@vvvsaldivar: May mga diyos na kayang magkaloob ng mga kaharian. May mga diyos na kayang maghandog ng karunungan, kagandahan, at kabataang hindi inuupos ng panahon. May mga diyos na kayang utusan ang hangin, patahimikin ang nagngangalit na dagat, at baguhin ang pagkakahabi ng mga bituin. Ngunit wala ni isa ang natutong pigilan ang paglisan. Kaya may isang bulaklak na muling namumukadkad sa bawat tagsibol. May isang bituing patuloy na nagbabantay sa gabi. May mga templong itinayo upang hindi tuluyang lamunin ng limot ang mga pangalan. Sapagkat kahit ang mga diyos, sa harap ng pagkawala, ay alaala lamang ang naipagkakaloob. Ngunit may isang mortal na walang itinanim na bulaklak. Wala ring templong ipinagawa, ni himalang hiningi sa langit. Isinuot lamang niya ang baluti ng isang nawala, at hinayaang ang sarili niyang puso ang maging bantayog nito. Mula noon, hindi na muling nabanggit ang kaniyang pangalan nang nag-iisa. Sa bawat pagbigkas sa ngalan niya, may isa pang pangalang marahang sumasabay- Patroclus. Tila ba pati ang kasaysayan ay natutong magluksa, at tumangging paghiwalayin ang dalawang pusong pinaglayo ng kamatayan. Kaya marahil, sa huli, higit ang naipagwagi ng isang mortal. Sapagkat nakalikha man ang mga diyos ng mga bulaklak, bituin, at mga kaharian, isang tao lamang ang nakapagturo sa daigdig ng himalang hindi kayang ipagkaloob ng langit, na may mga pag-ibig na tumatangging maalala nang magkahiwalay. #yearning #filipinopoetry #creatorsearchinsights #achillesandpatroclus #Pride

Bib

Open In TikTok:

Region: PH

Saturday 27 June 2026 09:36:28 GMT