@gillybonny_tv: Mwakilishi wa Jimbo la Shaurimoyo, Zanzibar, Hamza Hassan Juma amesema kauli ya serikali kuhusu ajira imelenga kuwahamasisha vijana wa Zanzibar kujitokeza kuomba nafasi za kazi badala ya kukaa vijiweni na kulalamikia ukosefu wa ajira. Akizungumza bungeni, alisema zaidi ya asilimia 80 ya wafanyakazi katika baadhi ya sekta, ikiwemo utalii na ujenzi, ni vijana kutoka nje ya Zanzibar, jambo linaloonyesha kuwa nafasi za ajira zipo lakini vijana wengi wa Zanzibar hawazitumii ipasavyo. Aidha, amewataka vijana kujiongezea elimu na ujuzi unaohitajika katika soko la ajira ili waweze kushindana na kupata nafasi hizo. Serikali pia imeahidi kuendelea kutoa elimu kupitia mabaraza ya vijana ili kuwasaidia kuingia kwenye soko la ajira na kupunguza pengo lililopo kati ya vijana wa Zanzibar na wale kutoka nje ya visiwa hivyo.