Intay damiirka iyo dareemahaba kaa dillanbay odhanayaan, “Waad is beddeshay” Waxaa laga yaabaa in ay sax yihiin. Haa, waad is beddeshay. Laakiin ma aha sabab aad dadka nacday ama qalbigaagu adkaaday, ee waa sababta oo ah nololdu waxay ku bartay waxyaabo aan buug lagu qorin. Waxay ku tustay wejiyo kala duwan, waxay ku maqashiisay erayo macaan oo aan run ahayn, waxayna ku dareensiisay xanuun aan qof walba fahmi karin. Qofkii shalay si fudud wax walba u rumaysan jiray maanta wuu fiirsadaa. Qofkii shalay qof walba qalbigiisa gelin jiray maanta wuu kala saaraa dadka. Qofkii shalay aaminka badnaa maanta wuxuu bartay in kalsoonidu tahay wax la kasbado, ee aan hadiyad lagu bixin. Mararka qaarkood waxaad u xiistaa naftii hore. Naftii qosol badanayd, naftii aan welwelka badnayn, naftii rajada badan lahayd. Laakiin markaad si qoto dheer u fikirto, waxaad garanaysaa in naftaas hore ay ahayd mid aan wali arag xaqiiqooyin badan oo noloshu qarinaysay. Waxaad soo martay maalmo ku baray in aan qof walba kuu faraxsanayn markaad guulaysato. Waxaad soo martay waqtiyo ku tusay in qof walba oo ku dhoola-caddeeyaa aanu qalbiga kuu sidin wanaag. Waxaad soo martay duruufo ku baray in mararka qaarkood aamusaantu ka qiimo badan tahay kun eray. Sidaas darteed marka laguu sheego, “Waad is beddeshay,” ha isku dayin inaad naftaada difaacdo. Kaliya dhoolla-caddee oo qalbigaaga ka dheh: “Haddii aanan is beddelin, waxaan ahaan lahaa qofkii mar walba dhaawacma. Haddii aanan is beddelin, casharradii noloshu waxba ima tarteen. Haddii aanan is beddelin, maanta ma ahaan lahayn qofka adag ee weli taagan inkastoo uu wax badan soo maray.” Waayo dadka waxay arkaan isbeddelkaaga, laakiin ma arkaan ilmadii aad kaligaa tirtirtay. Waxay arkaan aamusnaantaada, laakiin ma maqlaan qayladii qalbigaaga. Waxay arkaan wejigaaga deggan, laakiin ma oga dagaalladii aad gudaha kula jirtay. Qofka maanta aad tahay ma aha qof luntay, waa qof ay noloshu bisleysay. Ma aha qof dareenkii ka dhammaaday, waa qof bartay halka uu dareenkiisa dhigo. Ma aha qof is beddelay oo xumaaday, waa qof xaqiiqada nolosha indhihiisa ku arkay. Waana sababta ay mararka qaar dadka kuu yidhaahdaan “waad is beddeshay”, halka adiguna qalbigaaga ka og tahay in aanad is beddelin oo keliya, balse aad ka soo gudubtay waxyaabo badan oo dadkaasi aanay waligood ogaan doonin.😭💔#Dareen #foryou #somalitiktok - @saayo621