@gx.050: Xaricdə təhsil sahəsində fəaliyyət göstərən AID GROUP şirkətinin mətbuat xidmətinin rəhbəri vəzifəsində çalışan jurnalist Peyman Sadıqovun şirkətdən ayrılması diqqət çəkən hadisələrdən biri olub. Uzun illər media sahəsində fəaliyyət göstərən jurnalistin əməkdaşlığa son verməsi ilə bağlı şirkət tərəfindən rəsmi səbəb açıqlanmayıb. Elə bu məqam müxtəlif sualların yaranmasına səbəb olub. Gundemxeber.com-un redaksiyasına daxil olan çoxsaylı müraciətlərdə AID GROUP-un fəaliyyəti ilə bağlı narazılıqlar ifadə olunur. Şikayətçilər iddia edirlər ki, xaricdə təhsil proqramları üçün əvvəlcədən ödəniş etsələr də, onlara vəd olunan xidmətlər tam şəkildə göstərilməyib. Bəzi valideynlərin sözlərinə görə, şirkət tərəfindən verilən müddətlər başa çatsa da, nə təhsil prosesi yekunlaşdırılıb, nə də ödənilmiş vəsait geri qaytarılıb. Müraciət müəllifləri bildirirlər ki, dəfələrlə şirkətlə əlaqə saxlamağa çalışsalar da, problemlərinin həlli istiqamətində konkret nəticə əldə edə bilməyiblər. Onların sözlərinə görə, bu səbəbdən aidiyyəti dövlət qurumlarına müraciət etməyə hazırlaşırlar. Məhz belə bir vaxtda Peyman Sadıqovun AID GROUP-dan ayrılması müxtəlif ehtimalların irəli sürülməsinə səbəb olub. Bununla belə, redaksiyamızın əlində jurnalistin məhz şirkətlə bağlı şikayətlərə görə istefa verdiyini təsdiqləyən hər hansı rəsmi sənəd və ya açıqlama yoxdur. Bu səbəbdən həmin ehtimalı fakt kimi təqdim etmək mümkün deyil. Araşdırmamız zamanı şirkətin təsisçisi Nigar Fərhadın və AID GROUP rəhbərliyinin mövqeyini öyrənməyə cəhd göstərilib. Məqalə hazırlanarkən tərəfimizə rəsmi cavab təqdim edilməyib. Əgər şirkət rəhbərliyi, Nigar Fərhad və ya Peyman Sadıqov məsələ ilə bağlı açıqlama vermək istəsələr, onların mövqeyi heç bir dəyişiklik edilmədən dərc olunacaq. Hesab edirik ki, səsləndirilən iddiaların obyektiv araşdırılması, tərəflərin mövqeyinin dinlənilməsi və zərurət yaranacağı halda aidiyyəti qurumların məsələyə hüquqi qiymət verməsi həm vətəndaşların, həm də şirkətin maraqları baxımından vacibdir. Gundemxeber.com

GundemXeber.Az

Open In TikTok:

Region: AZ

Thursday 25 June 2026 15:11:54 GMT