@o.lk19: تعال خلينه نسولف بـ مهزلة اللطم اللي دتصير ببعض المجالس بمحرم، لأن السالفة صدك زادت عن حدها, أول البارحة جنت كاعدة وأفكر، هو الحسين (عليه السلام) وثورته وقضيته ليش صارت؟ مو علمود القيم، والمبادئ، والرسالة الإنسانية، وعلمود نكون أحرار بدنيانا؟ زين، من تجي انت وتشوف اللطم اللي هو المفروض تعبير عن حزن ومواساة وثورة نفسية ضد الظلم، يتحول إلى حفلة ديسكو أو مهرجان رقص، هنا لازم نكول أكو خلل جبير!،، أولاً: الإيقاعات والردّادي الحسينية؛ يعني تروح للمجلس تسمع طور، تصفن تكول هذا وين سامعه؟ تالي تتذكر هذا لحن أغنية لناسي عجرم لو حسام الرسام! الإيقاع صار سريع لدرجة مو لطم هذا، هذا صار جمباز، الرواديد (البعض منهم طبعاً) صاروا يدورون تريند ومقاطع للتيك توك، صرنا نسمع مؤثرات صوتية وفلاتر تخلي الصوت كأنه طالع من ملهى مو من منبر شريف ثانياً: اللوكية، وعرض الأزياء؛ المفروض محرم هو شهر الزهد والمواساة، هسه تباوع بالطامة، صار الموضوع استعراض القمصان المخضرة، والشعر المصفف بآخر صيحة، واللطمة اللي تصير بطريقة استعراضية علمود الكاميرا تلتقطه يعني تشوفهم يكول دولة جايين لـ فوتوسيشن مو جايين يلطمون على مصيبة هزّت السماوات. ثالثاً: غياب الفكرة والوعي؛ أنت من تلطم وتطبر وتهوس، تدري الحسين شيريد منك؟ الحسين يريدك ما تظلم، ما تاكل حرام، ما تكذب، تنصر المظلوم. بس المهزلة وين؟ تلكي الواحد يلطم ليل مع نهار ويمدح نفسه، وثاني يوم الصبح بدوامه يرتشي، لو يظلم عائلته، لو يتجاوز على حقوق الناس بالشارع. هذا اللطم صار مجرد تفريغ طاقة وتسليّة، ومفرغ تماماً من الوعي. المنبر واللطم الحسيني إرث وتاريخ وبي هيبة تهز الجبال، من نحوله إلى مسرح للمهارز والصرعات الغريبة بحجة التجديد، إحنا دهين القضية من حيث نشعر أو لا نشعر. الحسين ما محتاج لطم، الحسين محتاج أوادم تمشي على دربه. #تابعوني_رح_نزل_شي_جديد #لايك_متابعه_حركة_الاكسبلور❤🦋explorer #foryoupage

أفَـاطـم ✨

Open In TikTok:

Region: IQ

Wednesday 24 June 2026 13:32:25 GMT