አንዳንድ ጊዜ ሰው ቆም ብሎ ወደ ኋላ ሲመለከት አንድ የሚያስገርም እውነት ያገኛል። በልጅነታችን ያሰብነው ሕይወት የት አለ? በወጣትነታችን የሳልነው ሕልም የት ደረሰ? በሌሊት እንቅልፍ ነስተን የተመኘነው፣ በቀን ላብ አፍሰን የተከተልነው፣ በልባችን ያቀፍነው ብዙ ነገር ዛሬ እንደ ጭስ ተኖ ጠፍቶ እናገኘዋለን። ሮጠናል። ብዙ ሮጠናል። ሌሎች ከደረሱበት ለመድረስ፣ ከነበርንበት ለመውጣት፣ ከምናስበው ከፍታ ላይ ለመድረስ እግራችንን አላሳረፍንም። ነገር ግን አንዳንድ ጊዜ የደረስንበትን ስንመለከት፣ ያሰብነው አንድም እንዳልሆነ እናያለን። ገንዘብ ቢኖረን ደስተኛ እንሆናለን ብለን አሰብን፤ ገንዘብ መጣ፣ ግን ሰላም አልመጣም። ዝና ቢኖረን ሁሉም ይወደናል ብለን አሰብን፤ ዝና መጣ፣ ግን እውነተኛ ፍቅር አልመጣም። ሥልጣን ቢኖረን ሁሉን እንቆጣጠራለን ብለን አሰብን፤ ሥልጣን መጣ፣ ግን የራሳችንን ልብ እንኳ መቆጣጠር አቃተን። እውነቱ ግን ሕይወት እንደ እኛ አትጓዝም። እኛ እቅድ እናወጣለን፤ ሕይወት ግን የራሷን ምዕራፍ ትጽፋለች። እኛ በር እንከፍታለን፤ እጣ ፈንታ ደግሞ ሌላ መንገድ ያሳየናል። አንዳንዴ ያላገኘነው ነገር ከጠፋብን ሳይሆን ከሚጎዳን ነገር የተጠበቅንበት ሊሆን ይችላል። ምናልባት ያሰብነው አልሆነም፤ ግን ያላሰብነው ሆኖ ይሆናል እዚህ ያደረሰን። ምናልባት ያለቀስንበት ውድቀት ዛሬ የጠንካራነታችን ምክንያት ሆኖ ይሆናል። ምናልባት ያጣነው ሰው ስለ እውነተኛ ፍቅር አስተምሮን ይሆናል።ዐምናልባት ያላገኘነው ሀብት የሰውነታችንን ክብር እንዳናጣ አድርጎን ይሆናል። ስለዚህ ዛሬ አንድ ነገር እናስተውል። ሕይወት ያሰብነውን ሁሉ ለመስጠት ቃል አልገባችልንም፤ ነገር ግን የሚያስፈልገንን ለማስተማር ግን ፈጽሞ አትሰስትም። አዎ... ያሰብነው አንድም ላይሆን ይችላል። ግን ዛሬ ያለንበት ቦታ፣ የተማርነው ትምህርት፣ ያተረፍነው ማስተዋልና የሆንነው ሰው... ከሁሉም ስኬት በላይ የሆነ ስጦታ ሊሆን ይችላል። ምክንያቱም በመጨረሻ ሕይወት የምትለካው በያዝነው ነገር ሳይሆን፣ ሰው በሆንነው ነው ። ይህ የእኔ እይታ ነው✍️ ቀጣይ ሌሎች እይታዎች እንዲደርስዎት የእኔ እይታን ፔጅ follow, like and share በማድረግ ቤተሰብ ይሁኑ! #foryou #fyp #viral #fypシ #viralvideo - @viewer_1221