اتقدملي شاب وفي الرؤيه الشرعيه رفعت النقاب علشان يشوفني وانا عيني في الأرض ومكسوفه جدا لقيته زعل وقال لابوه لأ يلا بينا نمشي أنا كنت فاكرها أحلى من كده وجاي اخطبها من كلام الناس علي جمالها وطلعت عاديه هو قال الكلمتين دول ومشي وانا مستوعبتش هو بيقول ايه ! اتصدمت وحرفيا جاتلي عقدة إني أطلع اقابل عريس وأرفع النقاب ، من ساعتها وقولت أنا مش هتجوز خالص وهعيش كده لانه شككني في نفسي رغم أني جميله بشهادة ال يعرفوني لكن خوفت ارفع النقاب لعريس تاني في يوم من الأيام كنت رايحه أشتري قماش علشان الخياطه تعملي فستان علشان فرح أخويا . المهم حاسبت صاحب المحل ومشيت وروحت على الخياطه بسرعه لقيتها بتقولي القماش زيادة ٤ متر . قولتلها ايه دا ازاي يعني قالتلي والله القماش زايد 4 متر لو كده اشتريه منك خامة القماش جميله أوي وطالعه من عيني بصراحه قولتلها من غير تردد لأ الله يباركلك قصيلي الأربعه متر وهاتيهم أرجعهم للراجل قالتلي هترجعي المشوار دا كله ، دا في آخر بلاد المسلمين يا بنتي قولتلها هرجع طبعا ودلوقتي ، ربنا يعيني على المسافة بقا . رجعت للراجل وكانت المسافة ساعتين وأول ما وصلت قعدت مكاني وأنا بنهج الراجل كتر خيره جابلي مايه وقالي في حاجه قولتله القماش دا طلع زياده عن اللي حاسبتك عليه قالي طب ماجبتيهوش بكره ليه شكلك جايه من مشوار قولتله لأ مينفعش ، ايه ضمني بكره فيه ايه وانت ليك حق عندي ، اتفضل يا حاج واديته القماش ومشيت ، لكن لقيته بينادي عليا يا بنتي يا بنتي قولتله نعم قالي انتي مخطوبه ؟ اتوترت اوي وقولتله : لأ قالي طب انا عاوزك لابني ، دا دكتور كبير ومربيه كويس وتعبان عليه . أول ما قالي كده اتوترت وقولتله: ربنا يباركلك فيه بس أنا مش عاوزه اتجوز ليه يا بنتي ؟ باين من صوتك انك صغيره وهو مالهوش نصيب في الخطوبات ، وأنا مش هلاقي واحده زيك . قولتله ياحاج احنا دلوقتي كل عريس بيختار عروسته بنفسه . قالي طب سيبيني أجيلكم البيت أنا وهو قولتله ماشي يا حاج دا رقم والدي تاني يوم على طول لقيتهم جايين، وأنا استغربت مكنتش متوقعه إن الحوار بالسرعة دي ، والعريس ما شاء الله زي القمر ، وأنا سمرا ومش حلوه بشهادة آخر عريس ، وبعدين ياربي في وجع القلب دا المهم لبست وطلعت وقعدت معاه واتكلمنا كتير أوي ، كلامه مريح ، وباين عليه متربي فعلا ، بس كل دا مطلبش إني أرفع النقاب ، بعد ما اتكلمنا وخلاص هيقوم قولتله : استنى من فضلك خير يا عروسة قولتله مش هتشوفني ؟ قالي وأشوفك ليه قولتله مش يمكن أطلع وحشه او معجبكش قالي انتي زي القمر قولتله انت عرفت منين إني زي القمر قالي النبي صلى الله عليه وسلم قال واظفر بذات الدين تربت يداك ، وهلاقي اجمل من كده فين اتكسفت وقولتله : طب ممكن طيب أرفع النقاب تشوفني قالي لأ مش ممكن ، ربنا ييسر لنا كده على خير وهشوفك براحتي . مشي وأنا مش مستوعبه الجمال دا كله والأخلاق لكن بردو ايدي على قلبي ، اتخطبنا ٣ شهور ، كان محترم ومتربي وكل مره جايبلي شوكولاته في جيبه وهو جاي ويقولي ماعيش أجبلك علبه ؟ اضحك واقوله هو مش انت دكتور وعارف أن كترها غلط ولا ايه . مره قالي مش هتسأليني بقبض كام زي كل عروسه اتقدمتلها؟ قولتله : قال رسول الله ﷺ: «إذا جَاءَكُم من ترضَون دِينهُ وخُلُقه فزوِّجوه، إلا تفعلُوا تكن فتنةٌ فِي الأرض وفسادٌ عريض». هحتاج أحسن من كده ايه أسأل عنه المهم جه يوم الفرح وأنا متوتره وحاطه ايدي على قلبي ، لبست الفستان الأبيض وحطيت ميكب خفيف كده علشان مش حابه أخفي ملامحي وتفضل طبيعيه تحت النقاب الأبيض بتاعي وعملنا فرح إسلامي جميل وكتبنا الكتاب في القاعه وروحنا بيتنا ، أول ما دخلت باب البيت قالي نورتي بيتك يا عروسة . قومت رافعه النقاب وعيوني مرغره بالدموع وأنا خايفه من الموقف دا لاني متعقده من الحركه دي وخايفه من ردت فعله لمعجبوش هو كمان لكن الصدمه لقيته بيقولي اللهم صل على كامل النور ، ما شاء الله عليكي ، ولقيته باصص لفوق ويقول كتير عليا يارب الحمد لله وقالي انتي جميله جدا ليه كنتي محسساني أنك وحشه فرحت اوي من كلامه من يومها وأنا شايفه نفسي جميله بل شايفه نفسي اجمل واحده في الدنيا وهو مبيقوليش غير يا ست البنات يا ست الستات ♥♥🥹)) ". متخليش حد يهز ثقتك بنفسك انتي جميله طول ما روحك تكون جميله واخلاقك طيبه ربنا هيرزقك بالطيب ال يقدرك ويقدر جمالك يا ست البنات ♥ الجمال جمال الاخلاق وصدق رسولنا الكريم صلى الله عليه وسلم لما قال (.اظفر بذات الدين تربت يداك) - @user86940397818445