@vatandosh_koreya: ☕️ Starbucks boykot sababli Koreyadagi 2 mingdan ortiq filialini yopdi Starbucks Korea 2 mingdan ortiq filialini vaqtincha yopishga majbur bo‘ldi. Bunga may oyida o‘tkazilgan "Tank Day" nomli reklama kampaniyasi sabab bo‘ldi. Gap shundaki, kompaniya "SS Tank" deb nomlangan termoslarni reklama qilish uchun 18-may sanasini tanlagan edi. Ammo aynan shu sana Janubiy Koreya tarixidagi eng fojeali voqealardan biri — 1980-yilgi Gvangju qo‘zg‘oloni va uning qonli bostirilishi yodga olinadigan kun hisoblanadi. O‘sha paytda harbiy hukumat demokratiya tarafdorlari namoyishlarini tanklar va qo‘shinlar yordamida bostirgan, yuzlab odamlar halok bo‘lgan. Starbucks esa "tank" so‘zini shunchaki katta hajmli termos mahsulotlari nomi sifatida ishlatmoqchi bo‘lgan. Biroq kampaniyaning nomi, sanasi va reklamadagi ayrim iboralar koreyaliklar tomonidan Gvangju fojiasiga ishora sifatida qabul qilindi. Ayrim shiorlar hatto 1987-yilda qiynoqqa solinib o‘ldirilgan talaba faol Pak Jong Chol bilan bog‘liq tarixiy voqealarni eslatgani uchun tanqid ostiga olindi. Natijada ijtimoiy tarmoqlarda boykot chaqiriqlari boshlandi. Mijozlar Starbucks ilovalarini o‘chirib tashladi, mahsulotlarni qaytarishni talab qildi va kompaniyaga qarshi namoyishlar o‘tkazildi. Ayrim davlat idoralari ham Starbucks bilan hamkorlikni to‘xtatdi. Mojaro ortidan Starbucks Korea rahbari lavozimidan bo‘shatildi, kompaniya bir necha bor uzr so‘radi, Shinsegae Group rahbari Chon Yon Jin omma oldida bosh egib kechirim so‘radi. Savdo hajmi keskin pasayib ketdi. Vaziyatni yumshatish maqsadida Starbucks Korea 22-iyun kuni mamlakat bo‘ylab 2 mingdan ortiq filialini yopib, barcha xodimlar uchun Janubiy Koreya tarixi va ijtimoiy sezgirlik mavzusida majburiy o‘quv mashg‘ulotlari tashkil etdi. Bu voqea Janubiy Koreyada tarixiy xotira va demokratiya uchun kurash mavzusi hanuz juda sezgir ekanini yana bir bor ko‘rsatdi. @vatandosh_koreya

Vatandosh KOREYA

Open In TikTok:

Region: UZ

Wednesday 24 June 2026 05:33:58 GMT