@zulqarnan.khan133: ہمارے پروفیشن کا ایک تاریک پہلو یہ بھی ہے کہ ہم نے کبھی طلبہ کے مسائل کو سنجیدگی سے سمجھنے کی کوشش نہیں کی۔ ہمارے پاس اکثر ہر مسئلے کا ایک ہی جواب ہوتا ہے: "بیٹا، یہ چھوٹی موٹی باتیں ہیں، درگزر کیا کرو۔ یہ تو کچھ بھی نہیں، ہم نے اپنے ٹریننگ کے دور میں بہت کچھ برداشت کیا ہے۔" اس سوچ کے نتیجے میں اکثر مظلوم ہی سے معافی منگوائی جاتی ہے اور بالواسطہ طور پر ظالم کی حمایت ہوتی رہتی ہے۔ والدین اپنے بچوں کو ان کے نازک دورِ زندگی میں اچھے اور برے کی تمیز سکھاتے ہیں اور خطرات کے سامنے ان کے لیے ڈھال بنتے ہیں، لیکن ہمارے تعلیمی اداروں میں طلبہ کو اکثر ایسے معاملات میں تنہا چھوڑ دیا جاتا ہے۔ جہاں انہیں یہ سکھایا جانا چاہیے کہ اپنے حقوق کا دفاع کیسے کرنا ہے، مشکلات کا سامنا کیسے کرنا ہے اور اپنے لیے آسانیاں کیسے پیدا کرنی ہیں، وہاں عملاً انہیں احساسِ کمتری، بے بسی اور خاموشی اختیار کرنے کا سبق دیا جاتا ہے تاکہ وہ بھی کل اسی نظام کا حصہ بن جائیں۔ بظاہر یہ معاملات چھوٹے دکھائی دیتے ہیں؛ کسی پرنسپل کا برطرف ہونا یا طلبہ کو کالج سے نکال دینا شاید معمولی بات لگے، لیکن طویل المدتی اثرات بہت گہرے ہوتے ہیں۔ یہ ہر اُس ذہن کو، جس میں جدت، صلاحیت اور اپنے پیشے میں کچھ بہتر کرنے کی خواہش موجود ہو، یہ پیغام دیتا ہے کہ مختلف سوچنے یا تبدیلی لانے کی کوشش نہ کرو۔ اس صورتحال کا بڑا ذمہ دار وہ نظام اور وہ بااختیار حلقے ہیں جو ظلم کو ظلم تسلیم نہیں کرتے اور اپنی خاموشی کے ذریعے اس کی حمایت کرتے ہیں۔ ایک طرف کہا جاتا ہے کہ طلبہ کوئی کام نہیں کرتے، اور دوسری طرف اگر وہ وارڈ میں موجود نہ ہوں تو پورا نظام پریشان ہو جاتا ہے۔ یہ تضاد اور منافقت آخر کب ختم ہوگی؟ جب طلبہ کو محض ماتحت یا خادم سمجھنے کے بجائے ان کی عزت، تحفظ اور رہنمائی کو ترجیح دی جائے گی۔ جب ادارے ان کے لیے ڈھال بنیں گے تو طلبہ خود اپنے اساتذہ اور اداروں سے محبت اور وابستگی محسوس کریں گے۔ لیکن اگر انہیں ہر وقت نوکر سمجھ کر، جب چاہا اور جس کے سامنے چاہا، مریضوں، تیمارداروں اور معاون عملے کے سامنے ڈانٹ دیا جائے، تو ان کے اندر بددلی، مایوسی اور احساسِ محرومی ہی پیدا ہوگا۔ ایسے ماحول میں وہ سیکھنے کے بجائے صرف ہراسانی اور تحقیر کا تجربہ حاصل کریں گے، اور یہی رویے پھر آنے والی نسلوں تک منتقل ہوتے رہیں گے۔ *از قلم! ذوالقرنین وزیر والد زرداد وزیر"

Dr. Zulqarnain Wazir

Open In TikTok:

Region: PK

Monday 22 June 2026 05:13:27 GMT