======{ 🙏 }===== မိဘထက်ပိုပြီးတော့ ကျေးဇူးတင်စရာကောင်းတဲ့ ပုဂ္ဂိုလ်ကို ရှာကြည့်ဦး... မရှိဘူးမဟုတ်ဘူး၊ ရှိနေသေးတယ်တည့်။ မိဘကတော့ ဟုတ်တယ်၊ လူ့လောကဝင်ခွင့် ပေးလိုက်လို့ ကျေးဇူးတင်စရာကောင်းတယ်လို့ ပြောရမယ်။ လူဖြစ်လာတယ်၊ မိဘရဲ့ အကျိုးကျေးဇူးကြောင့် ကျေးဇူးတရားကြောင့် လူဖြစ်လာတယ်။ ဒါဖြင့် မိဘထက်ပိုပြီးတော့ ကျေးဇူးတင်စရာကောင်းတဲ့ ပုဂ္ဂိုလ်ကို မြတ်စွာဘုရားက ထောက်ပြထားတာ ရှိတယ်။ ဒါကြောင့်မို့လို့ ကျေးဇူးတရား အကြီးမားဆုံးပုဂ္ဂိုလ် သုံးမျိုးဆိုတာ မြတ်စွာဘုရား ဟောထားတာ ရှိတယ်။ အဲ့ဒီထဲမှာ မိဘမို့လို့ မဟုတ်ဘူး၊ အကြီးမားဆုံး ပုဂ္ဂိုလ်သုံးဦးဆိုတာ ဘယ်လိုပုဂ္ဂိုလ်လဲဆိုရင်... **မိမိကို ဘုရား၊ တရား၊ သံဃာ ရတနာသုံးပါး ကိုးကွယ်ဆည်းကပ်တတ်အောင် လမ်းညွှန်ပြသတဲ့ ပုဂ္ဂိုလ်** တဲ့။ အဲ့ဒီပုဂ္ဂိုလ်ဟာ ကျေးဇူးရှင်တွေထဲမှာတော့ အကြီးမားဆုံး ကျေးဇူးရှင်တစ်ခုပဲ။ သူ့ရဲ့ ကယ်တင်မှုဟာ အလွန်ကြီးမားတယ်လို့ ဒီလိုပြောရမယ်။ အကယ်၍ ကိုးကွယ်မှု မှားသွားရင် ဒီပုဂ္ဂိုလ်ဟာ ဒုက္ခရောက်သွားနိုင်တယ်။ မှန်ကန်တဲ့ ကိုးကွယ်မှု၊ မှန်ကန်တဲ့ လမ်းကြောင်းကို တင်ပေးလိုက်လို့ ဘုရားကို ကြည်ညိုတတ်လာတယ်၊ တရားကို ကြည်ညိုတတ်လာတယ်၊ သံဃာကို ကြည်ညိုတတ်လာတယ် ဆိုတဲ့ပုဂ္ဂိုလ်ဟာ... မြတ်စွာဘုရား ဟောတဲ့အတိုင်း ဘုရား၊ တရား၊ သံဃာကို ကိုးကွယ်ဆည်းကပ်တဲ့ ပုဂ္ဂိုလ်ဟာ အပါယ်လေးဘုံ မရောက်ဘူး။ ကဲ... အပါယ်ကနေ ကယ်တင်ပေးတာ ကျေးဇူးမများဘူးလား။ မိဘက အပါယ်ကနေ ကယ်တင်ပေးနိုင်တာ မရှိသေးဘူးလေ။ လောကကြီးပဲ သူက ပြသပေးလိုက်တာပဲ ရှိတယ်။ ဒါဖြင့် မိဘရော ဒီထဲပါလို့ မရဘူးလားဆိုတော့ ရတယ်၊ မိဘတိုင်းတော့ မရဘူးနော်။ မိဘတိုင်းတော့ မရဘူး။ (အကယ်၍) မိဘကိုယ်တိုင်ကပဲ ဒီသတ္တဝါတွေ အသက်သတ်နေလို့ရှိရင် ကိုယ့်ကိုယ်တိုင်ပဲ ဝင်သတ်ရမှာပဲ ဖြစ်နေတယ်ပေါ့နော်။ အဲ့တော့ သရဏဂုံသုံးပါးကို ကိုးကွယ်ဆည်းကပ်တတ်အောင် လမ်းညွှန်ပြသပေးလို့၊ သူ့ရဲ့ ကျေးဇူးတရားကြောင့် သရဏဂုံတည်တဲ့ ပုဂ္ဂိုလ်ဖြစ်ပြီဆိုရင် အဲ့ဒီပုဂ္ဂိုလ်ဟာ သရဏဂုံတည်သူ ဆိုတဲ့ပုဂ္ဂိုလ်အပေါ်မှာ သူဟာ သရဏဂုံတည်အောင် လုပ်ပေးတဲ့ဆရာ၊ လမ်းညွှန်ပေးတဲ့ ပုဂ္ဂိုလ်ဟာ **ကြီးမားသော ကျေးဇူးရှင်တစ်ဦးပဲ** ဖြစ်တယ်။ ဟောဒီမှာ မိဘမပါဘူးနော်။ ဒါ မြတ်စွာဘုရားက ဒါကို ထောက်ပြတာ။ သရဏဂုံ တည်သွားပြီဆိုရင် အပါယ်လေးဘုံက လွတ်သွားပြီ။ ဒီအကျိုးဆက်တွေ ပြောမယ်ဆိုရင် သရဏဂုံတည်ခြင်းကြောင့် ဘုရားကို ဆည်းကပ်တယ်၊ တရားကို ကျင့်သုံးတယ်၊ သံဃာကို ဆည်းကပ်တယ်။ အဲ့ဒီ ဘုရား၊ တရား၊ သံဃာ ကြည်ညိုခြင်းကြောင့် ရလာလို့ သိလာတဲ့ အသိဉာဏ်တွေက ဆက်တက်သွားမယ်ဆိုရင် နိဗ္ဗာန်ထိအောင် အကျိုးရောက်သွားနိုင်တယ်ပေါ့။ အပါယ်လေးဘုံက လွတ်ရုံတင်မကဘူး၊ နောက်ဆုံးမှာ သံသရာဝဋ်ဆင်းရဲက လွတ်ကင်းနိုင်တယ်ဆိုတဲ့ အကျိုးကျေးဇူးအထိအောင် ကျေးဇူးပြုတာ ဖြစ်သောကြောင့် ဒီပုဂ္ဂိုလ်ဟာ ကျေးဇူးတရား အကြီးမားဆုံးသော ပုဂ္ဂိုလ်ပဲ။ အဲ့တော့ အသီးသီး လူတိုင်းလူတိုင်းဟာ ကိုယ့်အတွက် ကျေးဇူးတရား အကြီးမားဆုံးပုဂ္ဂိုလ် ဘယ်သူလဲ ကိုယ့်ဟာကိုယ် စဉ်းစား။ "ငါဟာ ဘယ်သူ့ကြောင့် ဘုရား၊ တရား၊ သံဃာ ရတနာသုံးပါးဆိုတဲ့ ကြည်ညိုမှု၊ လေးစားမှုဆိုတဲ့ အသိဉာဏ်ကိုရပြီးတော့ ကြည်ညိုကိုးကွယ်တာလဲ" လို့ ဆိုတာကို ကြည့်လိုက်လို့ရှိရင် အဲ့ဒီလို ကြည်ညိုကိုးကွယ်အောင် ဟောပြောတဲ့ ပုဂ္ဂိုလ်ဟာ အမေ၊ အဖေထဲကလည်း ဖြစ်ချင်ဖြစ်မယ်၊ ဆရာသမားကလည်း ဖြစ်ချင်ဖြစ်မယ်၊ မိတ်ဆွေလည်း ဖြစ်ချင်ဖြစ်မယ်။ ဘယ်သူပဲဖြစ်ဖြစ် သရဏဂုံတည်အောင် သူ့ကို အကြောင်းပြုပြီးတော့ ကိုယ်ဟာ သရဏဂုံတည်ခဲ့တယ်၊ ဗုဒ္ဓဘာသာစစ်စစ် ဖြစ်လာတယ်ဆိုလို့ရှိရင်တော့ ဒီပုဂ္ဂိုလ်ဟာ ကိုယ့်အတွက် **အကြီးမားဆုံးသော ကျေးဇူးရှင်ကြီးပဲ** လို့ ဒီလို သတ်မှတ်ခိုင်းတာ မြတ်စွာဘုရားကနော်။ ဒါက တစ်ဦး။ နောက် ဒုတိယလိုက်ပြီးတော့ ရှာမယ်... ဒီဘုရား၊ တရား၊ သံဃာ ရတနာသုံးပါး ကိုးကွယ်ဆည်းကပ်ရုံမျှမကဘူး၊ နောက်တစ်ခါ ဒီထက်အရေးကြီးတာက ဘာလဲလို့ဆိုရင် **အမှန်တရားကို သိဖို့ အရေးကြီးတယ်**။ ဘုရား၊ တရား၊ သံဃာရတနာကို ကိုးကွယ်ဆည်းကပ်တယ် ဆိုတာ လမ်းကြောင်းအမှန်ပေါ် ရောက်ရုံပဲ ရောက်သေးတယ်။ သို့သော် အမှန်တရားကို သိမှ လမ်းမချော်မှာ ဖြစ်တယ်ပေါ့။ ကြည့်လေ... ဘုရား၊ တရား၊ သံဃာတော်ကို ကိုးကွယ်ကြပါရဲ့ လမ်းချော်နေတဲ့ ပုဂ္ဂိုလ်တွေ အများကြီးရှိတယ်။ အဲ့ဒီလို လမ်းမချော်အောင် အမှန်တရားကိုသိရမယ်။ အမှန်တရားဆိုသည်မှာ **သစ္စာလေးပါး** ကို ပြောတာ။ ဒီနေရာမှာ သစ္စာလေးပါးဆိုတဲ့ အမှန်တရားကို မသိဘဲနဲ့ သံသရာဝဋ်က လွတ်တယ်ဆိုတဲ့ ပုဂ္ဂိုလ် မရှိဘူး... မရှိဘူး။ မြတ်စွာဘုရား ကိုယ်တိုင်ကနေပြီးတော့ ရဟန်းတော်တွေကို ဆုံးမဟောကြားပေးတာ ရှိတယ်။ **"ဟောဒီ သစ္စာလေးပါးကို မသိလို့တဲ့ ငါရော သင်တို့ရော သံသရာထဲမှာ ကျင်လည်ခဲ့ရတဲ့ ဘဝတွေ မြောက်များလှပြီ"** အစမထင်တဲ့ သံသရာတစ်ခွင်မှာ ဟောဒီ သစ္စာလေးပါးကို မသိလို့ တို့တတွေဟာ သံသရာလည်ခဲ့ရပြီလို့ မြတ်စွာဘုရားက ဒီလိုဟောတာ။ စတုန္နံ အရိယသစ္စာနံ... အမှန်မမြင်လို့ သင်တို့ရော ငါရော သံသရာထဲမှာ ဆင်းရဲဒုက္ခမျိုးစုံနဲ့ ကြုံခဲ့ရတယ်...။ ပါမောက္ခချုပ်ဆရာတော်ကြီး #ဓမ္မသုတလမ်း - @dhammathutalan