وزیراعلیٰ خیبرپختونخوا محمد سہیل آفریدی نے رنگ روڈ، پی ڈی اے ٹول پلازہ حیات آباد پر انڈر پاس منصوبے کا سنگِ بنیاد رکھ دیا۔ 1.6 ارب روپے کی لاگت سے تعمیر ہونے والا دو لینز پر مشتمل یہ انڈر پاس پشاور کی ٹریفک روانی میں نمایاں بہتری لائے گا اور شہریوں کو جدید سہولیات فراہم کرے گا۔ وزیراعلی نے تقریب سے خطاب کرتے ہوئے کہا کہ پشاور کی بحالی حکومت کی اولین ترجیح ہے۔ مشکل حالات میں پشاور نے ہمیشہ فراخ دلی کا مظاہرہ کرتے ہوئے ملاکنڈ اور قبائلی اضلاع کے متاثرین کی میزبانی کی ہے۔ 200 ارب روپے کے پشاور ری وائیٹلائزیشن پلان کو تمام اسٹیک ہولڈرز کی مشاورت سے حتمی شکل دی گئی ہے، اور حکومت کی کوشش ہے کہ اس میں شامل تمام منصوبے بروقت شروع ہو کر مقررہ مدت میں مکمل ہوں۔ یہ پلان شہری اور دیہی مسائل کے حل کا ایک جامع خاکہ ہے، جبکہ اب تک 21 ارب روپے کے منصوبوں پر کام شروع کیا جا چکا ہے۔ بریفنگ میں بتایا گیا کہ دلہ زاک روڈ انڈر پاس پر کام جاری ہے، جبکہ پشتہ خرہ، جمیل چوک انڈر پاسز اور ہزار خوانی اوور پاس کا جلد افتتاح متوقع ہے۔ مزید برآں، 35 سڑکوں کی خوبصورتی کے منصوبے بھی اس پلان کا حصہ ہیں جن کی تخمینہ لاگت 19 ارب روپے ہے، جبکہ پہلے مرحلے میں 15 سڑکوں پر کام کا آغاز کیا جائے گا۔ وزیراعلیٰ نے اس عزم کا اظہار کیا کہ نیا مالی سال صوبے کے عوام کے لیے امن، ترقی اور خوشحالی کا سال ثابت ہوگا۔ #CMKP #SohailAfridi #PDATollPlaza #UnderPass #PeshawarRevitilizationPlan - @immuhammadsohailafridi