أنت متخيل لما الحرفيين وأصحاب المحلات اللي أجازتهم الأسبوعية بتبقى يوم الأحد يطلبوا من التليفزيون المصري تغيير موعد إذاعة برنامج ما بحيث يتم إذاعته يوم أجازتهم فـ يقدروا يتابعوه ويستمتعوا بفقراته.... وبالفعل وبعد إلحاح شديد يرضخ التليفزيون المصري لطلبات وخطابات الحرفيين وأصحاب المحلات دول، ويقوم بتغيير يوم عرض هذا البرنامج ليوم الأحد من كل أسبوع بدلا من يوم الثلاثاء... احنا هنا مش بنتكلم عن أي برنامج لكننا بنتكلم عن واحد من أهم برامج التليفزيون المصري عبر تاريخه، برنامج كان سابق عصره وكان الأول من نوعه، بنتكلم عن أول برنامج منوعات ثقافي تسجيلي عبر تاريخ الميديا المصرية، كان بيسمح للمشاهد المصري بالحصول على معلومات وتحقيق معرفة والوصول لأفكار لم تكن متاحة قبله على الشاشة... برنامج كان بياخدنا كل أسبوع في جولة حول العالم من غير ما نتحرك من بيوتنا... مرة في وسط الإسكيمو، مرة في قلب محميات كينيا، مرة وسط الهنود الحمر، ومرة في شوارع باريس وضواحيها... وسط بساطة الحياة المصرية في التوقيت ده، كان برنامج "جولة الكاميرا" زي شباك صغير مفتوح على الدنيا، بيعدّي منه نسيم المعرفة والدهشة لبسطاء المصريين. اللي بيحب "الدحيح" أو بيتابع "عشوائيات"، لازم يعرف إن "جولة الكاميرا" كان النسخة الأولى من نفس الحكاية... بس اتقال في التمانينات، وبصوت ست مصرية هادي ووقور، لا بتصرخ ولا بتتشنج ولا بتتنطط.. ست مصرية إسمها "هند أبو السعود"... هند أبو السعود، بنت السويس اللي دخلت كلية الآداب قسم الأدب الإنجليزي وهي عندها 15 سنة بس، وبعد شغل صحفي في وكالة الشرق الأوسط ومع ظهورها على شاشة ماسبيرو، كانت أول سيدة تشتغل كمخرجة لنشرة الأخبار، وبعد كده انتقلت لميدان المنوعات، وابتكرت "جولة الكاميرا" كأول برنامج ثقافي إنساني قدر يختصر العالم كله في 45 دقيقة. في زمن الزحمة والتكالب على الميكروفونات بقى نادر جدا تشوف استقامات زي دي. إعلامية، مخرجة، بنت بلد، بنت عيلة، بنت أفكار، بنت كرامة....! #منقوله #ابوالـــAزم_بتاع_قصص - @eslamaboelazm5