တောထွက် ရဟန်း (၁၀)မျိုး ************************* တောထွက် ရဟန်းတွေ အကြောင်းကို မသိခင် တောထွက် ဆိုတဲ့ အဓိပ္ပာယ်ကို အရင်းဆုံး သိထားဖို့ လိုပါတယ်၊ တောထွက်လို့ ခေါ်တဲ့ အသုံး အနှုံးသည် မြတ်စွာ ဘုရားဟောထားတဲ့ ပါဠိအတိုင်းဆိုရင် ဝုဍ္ဎပဗ္ဗဇိတောလို့ ရှိပါတယ်၊ ဝုဍ္ဎဆိုတာ အသက်ကြီး အရွယ်ကြီးလာမှ ပဗ္ဗဇိတောဆိုတာ ကိုရင် ဝတ်လာတဲ့သူ ရဟန်း ဝတ်လာတဲ့သူလို့ အဓိပ္ပာယ် ရပါတယ်၊ ဝုဍ္ဎပဗ္ဗဇိတော- အသက်ကြီးလာမှ အရွယ်ကြီးလာမှ ကိုရင် ဝတ်လာတဲ့သူ ရဟန်း ဝတ်လာတဲ့သူကို တောထွက် ရဟန်းလို့ လောကလူတွေက ပြောဆို သုံးနှုံးတယ် ဆိုတာကို နားလည်ရမယ်၊ မြတ်စွာဘုရားဆိုတာ အတုလံ-အတုမရှိ အသာဆုံးပုဂ္ဂိုလ် ဖြစ်တယ်၊ အပ္ပမေယျံ-နှိုင်းယှဉ်စရာ မရှိတဲ့ ပုဂ္ဂိုလ် ဖြစ်တယ်၊ တစ်ချို့ ဉာဏ်ပညာ မရှိတဲ့ လူအ လူညံ့က အတုလံ အပ္ပမေယျံဆိုတဲ့ ဘုရားဂုဏ်ကို မသိပဲ မြတ်စွာဘုရားလဲ တောထွက်ပဲလို့ ပြောကြတယ်၊ မြတ်စွာဘုရားကို တောထွက်လို့ပြောပြီး နှိုင်းယှဉ်မှုလုပ်နေတာ အတော်လေး ရိုင်းတယ်၊ ဂေါတမ မြတ်စွာဘုရားဆိုတာ သဗ္ဗညုတဉာဏ်ကို ရပြီးတဲ့အခါ လူ နတ်ဗြဟ္မာ သတ္တဝါတွေကို သစ္စာ(၄)ပါးသိဖို့ မဂ် ဖိုလ်ကို ရဖို့အတွက် လေးအသင်္ချေနှင့် ကမ္ဘာတသိန်းကြာအောင် ပါရမီဖြည့်ပြီးမှ ဘုရားဖြစ်တယ်ဆိုတာကို ဉာဏ်ပညာနဲ့ သေချာ စဉ်းစားကြည့်ပါ၊ ထီးနန်း စည်းစိမ်တွေ စကြာမင်း ရာထူးတွေ ယသောဓရာနဲ့ ရာဟုလာတို့ကို့ စွန့်လွှတ်ပြီး အသက်(၂၉)နှစ်မှာ တောထွက်ပါတယ်၊ (၂၉)နှစ်ဆိုတာ အရွယ်ကောင်း ဖြစ်နေလို့ အသက်ကြီးတယ်လို့ ပြောလို့ မရပါဘူး၊ ဝုဍ္ဎပဗ္ဗဇိတော တောထွက် ရဟန်းတွေရဲ့အကြောင်းကို ဂေါတမ မြတ်စွာဘုရားက ဘယ်နားမှာ ဟောထားတာလဲဆိုရင် ၁။ ဝိနယ ပိဋကတ်၊ ၂။ သုတ္တန် ပိဋကတ်၊ ၃။ အဘိဓမ္မာ ပိဋကတ်ဆိုပြီး ပိဋကတ်(၃)ပုံ ရှိပါတယ်၊ ပိဋကတ်(၃)ပုံရှိတဲ့ အထဲမှာ သုတ္တန် ပိဋကတ်ထဲမှာ ဟောထားပါတယ်၊ သုတ္တန် ပိဋကတ်ထဲမှာ ၁။ ဒီဃနိကာယ ၂။ မဇ္ဈိမနိကာယ ၃။ သံယုတ္တနိကာယ ၄။ အင်္ဂုတ္တရနိကာယ ၅။ ခုဒ္ဒကနိကာယဆိုပြီး နိကာယ(၅)မျိုး ရှိတယ်၊ နိကာယ(၅)မျိုး ရှိတဲ့အထဲမှာ အင်္ဂုတ္တရနိကာယထဲမှာ ကြည့်မယ်ဆိုရင် တောထွက် ရဟန်းတွေနဲ့ ပတ်သက်ပြီး မြတ်စွာဘုရားက အခုလို ဟောထားပါတယ်၊ ဟောတဲ့အခါမှာ ပဌမသုတ် နဲ့ ဒုတိယသုတ်ဆိုပြီး (၂)သုတ်ခွဲပြီး ဟောပါတယ်၊ ပဌမသုတ် နဲ့ ဒုတိယသုတ်မှာ နံပါတ် (၄)အချက်နဲ့ နံပါတ်(၅)ချက်က အဓိပ္ပာယ် တူနေတာ တွေ့ရပါတယ်။ တောထွက်ရဟန်း(၁၀)မျိုး ================== ၁။ ဝုဍ္ဎပဗ္ဗဇိတော ဒုလ္လဘော နိပုဏော၊ တောထွက် ရဟန်းသည် သိမ်မွေ့ ဖို့ နူးညံ့ဖို့ ခက်တယ်၊ ၂။ ဝုဍ္ဎပဗ္ဗဇိတော ဒုလ္လဘော အာကပ္ပသမ္ပန္နော၊ တောထွက် ရဟန်းသည် ရဟန်းတို့၏ အသွင်အပြင် ရဟန်းတို့၏ အမူအရာ ရှိဖို့ ခက်တယ်၊ သင်္ကန်းဝတ်ပုံ နေပုံ ထိုင်ပုံ သွားလာပုံက မြင်ရတဲ့သူတို့အတွက် ကြည်ညိုဖို့ ခက်တယ်၊ ၃။ ဝုဍ္ဎပဗ္ဗဇိတော ဒုလ္လဘော ဗဟုဿုတော၊ တောထွက် ရဟန်းသည် သီလ သမာဓိ ပညာ အကြောင်း သမထ ဝိပဿနာ အကြောင်းနဲ့ ပတ်သက်ပြီး အကြားအမြင် ဗဟုဿုတ ရှိဖို့ ခက်တယ်၊ ၄။ ဝုဍ္ဎပဗ္ဗဇိတော ဒုလ္လဘော ဓမ္မကထိကော၊ တောထွက် ရဟန်းသည် သီလ သမာဓိ ပညာ အကြောင်း သမထ ဝိပဿနာ အကြောင်းတွေကို ဒကာ ဒကာမ ရှင် ရဟန်း ဖြစ်သူများအတွက် နားလည်အောင် ဟောနိုင်ဖို့ ခက်တယ်၊ ၅။ ဝုဍ္ဎပဗ္ဗဇိတော ဒုလ္လဘော ဝိနယဓရော၊ တောထွက် ရဟန်းသည် ဝိနည်း သိက္ခာပုဒ် စည်းကမ်းတွေကို လေ့လာဖို့ မှတ်သားဖို့ လိုက်နာဖို့ ခက်တယ်။ ***************************************** ၁။ ဒုလ္လဘော ဝုဍ္ဎပဗ္ဗဇိတော သုဝစော၊ တောထွက် ရဟန်းသည် သီလ သမာဓိ ပညာ အကျင့်နဲ့ ပြောလို့ ဆိုလို့ ဆုံးမလို့ မလွယ်ဘူး၊ ၃။ ဝုဍ္ဎပဗ္ဗဇိတော ဒုလ္လဘော သုဂ္ဂဟိတဂ္ဂါဟီ၊ တောထွက် ရဟန်းသည် ကောင်းမွန်တဲ့ သီလ သမာဓိ အယူတို့ဖြင့် နေထိုင် သွားလာနိုင်ဖို့ မလွယ်ဘူး၊ ၄။ ဝုဍ္ဎပဗ္ဗဇိတော ဒုလ္လဘော ပဒက္ခိဏဂ္ဂါဟီ၊ တောထွက် ရဟန်းသည် လမ်းညွှန်မှု ဆုံးမမှုတို့ကို ရိုသေသေ လေးလေးစားစားနဲ့ ယူဆနိုင်ဖို့ လက်ခံနိုင်ဖို့ မလွယ်ဘူး၊ ၄။ ဝုဍ္ဎပဗ္ဗဇိတော ဒုလ္လဘော ဓမ္မကထိကော၊ တောထွက် ရဟန်းသည် သီလ သမာဓိ ပညာ အကြောင်း သမထ ဝိပဿနာ အကြောင်းတွေကို ဒကာ ဒကာမ ရှင် ရဟန်း ဖြစ်သူများအတွက် နားလည်အောင် ဟောနိုင်ဖို့ မလွယ်ဘူး၊ ၅။ ဝုဍ္ဎပဗ္ဗဇိတော ဒုလ္လဘော ဝိနယဓရော၊ တောထွက် ရဟန်းသည် ဝိနည်း သိက္ခာပုဒ် စည်းကမ်းတွေကို လေ့လာဖို့ မှတ်သားဖို့ လိုက်နာဖို့ မလွယ်ဘူး။ ================================= သုတ္တန်ပိဋကတ်၊ အင်္ဂုတ္တရနိကာယ၊ ပဉ္စကနိပါတပါဠိ၊ နီရဏဝဂ်၊ ပဌမဝုဍ္ဎပဗ္ဗဇိတသုတ်၊ ဒုတိယဝုဍ္ဎပဗ္ဗဇိတသုတ်။ (သာမဏေကျော် လင်္ကာရ စာမေးပွဲ ဒုတိယအဆင့် ပြဌာန်း ကျမ်းစာ) - @bluebird5033