងនៅក្នុងសោតាបត្តិផល ពួកខ្លះតាំងនៅក្នុងសកទាគាមិផល ពួកខ្លះតាំងនៅក្នុងអនាគាមិផល ពួកខ្លះតាំងនៅក្នុងអរហត្តផល ។ សេចក្តីនេះ គប្បីសម្តែងដោយសូត្រដែល ពោលអំពីប្រាសាទកម្រើក ៕៚ #រូបភាព #ធម្មទេសនា #ធម្មទាន #ព្រះពុទ្ធសាសនា #ព្រះពុទ្ធ អ្នកតាមដាន ព្រះសង្ឃសាវក ព្រះមានព្រះភាគ