@anaskhalifa1983: بتدمر ثقة ابنك في نفسه..وإنت فاكر إنك بتبنيها! 🛑💔 يا ترى إنت بتمدح ابنك إزاي لما بيعمل حاجة كويسة؟ بتقوله: "إنت عبقري"، "إنت أذكى طفل في الدنيا"، "مفيش زيك"؟ كلنا كآباء وأمهات بنقول الكلام ده بدافع الحب المطلق.. بس الحقيقة المرة اللي محتاجين نواجهها دلوقتي، إن المدح زي الدوا، لو جرعته وطريقته غلط.. بيسمم بدل ما يعالج! فين المشكلة؟ وليه الكلام ده خطير؟ 🧠 علم النفس الحديث (زي أبحاث كارول دويك في ستانفورد) بيقول إننا لما بنمدح "الجينات أو الصفات الثابتة"، بنزرع في مخ الطفل "عقلية ثابتة" (Fixed Mindset). الطفل بيتبرمج إن ذكاءه ده منحة اتولد بيها. ولما بيكبر ويواجه مسألة صعبة أو يسقط، مخه بيترجم إيه؟ "أنا سقطت.. يبقى أنا غبي مش ذكي زي ما ماما قالتلي". الثقة بتنهار تماماً وبيخاف يجرب أي جديد! وفي دراسة تانية لإدي بيرلمان أثبتت إن المدح المبالغ فيه والمقارنة بيبني "نرجسية" وشعور بالاستحقاق، مش ثقة بالنفس. الخطر المضاعف لأطفال الـADHD ⚠️ لو ابنك عنده ADHD، الموضوع هـيكون أضعاف مضاعفة أخطر لحاجتين: 1️⃣ نقص الدوبامين: مخه مابيفهمش المدح المطلق، هو محتاج مدح "محدد وفوري" على فعل معين عشان يفرز دوبامين ويكرر السلوك ده. 2️⃣ حساسية الرفض (RSD): نفسيتهم عاملة زي الإزاز. لو ربطت قيمته بكلمة "عبقري" وجه في يوم مقدرش يركز، هـينهار انهيار كامل وهيكره نفسه. إزاي نصلح دي؟ (الإعجاز في ديننا) 🕌 سبحان الله، الإسلام حل المعادلة دي من ١٤٠٠ سنة! قيمتنا في ديننا مربوطة دايماً بالسعي والمجهود مش بالجينات.. ربنا بيقول: "وَأَن لَّيْسَ لِلْإِنسَانِ إِلَّا مَا سَعَى". والنبي ﷺ لما كان بيمدح، كان بيمدح الفعل المكتسب والمجهود (زي قيام الليل أو الحلم والأناة)، مش بيمدح الشخص في المطلق عشان يحميه من الكبر. خطوات عملية حسب السن 📝: * من ١ لـ ٥ سنين: امدح السلوك الواضح المباشر. (أنا فخور إنك شاركت أخوك اللعبة). * من ٦ لـ ١٢ سنة: امدح المجهود والمثابرة مش النتيجة. (أنا شفت إصرارك وإنت بتحاول تحل المسألة دي كذا مرة وميئستش). * من ١٣ لـ ١٨ سنة (المراهق): المراهق مش محتاج تسقيف، محتاج "احترام" لقراراته ومجهوده، خصوصاً مراهق الـADHD اللي حاسس إن العالم كله بينتقده. (أنا بحترم جداً طريقتك في حل مشكلتك مع صاحبك). إحنا عايزين نربي عيال عارفين إن قيمتهم في مجهودهم.. متصالحين مع أخطائهم، وعندهم شجاعة يحاولوا تاني وتالت. جربوا تغيروا طريقة المدح، وشوفوا التغيير الجذري في ولادكم. بحبكم في الله 🤍 بحبكم في الله ❤️ أخوكم أنس لو الفيديو ده لمس وجع جواك أو فادك، شاركه مع حد محتاج يسمعه.

أنس خليفة

Open In TikTok:

Region: MA

Thursday 18 June 2026 13:30:53 GMT