Gacalkaygiyoow anigoo ka xun oo aad ugu xun baan caawa waxaan kuu qorayaa fariintan Waqtigan waa waqtigii iiguga kaa dambeyay waana halka aan ku aasi doono riyadii aan kaa lahaa. Maanta uma qorayo fariintan inaan kugu soo celiyo umana qorayo inaan kugu eedeenayo balse waxaan u qorayaa inaan naftayda xoriyad la rabo. Gacalle waxaan go'aansaday inaan raaco doonistaada ah inaad baxdo. Waxaan kugu daayay dunidii aad dooratay adigoo og inaan anigu ku jirin. Ha u malayn inaan ku nacay markaan ku sii daayay ee waxaan ogaaday inaan ku filnayn qof raba inuu baxo. Ha u malayn inaanan kuu damqanayn, ha u malayn inaanan ku xiisayn doonin ama jacaylkaagii uu habeen qura ku dhammaaday. Waan ku jeclaa, waan ku jeclahay, waanan ku jeclaan doonaa laakiin kuma soo raadin doono. Xataa haddii ay xasuustaadu waran igu tahay marnaba dib kuuma soo raadin doono. Ma rabo inaan noqdo bukaankaagii aan weligii bogsan. Waxaan doortay inaan ku dhex dhinto nabarkayga halkii aan ku soo raadin lahaa adigoo aan dhibkayga dareemayn. Markaas maxaa iigu jira inaan ku daba joogo dunida aad la’aantay dooratay? Igu damaashad nolosha cusub ee dooratay adigoon aniga igu dhex arkayn. Igu raaxayso dunidaas bilaa aniga ah. Waxaan kuu rajaynayaa inaad noqoto qof hormarkii lagu farxo, inaad hesho wax kasta oo aad moodaysay inaanan ku siin karin. U noqo qofka cusub ee aad heli doonto si ka fiican sidii aad aniga ii ahayd. U dhawr qofkaas sidii boqorad oo kale dushana ku sid oo ha u oggolaan in dhibic ilmo ahi ka soo dhacdo waayo anigaa og qadhaadhka ay leedahay in qof aad jeceshahay uu ku dayaco. Hubaal wanaaggaaga waan sheegi doonaa oo hadal xun waligay ku oran maayo. Qof kasta oo aan la kulmo waxaan u sheegi doonaa inaad ahayd qofkii ugu wanaagsanaa ee aan abid la kulmo, laakiin noloshaada dib ugu soo noqon maayo. Ma rabo inaan noqdo qof kaaga codsada jacayl aad iga bakhayshay. Waxaan kugu macsalaameeyey duco iyo wanaag ee hakuu qurxiyo Rabbiga dunidaas aad dooratay. Ugu dambayn calafka Rabbi baa qornaaye gacalahaygiyoow, ha u ciidayn qofka dambe ee aad la kulmi doonto sidii aad ii camalaysay. Ha u dhadhansiin qadhaadhka aan anigu u dhimanayo. Ha ka dhigin qof kuu ooman haddana aad u diidayso akjoogaga. Nabad gelyo korkaaga ha ahaato. Waxaan kugu daayey gacanta Alle anigoo la tiicaya xanuunkayga, balse kuu rajaynaya inaad adigu nabad kula noolaato dunidaada cusub. Nabad gelyo gacalahaygoow ❤️ - @guddoondahabo