عم عبده راجل بسيط من قرية الرملة التابعة لمدينة بنها. بيشتغل كهربائي. من يومين، فكّر يخرّج بناته وأحفاده يشمّوا هوا على كورنيش النيل في بنها. أسرة مصرية بسيطة حبّت تغيّر جو وتتمشّى عالنيل؛ ودي فسحة الغلابة في مصر كلها.. لكن اللي حصل إن عم عبده خرج يفسّح بناته ومارجعش. حفيدته شافت رجالة جنبهم بيتحرشوا ببنات، فقالت لوالدتها تبعد عنهم، فواحد من المجرمين اتدخّل، وشدّوا في الكلام فقلع حزامه عشان يضربها. عم عبده أخد باله، وبدأ يعاتبهم ويقولهم عيب كده، كان فاكر إن كونه جِدّ، بيعاتب شباب من دور ولاده، هايأثّر فيهم أو يحرجهم، لكنهم بدؤوا الاعتداء عليه، بحزام وسكاكين.. خسر حياته في وقتها، ولما ولاده وصلوا المكان بعد الحادثة، المجرمين بدؤوا يضربوهم هم كمان، وبيتعالجوا دلوقتي من إصابات خطيرة. ليه التحرش يكون سبب في إن بناته يشوفوه بيتـ.ـقتل قدامهم؟ بنته بتحكي في لقاء مصوّر إنها شافته وهو بيمـ.ـوت على ممشى الكورنيش، مصاب في راسه وبطنه وكتفه بضربات السكاكين.. هل ده منطقي؟ أسرة تخرج تشم هوا فتتعرض لجريمة زي دي؟ في الفيديو واضح إن الأسرة بسيطة ولبسها بسيط جداً، عشان الناس اللي بتربط التحرش باللبس، مع إن كل واحدة حرة في لبسها، لكن دي أسرة لبسها زي أهل الريف البسطاء، اتعرضوا لجريمة بشعة في وقت كانوا خارجين يشمّوا هوا. صحيح إن المجرمين اتقبض عليهم، وهايتحاكموا، لكن مين هايعوّض عم عبده وأسرته عن حرمانهم من عائل وجِدّ حنيّن، كان حلمه يفرح بحفيداته وأحفاده؟ مهم جداً عشان الجرايم دي تنتهي، مقاومة التحرش وعدم التطبيع معاه، وعدم تبريره بأي شكل. الرحمة لعم عبده، والدعم لأسرته، والعقاب الرادع للمجرمين. - @_nadahatem__