Avantaj.media-nın qaynar xəttinə daxil olan müraciət əsasında şərti olaraq Nərgiz Abbasova adlandırdığımız xanım vətəndaş estetik cərrah kimi fəaliyyət göstərən Azər Əbilzadədən şikayətçi olduğunu bildirir. Şikayətçinin sözlərinə görə, Berlin Ailə və Uşaq Klinikasında ona iki dəfə estetik əməliyyat icra olunub. Nərgiz Abbasova iddia edir ki, əməliyyatların nəticəsi onu qane etməyib və bu səbəbdən həm maddi, həm də mənəvi ziyana məruz qalıb. Pasiyentin iddiasına əsasən, əməliyyatlardan sonra səhhətində problemlər yaranıb, xüsusilə burnundan mütəmadi qanaxmalar baş verir və bu hal onun gündəlik həyatına ciddi maneələr yaradır. Şikayətçi ümumilikdə təxminən 3000 manat xərc çəkdiyini bildirir. Nərgiz Abbasovanın sözlərinə görə, o, dəfələrlə ödədiyi vəsaitin geri qaytarılmasını tələb etsə də, Azər Əbilzadə onun bu müraciətlərini nəzərə almayıb. Şikayətçi iddia edir ki, sonradan həkim onun zəng və mesajlarını cavabsız qoyub, daha sonra isə onu bloklayıb. Şikayətçi bildirir ki, müxtəlif telefon nömrələrindən əlaqə yaratmağa çalışdıqdan sonra özünü yeni pasiyent kimi təqdim edib. Onun sözlərinə görə, bu zaman ona müayinə günü təyin olunub və ünvan olaraq Badam Klinikası göstərilib. Lakin Nərgiz Abbasova həmin ünvana yaxınlaşdıqda, iddiasına əsasən, Azər Əbilzadə onu tanıyıb və təhqiramiz ifadələr işlədib. Qeyd edək ki, Azərbaycan Respublikası Səhiyyə Nazirliyinin 16.01.2026-cı il tarixli 3-28/3-1-26/2026 nömrəli əmri ilə təsdiq edilmiş plastik cərrahiyyə ixtisası üzrə praktik tibb fəaliyyətinə icazə verilən həkim-mütəxəssislərin siyahısında Azər Əbilzadənin adına rast gəlinmir. İddialara görə, buna baxmayaraq o, plastik cərrah kimi fəaliyyətini davam etdirir. Bu hal onun fəaliyyətinin qanunvericiliyin tələblərinə uyğunluğu ilə bağlı ciddi suallar yaradır və aidiyyəti qurumlar tərəfindən araşdırılmalı məsələ kimi qiymətləndirilə bilər. Avantaj.media olaraq bildiririk ki, məqalədə yer alan bütün ittiham və iddialar müraciət edən vətəndaşın səsləndirdiyi fikirlərə əsaslanır və iddia xarakteri daşıyır. Redaksiya qarşı tərəfin mövqeyini dərc etməyə hazırdır və Azər Əbilzadənin cavab haqqını tanıyır. #keşfetteyizzz #baku #azərbaycan #səhiyyənnazirliyi #keşfetteyizzz - @avantaj.media