@megdadahmed22: من أول مرة شفتك فيها، حسيت إنو في ناس ربنا بجيبهم لينا من غير مواعيد، ومن غير مقدمات، لكن وجودهم بغير حاجات كتيرة جوانا. حاجات كنا فاكرنها ماتت، أو خلاص اتعودنا نعيش من غيرها. ولحدي هسع، كل ما أتذكر أول مرة شفتك فيها، ببتسم من غير ما أشعر. بقول بيني وبين نفسي: سبحان الله، كيف لحظة صغيرة زي دي قدرت تخلّف وراها كل الإحساس ده؟ يمكن ما كان حب من أول نظرة زي ما الناس بتقول، لكن كان ارتياح غريب، وألفة ما عندها تفسير. كأنو الروح عرفتك قبل العيون، وكأنو القدر كان بكتب بداية حكاية من أول نظرة، وأنا ما كنت عارف. أنا قبل ما أعرفك كنت فاكر نفسي عارف روحي كويس، عارف بحب شنو وبكره شنو، وعارف حدود قلبي وين. لكن لمن دخلت حياتي، اكتشفت إنو في حاجات كتيرة كنت جاهلها عن نفسي. اكتشفت إنو الزول مرات ما بعرف نفسو إلا لمن يقابل زول يشبه إحساسو ويفهم سكاتو قبل كلامو. لمن كنت بتسأل عني في أبسط التفاصيل، ولمن كنت بتلاحظ حاجات الناس كلها بتفوتها. من اهتمامك البسيط البخلي اليوم العادي مختلف، ومن وجودك البخلي الزحمة أخف والدنيا أوسع. بقيت أعرف نفسي منك... لمن ألقى روحي مستني رسالة منك، أو فرحان عشان سمعت صوتك، أو مبتسم من غير سبب واضح غير إنك مريت في بالي. عرفت إنو المشاعر الحقيقية ما بتدخل القلب دفعة واحدة، بتدخل حبة حبة، لحدي ما تلقى روحك اتعلقت بي زول من غير ما تحس. لمن كنت بقعد أفكر في كلامك بعد ما ينتهي الحديث، وأراجع مواقفنا وأضحك براي. من كمية الأمان البقيت أحسو وأنا بحكي ليك حاجات ما حكيتها لي زول، ومن راحة غريبة كنت بلقاها في وجودك. وفي يوم من الأيام، لقيت نفسي حافظ تفاصيلك كلها. حافظ ضحكتك، وحافظ زعلك، وحافظ الحاجات البتفرحك والحاجات البتوجعك. ولقيت إنو جزء كبير من يومي بقى مربوط بيك، من غير اتفاق ومن غير وعود. يمكن أجمل حاجة فيك إنك خليتني أشوف الدنيا بطريقة مختلفة. خليتني أؤمن إنو لسة في ناس بتجي في الزمن الصعب وتكون سند، ولسة في قلوب صادقة وسط الزحمة دي كلها. خليتني أعرف إنو القرب الحقيقي ما قرب المسافات، القرب الحقيقي إنك تلقى زول فاهمك من غير ما تشرح كتير. وعشان كده بقول عارفني منك... من صبرك، من طيبتك، من كلامك، وحتى من غيابك. أيوة، من غيابك ذاتو. لأنو الغياب علمني قيمة الحضور، وعلمني إنو في ناس لمن تبعد بتخلي فراغ كبير ما أي زول بقدر يملاه. والليلة لو سألتني شنو الحاجة الخلتني أعرف نفسي أكتر؟ ما ح أقول تجربة، ولا زمن، ولا ظروف مرت عليّ. ح أقول إنو في زول مر من حياتي وخلى أثر ما ساهل يتنسى. زول عرفني بنفسي أكتر مما عرفت نفسي، وخلى في القلب حكاية جميلة، مهما الزمن طال ومهما اتغيرت الأيام، ح تفضل عايشة جواي. عارفني منك... ومن الحتة الحلوة الخليتها في روحي، الحتة البقت كل ما أتذكرها أبتسم، وأقول: سبحان الله، كيف زول واحد ممكن يغير حاجات كتيرة في زول تاني من غير ما يحس. وفي النهاية، يمكن أجمل حقيقة اكتشفتها إنو بعض الناس ما بيكونوا مجرد عابرين في حياتنا، بيكونوا جزء من تكويننا، وجزء من الحكاية البنعيشها كل يوم. ولذلك، مهما أبعدتنا الأيام، ح أظل أقول: أنا عرفت نفسي منك. وعارفني منك لا الزمن يقدر يحول قلبي عنك لا المسافه ولا الخيال يشغلني منك... مقـــ⁷ــداد #خواطر_مقداد #خواطر #سودانيز_تيك_توك_مشاهير_السودان🇸🇩 #سودانيز_تيك_توك_مشاهير_السودان #جخو،الشغل،دا،يا،عالم،➕_❤_📝

المقداد // Megdad

Open In TikTok:

Region: SD

Saturday 20 June 2026 18:00:07 GMT