ကျနော်နဲ့ မာယာတို့ ကွာရှင်းပြီး ၂ လအကြာမှာ မာယာကို မမျှော်လင့်တဲ့နေရာမှာ ရုတ်တရက်တွေ့ရတော့ ကျနော် အတော်တုန်လှုပ်အံ့အားသင့်သွားတယ်။ ဒီလိုနေရာမှာ မာယာကိုတွေ့ရမယ်လို့ ဘယ်လိုမှ ထင်မထားမိဘူး.. ✨✨✨ ကျွန်တော်နဲ့မာယာ အိမ်ထောင်သက်၅နှစ်ရှိပါပြီ အရာအားလုံး တည်တည်ငြိမ်ငြိမ်ပါပဲ။ ကျနော့်ဇနီး မာယာဟာ အလွန်နူးညံ့သိမ်မွေ့ပြီး ကြင်နာတတ်သူတယောက်ပါ။ ထူးထူးခြားခြားဆွဲဆောင်မှု မရှိပေမဲ့ သူမ-မျက်နှာကို မြင်ရတိုင်း အမြဲငြိမ်းချမ်း‌အေးမျှစေတယ် အိမ်ထောင်သက် ၃ နှစ်အကြာမှာ မာယာ ကိုယ်ဝန် ၂ ကြိမ်ပျက်ကျပြီးနောက် အခြေအနေအရပ်ရပ်ဟာ ပြောင်းလဲလာတယ်။ မာယာဟာ တိတ်ဆိတ်ပြီး ခြောက်သွေ့လာတယ်။ မာယာကို မြင်တွေ့ရတာ ကျနော် ပင်ပမ်းလာတယ်။ အလုပ်ကနေ အိမ်ပြန်ရောက်လာတိုင်း သက်ပြင်းချသံနဲ့ အေးစက်စက်မျက်နှာကိုပဲ မြင်နေရတယ်။ ကျနော် အိမ်ပြန် နောက်ကျလာတယ်။ မာယာ့ကို စကားပြောဖို့ အတတ်နိုင်ဆုံး ရှောင်တယ်။ ကျနော်တို့နှစ်ဦးစလုံး တယောက်ကို တယောက် ထိခိုက်နာကျင်အောင် မလုပ်ကြပေမဲ့ ရန်ပွဲတခုအပြီးမှာတော့ ကျနော် အေးအေးဆေးဆေးတည်တည်ငြိမ်ငြိမ်ပဲ ပြောလိုက်တယ် “ မာယာ - ငါတို့ ကွာရှင်းကြရအောင် “ “ ရှင် စိတ်ဆုံးဖြတ်ပြီးပြီပေါ့ ဟုတ်လား “ ကျနော် ခေါင်းညိတ်ပြလိုက်တယ်။ မာယာ ဒေါသမထွက်ဘူး မအော်ဘူး မငိုဘူး။ ခေါင်းညိတ်သဘောတူတယ် ကွာရှင်းပြီးတဲ့နောက် ကျနော် အခန်းတခန်းမှာ ငှါးနေတယ်။ မနက်ပိုင်း အလုပ်သွားပြီး ညဖက်မှာတော့ တီဗီကြည့်ရင် ကြည့် မဟုတ်ရင်အရက်သောက်ပြီး အချိန်ဖြုန်းနေမိတယ်။ ထမင်းချက်ပေးမယ့်သူ မရှိ၊ နှုတ်ဆက်သံ မရှိ၊ စကားပြောဖေါ် မရှ်ိ။ အိမ္မက်ထဲ မာယာ လို့ခေါ်ရင်း လန့်နိုးလာတဲ့ရက်တွေလည်း မနည်းဘူး။ ဒီလိုနဲ့ ဖြတ်သန်းလာခဲ့တာ ၂ လကြာခဲ့ပြီ။ အဲဒီနေ့ မိတ်ဆွေတယောက် ဆေးရုံတက်နေတယ် ဆိုလို့ ဆေးရုံကိုလာခဲ့တယ်။ ဆေးရုံအခန်းတခုရဲ့ ဒေါင့်ကုတင်မှာ ကျနော့်မျက်လုံးထဲ တစုံတယောက်ကို လှမ်းမြင်လိုက်တယ်လို့ခံစားလိုက်ရတယ်။ ဟုတ်တယ် - “မာယာ”သူမ ကျနော် အတော်တုန်လှုပ်သွားတယ်။ “ မာယာ “ “ ရှင်” “ မင်း ဘာဖြစ်နေလဲ မာယာ “ မာယာကခပ်တိုးတိုးအသံနဲ့ “ ကျန်းမာရေးစစ်ဆေးတာပါ” “ မင်း ငါ့ကို ဘာမှဖုံးကွယ်ထားစရာ မလိုဘူး။ မင်းကို ဒီလိုအခြေအနေမျိုးနဲ့ မြင်တွေ့ရတာ ငါ ဘယ်လိုမှ မယုံနိုင်ဘူး” “ ကျမ သားအိမ်ကင်ဆာ ဖြစ်နေတယ်” ကျနော် တုန်လှုပ်သွားတယ်။ တချိန်က ညတိုင်း ကျနော့်ရင်ခွင်ထဲ အိပ်ခဲ့တဲ့ ဇနီး၊ လွန်ခဲ့တဲ့လတွေက ကျနော့်ကို လိမ်လည်ဖုံးကွယ်ပြီး တိတ်တိတ်လေး ကြိတ်ခံစားနေရှာတာ။ “ ဘာလို့ ငါ့ကို မပြောပြခဲ့တာလဲ “ “ ရှင့်အပေါ် ဝန်ထုပ်ဝန်ပိုး မဖြစ်စေချင်လို့ …” ကျနော် ပြောစရာစကားလုံး မရှိတော့ပြီ “ မာယာ ငါ့ကို မင်းနားမှာ လာနေခွင့်ပေးနော်” “ ရှင် ကျမကို သနားနေတာလား “ “မဟုတ်ပါဘူး၊ မင်းကို ငါတကယ်ချစ်ပါတယ် “ ကျနော် မာယာကို ကူစောင့်ကြည့်ဖို့ ခွင့်ရက်ရှည် ယူလိုက်တယ်။ ကျနော် ဘာလို့ဒီလိုလုပ်နေတာလဲ ? သေချာမသိဘူး။ ခုထိ ချစ်နေတုန်းပဲ ဖြစ်မယ်။ တရက် မာယာ ရုတ်တရက်ပြောလိုက်တယ်။ “ရှင် သတိထားမိလား၊ ကျမတို့ မကွာရှင်းကတည်းက ကျမနေမကောင်းဖြစ်နေတယ် ဆိုတာ ကျမသိနေပြီ “ “ ဘာလို့ ငါ့ကိုမပြောခဲ့တာလဲ “ “ ရှင့်ကို ပြောရင် ရှင် တာဝန်ယူလိမ့်မယ် ဆိုတာ ကျမ သိတယ်။ မေတ္တာမရှိပဲ အဲလိုတာဝန်မယူစေချင်ဘူး။ ကျမရဲ့ဒုက္ခတွေနဲ့ ရှင့်ကို ချည်နှောင်မထားချင်ဘူး၊ ရှင့်ကို လွတ်လွတ်လပ်လပ်ဖြစ်စေချင်တယ် “ ကျနော် ရင်ထဲ ရှိုက်ကနဲဖြစ်သွားပြီး မျက်ရည်တွေ လှိမ့်စီးကျလာတယ်။ မာယာ ကျနော့်ကို ပြုံးပြီးကြည့်နေတယ်။ ဟုတ်တယ်၊ အဲဒီတုန်းက ကျနော် မာယာ့ကို ဝန်ထုပ်ဝန်ပိုးတခု လို့ထင်ခဲ့မိတယ် မာယာ ဖုံးကွယ်ထားခဲ့သမျှ— ကိုယ်ဝန်ပျက်ကျခြင်း သူမရဲ့ ရောဂါ သူမရဲ့ ထွက်ခွါဖို့ ဆုံးဖြတ်ချက်— အားလုံးဟာ ကျနော့်ကို နာကျင်‌စေခဲ့တယ်။ မာယာက ကျနော့်ထက် အဆပေါင်းများစွာ ပိုနာကျင်ခဲ့လိမ့်မယ် ထင်ပါတယ်။။ တပတ်အကြာမှာ ဆရာဝန်က “မာယာ့အခြေအနေက ပိုဆိုးလာတယ် လက်လျော့ကြမလား”တဲ့ ဘဝမှာ ပထမဆုံးအကြိမ်အဖြစ် တစုံတယောက်ကို ဆုံးရှုံးရမှာ ကြောက်လာတယ်။ အဲဒီည မာယာ့ဘေးမှာ ထိုင်ပြီး မာယာ့လက်ကလေးဆုပ်ကိုင်ရင်းတီးတိုးပြောလိုက်တယ် - “ ဖြစ်နိုင်မယ်ဆိုရင်… ငါ မင်းကို နောက်တကြိမ် လက်ထပ်ချင်တယ်၊ ငါ မင်းကို မနက်တိုင်း မြင်ချင်တယ်၊ မင်း စိတ်မရှည်တော့တဲ့အထိ မင်းလက်ကို ကိုင်ထားချင်တယ်။ ခမ်းနားဖို့ မလိုပါဘူး— မင်းအသက်ရှင်သရွေ့ အတူတူနေချင်တယ် ” မာယာဟာ ဖြည်းဖြည်းချင်း ကျနော့်ပါးကို ထိလိုက်ပြီး ” ကျမ သဘောတူတယ် “ နောက်ရက်မှာ ဆေးရုံအခန်းထဲမှာပဲ ရိုးရှင်းတဲ့မင်္ဂလာပွဲလေးတခု ကျင်းပခဲ့တယ်- သူနာပြုတယောက်က ပန်းစည်း လက်ဆောင်ယူလာတယ်။ သီချင်းမရှိ၊ ဧည့်သည်မရှိ၊ အကြောဆေးစက်အသံနဲ့ တီးတိုးကတိတွေပဲ ရှိတယ်။ ၃ လအကြာမှာ မာယာ ကျနော့်လက်မောင်းပေါ်မှာ ဆုံးပါးသွားတယ်။ အဲဒီအချိန်လေးအတွင်း ကျနော်တို့ ဇနီးမောင်နှံလို ပြန်နေထိုင်ခဲ့တယ်။ ဟောင်းနွမ်းနေတဲ့ မင်္ဂလာဓါတ်ပုံတွေ ဒီနေ့အထိ ကျနော် တယုတယသိမ်းထားတယ်။ အသက်ကိုစွန့်တဲ့အထိ ကျနော့်ကို တိတ်တိတ်လေးချစ်သွားခဲ့တဲ့ မာယာရဲ့ သန့်ရှင်းဖြူစင်တဲ့ အမှတ်တရလေးတွေပေါ့ …. တခါတလေ “ ကျမကို ချစ်ပေးတဲ့အတွက် ကျေးဇူးတင်ပါတယ် “ ဆိုတဲ့မာယာ့စကားသံလေး တီးတိုးကြားနေရဆဲပါ #crdစာသား #ပုံ - @cendy5.2.2001