@diora_usmonova: Hayotda oilani qurish aslida qanchalik oson bo‘lishi mumkinligi haqida — agar hamma narsaga shunchaki oddiy qarasangiz. Biz shunaqa katta bo‘lganmiz: dadam, ayam, men va Kamron. Qo‘qonning oddiy bir oilasi. Men bilan Kamron mahallada yalangoyoq chopib yurardik. Qo‘qondan Toshkentga mashinada tez-tez qatnab turardik. Yo‘l bo‘yi mashinada eski rus qo‘shiqlari yangrayverardi, shuning uchun hanuz Bulanova qo‘shiqlarining ko‘pini yoddan bilaman 😄 Yo‘lda albatta tog‘larda to‘xtardik — qatiq ichardik, qurt yerdik, yo‘l havosidan to‘yib qaytardik. Ayam esa har doim did bilan kiyinadigan, juda chiroyli ayol edi. Sochlari doim joyida, o‘zi esa hatto eng oddiy sharoitda ham — qora klassik ko‘ylagida ham juda nafis ko‘rinardi. Kabob tutuni orasida ham o‘z chiroyini yo‘qotmasdi. Kamron esa qo‘lidan qora chamadonchasi tushmaydigan, yillar davomida pul yig‘adigan, hatto qo‘shnilar bilan hovlida bo‘sh yog‘ idishlarini sotishdan ham uyalmaydigan bola edi. Dadam esa juda mehnatkash, juda sabrli inson edi. Bizning shovqinimiz, sho‘xligimizga ham indamay chidardilar. Men esa juda parishonxotir qiz edim. Ryukzagim doim Yesenin kitoblariga to‘la bo‘lardi, etagim esa ko‘pincha orqa tomondan portfelimga qistirilib yurardi. Doim nimanidir unutib yurardim. Hozir o‘ylasam, bizni hayotning qiyinchiliklaridan faqat muhabbat emas, balki ko‘proq yengillik asrab qolgan ekan. Har birimizdagi hazil, kulgi, muammoga ortiqcha yopishmaslik — eng katta kuchimiz bo‘lgan. Biz uyda muammolarni cho‘zib o‘tirmasdik. Dasturxon atrofida ham ularni katta gap qilmasdik. Biror narsa bo‘lsa, hal qilinardi-da, hayot davom etardi. Hatto kasal bo‘lsak ham, ayam: “Hechqisi yo‘q, o‘tib ketadi, o‘sayapsizlar”, derdilar. Shunaqa qilib katta bo‘lganmiz. Bugun o‘ylab qarasam, eng katta donolik ham shu ekan. Hayotni ortiqcha og‘irlashtirmaslik. Soddalikni yo‘qotmaslik. Men ham shu qadriyatni o‘z oilamga olib o‘tishga harakat qilyapman. ❤️

Diora Usmonova

Open In TikTok:

Region: UZ

Monday 15 June 2026 06:28:40 GMT