اجب نہ اِنت اجب نہ اِنت کہ زنتکاریں مردے ءِ تلب تئی وڑیں مُلور ءُ لاگریں سیاسی جاھلے بہ بیت کہ چہ وتا یکیم نہ اِنت نہ زیبناکیں مردمانی لُک بیتگیں لڑ ءَ شمار بیت نہ مالداریں مردکارے ءِ جنکیں چُک گُشت کنت وتا نہ اینکدر توانگر اِنت کہ چار گپ جَت بکنت نہ اینچوک ماڈرن کہ گردن ءَ گُشان ءِ ٹَنگگ ءَ پَشل مہ بیت نہ دلکش ءُ خمار بَکشیں وشبوے ءِ بانک اِنت نہ دیدگاں اَسر کنوکیں آزاھانی اسراتی ءِ سرا تُشے اوں پَھر بَست کنت وتی نہ زانتکار بئیگ ءِ شیگان ءَ کَلھے گُور جَتہ ءُ نئیکہ شاھدربر ءِ جِنک پَرستیں مردمانی لَلکے زَد ءَ وتارا گِندگ اِنت کہ چہ وتی کساس ءَ گیش سرپدی ءِ جہد ءَ چیر ءُ سر اے جاھلیں سیاسی زال ءَ اے سما نہ اِنت کہ زندگی ءُ وھد ءِ گوازی ءِ میان ءَ چنکدر ابیتکیں جاورانی پاد برمش اِش کنگ کپ ایت چنکدر ھوس جَتیں ھیال مردم ءَ چہ منزل ءِ نشان ءَ گار کنت بَرے ترا یک ھاجتے توار کنت بَرے اے زندگی ءِ تھلیں تام ایمنی ءِ واب ءَ چہ تئی زیبناکیں دستاں پچ گِر اَنت بَرے ترا تئی تب ءِ ھَڑکھے اوں اے زمانگ ءِ زَد ءَ رَسینت کنت بَرے تو نوک بیتگین یک میتگے ءِ کوھن ءُ جَنڈیں لیکہاں گوں مان اڈے بَرے پہ تو تئی بدن ازاب بیت بَرے تو زالبول ءِ آجوئی ءِ جیڑھ ءَ گوں چیر ءُ سر کوڈانبگیں سیاسی گپ جنوکیں مردمانی سِلیں نیت ءِ شکار بئے بَرے تو راجی جُنز ءِ ڈنی زیبناکی ءِ خُمار ءَ گار بئے اجب نہ اِنت کہ اے میان ءَ وھدے پہ ترا زمین، زبان، زندگی ءُ تئی بدن تمامیں جیڑھ اَنت تو زانگ ءَ نھے کہ ایوکی چہ درد بَکشیں دراھیں جیڑھاں چہ گیشتر توانگر اِنت ترا تُشے سما نہ اِنت کہ مھکمیں زمین دوستے ءَ اوں تئی ودار ءِ بار پُروش دات کنت تو انگت چم ءِ وت ابیتکی ءِ گِلگ نہ دیستگ اَنت تو نیزگاریں مَرد ءِ گَماں گوں دیم پہ دیم بئیگ ءِ اے اِلت ءَ چہ آجو ءِ ترا پہ تژن زندگی ءِ بار کوپگ ءَ نہ اِنت چہ تو کس ءَ اوں چہ تئی وجود ءَ مَستریں اُمیت دامُن ءَ نہ بَستگاں تئی رنج انگتہ چہ تئی وَس ءَ چہ دَر نہ رَستگاں مناں کہ اے تمامیں جیڑھانی دراھیں ھیرت ھیرتیں دروشمانی گَم پِر اِنت من انگت زانگ ءَ نھاں کہ پہ مناں تئی ھستی ءِ کجام رنگ چہ ترا اوں گیش جلوانک تِر اِنت مناں چہ تئی اے دراھیں نُکساں گیشتر کجام نُکس ءِ جلواھ ءَ اَسر کُتہ من چون چہ وتی اے وت پَرستی ءِ اَزیمیں پَہر ءَ سِستگاں ءُ تئی وَڈیں یک لاگر ءُ سیاسی جاھلے ءِ زیبناکیں لوٹ ءَ بَستگاں تو انگت زانگ ءَ نھے کہ انکلاب آشنائیں مردے ءَ کجا کجا سپر کُتہ وتارا پہ تو سَر کُتہ آزر مراد - @bilalmurad56