Azərbaycanda son günlər iri ticarət şəbəkələrində tətbiq edilən “1 qəpiyə yumurta” kampaniyası alıcıların böyük marağına səbəb olub. Kampaniya bu gün də davam edir və bəzi marketlərdə “Hacıqabul Quşçuluq” firmasının istehsal etdiyi yumurtalar 1 qəpiyə satışa çıxarılıb. Məsələ ilə bağlı açıqlama verən Azərbaycan Quş Əti, Yumurta İstehsalçıları və İxracatçıları Assosiasiyasının rəhbəri Mürvət Həsənli bildirib ki, qiymətlərdəki bu kəskin ucuzlaşma bazarda yaranmış məhsul bolluğu ilə əlaqədardır. Onun sözlərinə görə, hazırda ölkədə gündəlik yumurta istehsalı 6 milyon ədədi ötüb. Halbuki daxili bazarın gündəlik tələbatı təxminən 4-4,5 milyon ədəd təşkil edir. Bu isə istehsalın tələbatı təxminən 25 faiz üstələdiyini göstərir. Mütəxəssislər qeyd edirlər ki, yay mövsümündə yumurtaya olan tələbat ənənəvi olaraq azalır. Məktəblərdə dərslərin başa çatması, təhsil müəssisələrinin fəaliyyətində fasilə yaranması və Məhərrəmlik ayı ilə əlaqədar toy məclislərinin keçirilməməsi bazarda istehlakın azalmasına səbəb olub. Eyni zamanda təsərrüfatlarda istehsalın yüksək səviyyədə davam etməsi satış həcmlərinin azalması ilə nəticələnib. Məlumata görə, məhsulun uzun müddət anbarda saxlanılmasının qarşısını almaq və dövriyyəni sürətləndirmək məqsədilə bəzi ticarət şəbəkələri xüsusi endirim kampaniyalarına başlayıb. Bu səbəbdən müəyyən sayda yumurtalar simvolik qiymətə – 1 qəpiyə alıcılara təqdim edilir. Qeyd edək ki, kampaniya sosial şəbəkələrdə də geniş müzakirələrə səbəb olub. Bir çox vətəndaşlar marketlərdə yaranan növbələrin görüntülərini paylaşaraq yumurtaya olan marağın yüksək olduğunu bildiriblər. Ekspertlər isə hesab edirlər ki, bazarda tələb və təklif arasındakı balans bərpa olunduqdan sonra qiymətlər yenidən əvvəlki səviyyəsinə yaxınlaşacaq. Hazırda yumurta bazarında müşahidə olunan vəziyyət mövsümi xarakter daşıyır və istehsalçıların sözlərinə görə, yaxın aylarda bazardakı vəziyyət tələbatın artmasından asılı olaraq dəyişə bilər. #xeber #yumurta #xəbərlər #sondəqiqə #sestv - @sestv.az