ရပ်ကွက်အတွင်းမှာ အတွဲလိုက် ဆောင်းဘောက်ကြီးတွေနဲ့ ဆူညံအောင်လုပ်သူတွေ ရှိနေပါသလား? အသံတွေက နားမခံနိုင်လောက်အောင် ဖြစ်နေလို့ တိုင်ကြားလိုက်ရင် ထောင်ချမယ့် ဥပဒေ ထွက်လာပါတော့မယ်။ မွန်ပြည်နယ်မှာ အတွဲလိုက် ဆောင်းဘောက်တွေ အဆမတန် ဖွင့်လှစ်ပြီး ဆူညံသံတွေ ပေးနေတာကို ထိရောက်စွာ တားဆီးပိတ်ပင်ဖို့ အဆိုတင်သွင်းမှုကို လွှတ်တော်မှာ ကန့်ကွက်သူမရှိ အတည်ပြုလိုက်ပါတယ်။ ဒီအဆိုကို ဘီလင်းမြို့နယ် မဲဆန္ဒနယ်အမှတ် (၂) က ပြည်နယ်လွှတ်တော်ကိုယ်စားလှယ် ဦးတင်ရီက ပြီးခဲ့တဲ့ ဇွန် ၉ ရက်နေ့ လွှတ်တော်အစည်းအဝေးမှာ စတင်တင်သွင်းခဲ့တာပါ။ ဇွန် ၁၂ ရက်နေ့ အစည်းအဝေးမှာ လွှတ်တော်ကိုယ်စားလှယ် လေးဦးနဲ့ လွှတ်တော်ဥက္ကဋ္ဌ ဦးသက်ထွေးတို့ကပါ ဝိုင်းဝန်းထောက်ခံ ဆွေးနွေးခဲ့ကြပြီးနောက်မှာတော့ လွှတ်တော်အမတ်အားလုံးက ကန့်ကွက်သူ တစ်ဦးမှမရှိဘဲ တညီတညွတ်တည်း အတည်ပြု ဆုံးဖြတ်ခဲ့ကြပါတယ်။ ဥပဒေအရ အသံချဲ့စက်ဖွင့်ချင်ရင် သက်ဆိုင်ရာ ရပ်ကွက် ဒါမှမဟုတ် ကျေးရွာအုပ်ချုပ်ရေးမှူးတွေဆီမှာ ခွင့်ပြုချက် အရင်တောင်းရမှာ ဖြစ်ပါတယ်။ ခွင့်ပြုချက်မရှိဘဲ ဇွတ်ဖွင့်လို့ ပြည်သူတွေကို စိတ်အနှောင့်အယှက်ဖြစ်စေရင်၊ ကျန်းမာရေးဆိုင်ရာ ပြဿနာတွေ ဖြစ်ပေါ်လာစေရင်တော့ ရပ်ကွက်ကျေးရွာ ဥပဒေအရ ထောင်ဒဏ် ခြောက်လ အပြင် ငွေဒဏ်ပါ ပူးတွဲပြီး အပြစ်ပေးခံရမှာ ဖြစ်ပါတယ်။ ဒီလို ဆောင်းဘောက်သံတွေကြောင့် လူတွေမှာ နားရောဂါ၊ သွေးတိုးရောဂါ၊ နှလုံးရောဂါအပြင် အစာအိမ်နဲ့ အူလမ်းကြောင်းဆိုင်ရာ ရောဂါတွေပါ ဖြစ်ပွားမှု များလာနေတာမို့ အခုလို ထောင်ဒဏ်အထိ ပြင်းပြင်းထန်ထန် အရေးယူဖို့ ဆုံးဖြတ်လိုက်တာ ဖြစ်ပါတယ်။ အများသူငှာ စိတ်အေးချမ်းသာစွာ နေထိုင်နိုင်ဖို့အတွက် မွန်ပြည်နယ်မှာ စတင်လိုက်တဲ့ ဆောင်းဘောက်ဥပဒေဟာ တစ်နိုင်ငံလုံးအနှံ့အပြားအထိ ပျံ့နှံ့ရောက်ရှိလာဖို့ မျှော်လင့်ရတာဖြစ်ပါတယ်။ အသံချဲ့စက်၊ဆောင်းဘောက် အသံတွေ ပတ်သက်ပြီ ထောင်ခြောက်လနှင့်ငွေဒဏ် ကျခံမူအပေါ် မိတ်ဆွေများရဲ့ ထင်မြင်ယူဆချက်များကို မန့်မှာ ရေးပေးခဲ့ပါဦး🙏🏻🙏🏻🙏🏻 - @khin.maung320