في علاقات بتبدأ ساي كده، من غير ترتيب ومن غير نية واضحة، تلقى روحك دخلت فيها خطوة خطوة لحدي ما بقيت جزء من يومك وما حسّيت. لا في يوم قلت دي قصة حب، ولا في يوم اتفقتوا إنكم أصحاب وبس، لكن في حاجة بينكم أكبر من أي وصف وأصعب من أي تعريف. علاقة بدون مُسمّى، العلاقة البتخلي أول حاجة تعملها الصباح إنك تفتش على رسالتها، وآخر حاجة قبل النوم إنك تشوف لو كانت مرت من هنا ولا لا. العلاقة البتخليك تفرح عشانها من قلبك، وتحزن عشان زعلها كأنو زعلك إنت. بتعرف تفاصيل يومها الصغيرة، الحاجات البتضحكها والحاجات البتضايقها، وبتحفظ كلامها العابر أكتر من أي كلام مهم. وكل مرة تقول لنفسك: "أنا بالنسبة ليها شنو؟" تلقى السؤال أكبر من الإجابة. الغريب في العلاقات دي إنو المشاعر فيها بتكبر كل يوم، لكن الكلام بفضل واقف في محلو. كل واحد خايف يقول الحقيقة، وخايف يسمعها. مرات الخوف من الفقد بخلي الناس تسكت، وتفضل عايشة في منطقة رمادية، لا هي قرب كامل ولا هي بعد كامل. تلقى نفسك بتغير على شخص ما عندك حق تغير عليهو، وبتشتاق لشخص ما عندك حق تعاتبو على الغياب. ولو زعل منك، يوجعك زعلو، ولو بعد شوية، تحس إنو اليوم كلّو ناقص. ومع ذلك، ما بتلقى كلمة واحدة تشرح للناس الحاصل شنو. وأصعب حاجة في العلاقة بدون مُسمّى، إنو الواحد بيكون شايل جواهو كلام كتير شديد. كلام كان داير يقولو، ومشاعر كان داير يوضحها، لكن كل مرة يرجع خطوة لورا. يمكن خوفاً من الرفض، أو خوفاً من إنو بعد الاعتراف تتغير كل الحكاية. مرات بتكونوا قريبين بصورة تخلي أي زول يشوفكم يقول أكيد في حاجة بينكم، لكن إنتو ذاتكم ما قادرين تحددوا الحاجة دي شنو. ومرات بتكون المسافات بعيدة، لكن القلوب أقرب من ناس عايشين جنب بعض. العلاقة بدون مُسمّى بتتعب القلب لأنو ما فيها يقين. كل حاجة فيها احتمالات. يمكن يكون بحبك، ويمكن يكون متعود عليك. يمكن وجودك مهم عندو، ويمكن إنت فاهم الحكاية بصورة مختلفة. ووسط كل الـ "يمكن"، بتضيع راحة القلب. لكن برضو، ما بنقدر ننكر إنو بعض العلاقات دي بتكون من أجمل الحاجات البتمر علينا. لأنها جات من غير تكلف، ومن غير أقنعة، ومن غير حسابات. جات بصورة بسيطة، وكبرت جوة الروح لحدي ما بقت جزء من تفاصيل الحياة. وفي النهاية، المشكلة ما في إنو العلاقة ما عندها اسم. المشكلة لمن المشاعر تكبر أكتر من المساحة المسموح ليها. لمن القلب يبقى منتظر حاجة ما عارف إذا كانت جاية ولا لا. ولمن الإنسان يلقى نفسو متعلق بشخص ما قادر يقرب منو زيادة، وما قادر يبتعد منو نهائي. عشان كده، أحياناً أوضح كلمة بتكون أجمل من ألف شعور مخفي. لأنو القلوب ما بتتعب من الحب، القلوب بتتعب من الحيرة. وبتتعب من الانتظار الطويل، ومن العلاقات البتعيش سنين كاملة بدون مُسمّى، بينما كل حاجة فيها بتقول إنو كان لازم يكون ليها اسم من زمان. مقــ⁷ــداد #خواطر_مقداد #خواطر #سودانيز_تيك_توك_مشاهير_السودان🇸🇩 #سودانيز_تيك_توك_مشاهير_السودان #جخو،الشغل،دا،يا،عالم،➕_❤_📝 - @megdadahmed22