@karakiya_ms: Ана мен бала саулығының сақшысы Маңғыстау облыстық көпбейінді ауруханасы директорының «Ана мен бала істері» жөніндегі орынбасары, жоғары санатты акушер-гинеколог Юлия Досаханова денсаулық сақтау саласында 20 жылдан бері табысты еңбек етіп келеді. Өз мамандығына деген адалдығы мен жауапкершілігінің арқасында ол өңірдегі ана мен бала денсаулығын сақтау ісіне елеулі үлес қосып жүрген тәжірибелі мамандардың бірі, деп хабарлайды Қоғамдық коммуникация орталығы. Юлия Досаханова дәрігер болуды бала кезінен армандаған. Арманын мақсатқа айналдырып, мемлекеттік медицина академиясына түсіп, кейін медицина университетінде клиникалық ординатурадан өтеді. Осылайша кәсіби жолын акушерия және гинекология саласына арнауға бел буады. Еңбек жолын Маңғыстау облыстық перинаталдық орталығының қабылдау бөлімінде дәрігер болып бастаған жас маман аз уақыттың ішінде кәсіби біліктілігімен көзге түсті. Кейін жүкті әйелдер патологиясы бөлімінің меңгерушісі қызметіне тағайындалып, басқарушылық қабілетін де таныта білді. 2020 жылдан бастап облыстық перинаталдық орталық директорының орынбасары қызметін атқарса, 2023 жылдан бері Маңғыстау облыстық көпбейінді ауруханасында еңбек етуде. Бүгінде Юлия Досаханова облыстық көпбейінді аурухана жанындағы перинаталдық орталықтың босандыру қызметіне жетекшілік етеді. Мұнда экстрагениталдық патологиясы бар жүкті әйелдерге мамандандырылған медициналық көмек көрсетіледі. Атап айтқанда, жүрек-қан тамырлары, асқазан-ішек жолдары және несеп-жыныс жүйесі ауруларымен ауыратын пациенттер қабылданады. Сонымен қатар аудандық ауруханалардағы ауыр жағдайдағы науқастарға телемедициналық-консультативтік көмек ұйымдастырылып, шалғай өңір тұрғындарының сапалы медициналық қызмет алуына мүмкіндік жасалуда. Маманның айтуынша, ана мен бала денсаулығын сақтаудағы маңызды мәселелердің бірі - жүкті әйелдердің дәрігер көмегіне кеш жүгінуі. Кей жағдайда болашақ аналар уақытылы тексеруден өтпей, мамандар бақылауына кеш келеді. Бұл өз кезегінде жүктіліктің асқынуына және ана мен бала денсаулығына қауіп төндіруі мүмкін. - Жүктілік кезеңіндегі тұрақты бақылау мен уақытылы медициналық тексерулер көптеген қауіптің алдын алады. Сондықтан әрбір әйел өз денсаулығына жауапкершілікпен қарап, дәрігер кеңесін назардан тыс қалдырмауы қажет, - дейді Юлия Досаханова. Кәсіби тәжірибесін жетілдіріп, адам өміріне деген аса зор жауапкершілікке адалдық танытқан Юлия Досаханова үшін әрбір ана мен дүниеге келген сәбидің амандығы - ең үлкен жетістік. Оның көпжылдық еңбегі мен білімі өңірдегі акушерлік-гинекологиялық қызметтің сапасын арттыруға бағытталып келеді.

There are no more comments for this video.

To see more videos from user @karakiya_ms, please go to the Tikwm homepage.