Сарсемалиев сотта Ақбаянның ауруы кезінде болған жағдайларды айтты Сот отырысында Сарсемалиев жары Ақбаянның ауырған кезеңі мен сол уақытта болған жағдайлар туралы жауап берді. Оның айтуынша, 2024 жылдың сәуір айында Ақбаян жүкті болған. Сол жылдың тамыз айында отбасы болып Жангелдин ауылына барған. Ауылда жүрген кезде Ақбаянның жағдайы күрт нашарлап, дем жетпей ауырған. Сарсемалиевтің сөзінше, Ақбаян ағасымен бірге қалаға кеткен. Ол бастапқыда инфекциялық ауруханаға жатқызылып, пневмония деген диагноз қойылған. Күйеуі бірге барғысы келгенімен, оны жібермей, балалардың қасында қалуын айтқан. Сотталушының айтуынша, сол түні сағат 12 шамасында Ақбаянның облыстық ауруханаға ауыстырылғаны және диагнозы басқа болып, шұғыл ота жасалатыны туралы хабарланған. Қолхатқа қол қою үшін Сарсемалиевті шақырғанымен, оның айтуынша, ата-енесі баруына рұқсат бермеген. Ол дәрігерлермен телефон арқылы келісім берген. – Ота таңға дейін жалғасты. Қасында ешкім болмады. Сол кезде үлкен жанжал болды. Ата-енем қыздарының жағдайына немқұрайлы қарады деп ойладым: өздері бармады, мені де жібермеді, – деді Сарсемалиев. Оның айтуынша, ота барысында Ақбаянның жүрегі екі рет тоқтаған. Бірнеше күннен кейін ғана ата-енесін көндіріп, ауруханаға барған. Сарсемалиев дәрігерлер ана мен баланың өмірін сақтау үшін ауыр дәрілер қолданғанын және баланың денсаулығына кепілдік бере алмағанын айтқанын жеткізді. Ақбаян 20 күн комада жатқан. Сотталушының сөзінше, Ақбаянның анасы дәрігерлерге іштегі баланың анасының жағдайына әсер еткенін айтып, жүктілікті тоқтатуды сұрағанын жеткізді. – Дәрігер енемнің осы сөзін маған жеткізді. Бұл сөз менің намысыма тиді, – деді Сарсемалиев. Алайда баланы сақтап қалу туралы шешім қабылдаған. 2024 жылдың желтоқсан айында Ақбаян кесарь тілігі арқылы босанған. Сол кезде жанында өзі болғанын айтты. Босанғаннан кейін әйелінің денсаулық жағдайыныа байланысты қасында күтуші қажет болған. Сарсемалиев перинаталдық орталықта жалғыз ер адам болып жүру оған қиын болғанын, сол себепті енесінен көмек сұрағанын айтты. – Қасына келіп, көмектесіңіздерші деп өтіндім. Бірақ бас тартты. Сол кезде олардың өз қамдарын ғана ойлағанын түсіндім, – деді сотталушы. Оның сөзінше, Ақбаян сол кезеңнен бастап баласын тани алмаған, есін білмеген. Нәрестені өзі бағып, ешкімнің көмегінсіз қарағанын айтты. – Баланы өзім бақтым, ешкім көмектеспеді. Қырқынан шыққаннан кейін анама апардым, әжесі қарай бастады. Оған да енем қарсы пікір айтты, – деді ол. Сарсемалиев қайынжұрты тарапынан жеткілікті қолдау болмағанын, алайда қайын ағасының оларды бақылап отыру үшін жиі келіп тұрғанын айтты. – Егер отбасыма жаным ашымаса, сол қиын кезеңде-ақ кетіп қалар едім. Бірақ балаларым мен әйелім үшін жауапкершілікті өз мойныма алуды шештім, – деді Сарсемалиев. Оның айтуынша, кейін балаларын өзі тұрған ауылдағы мектепке ауыстырып, басты мақсаты әйелін емдету болған. Осы жоспармен қайын ағасы мен Ақбаянды алып, Стамбұлға барғанын айтты. Хұсни ХАМЗА - @atpress.kzz