Sharaf ayay ii ahayd inaan ka qayb galo munaasabadda qalin-jabinta dufcaddii ugu horreysay ee barnaamijyada Certified Professional Financial Accounting Specialist (CPFAS) iyo Certified Professional Sharia Specialist (CPSS), oo ay bixiso hay’adda caalamiga ah ee Accounting and Auditing Organization for Islamic Financial Institutions (AAOIFI), isla markaana uu martigeliyay SomBank Soomaaliya. Waxaan ka qayb galay dood-wadaag (Panel Discussion), taas oo aan ku adkeeyay muhiimadda ay leedahay barashada iyo hirgelinta heerarka AAOIFI, maadaama ay yihiin halbeegyo caalami ah oo xoojiya hufnaanta, isla xisaabtanka, maamulka wanaagsan iyo u hoggaansanaanta Shareecada Islaamka. Waxaan sidoo kale carrabka ku adkeeyay muhiimadda wada shaqaynta hay’adaha maaliyadeed iyo doorka Bangiga Dawladda ee nidaaminta, kormeerka iyo hubinta in bangiyada gaarka loo leeyahay ay adeegyadooda u fuliyaan si waafaqsan Shareecada Islaamka iyo xeerarka jira. Dhisidda nidaam maaliyadeed oo adag, lagu kalsoon yahay, isla markaana waafaqsan Shareecada Islaamka, waxay u baahan tahay maalgelin lagu sameeyo aqoonta, tayeynta xirfadlayaasha, midaynta shuruucda gudaha iyo qaadashada heerarka caalamiga ah. Waxaan bogaadinayaa SomBank Soomaaliya iyo dhammaan qalin-jabiyeyaasha doorka ay ka qaadanayaan horumarinta maaliyadda Islaamiga ah ee Soomaaliya. Anagoo ah Bangiga Dawladda Puntland, waxaan sii wadaynaa taageeridda dadaallada lagu xoojinayo aqoonta, halbeegyada caalamiga ah iyo kobcinta kalsoonida nidaamka maaliyadeed. Hambalyo dhammaan qalin-jabiyeyaasha. #AAOIFI #IslamicFinance #ShariaCompliance #Somalia #Puntland - @mohamed.mohamud.amin