Qarpız qabığından konfet 🍉🍬 Diqqətlə oxuyun, hər mərhələni ətraflı yazıram ki, siz də problemsiz hazırlaya biləsiniz. Əvvəlcə qarpızın yaşıl üst qabığını nazik şəkildə kəsirəm. Sonra ağ hissəni istədiyim formada doğrayıram. Qabıq qalın olmalıdır. Çox qalın doğramayın, bir az ensiz doğrayın ki, sonradan daha rahat qurusun. Doğradığım qarpız qabıqlarını soyuq suya qoyuram və hər litr suya təxminən 1 xörək qaşığı soda əlavə edirəm. Ən azı 2–3 saat sodalı suda saxlayıram. Bu üsul konfetlərin daha xırtıldayan olmasına kömək edir. Vaxt tamam olduqdan sonra sodanın tam çıxması üçün qabıqları bol su ilə yaxşıca yuyuram. Sonra üzərinə yenidən soyuq su əlavə edib 5 dəqiqə qaynadıram və həmin suyu tökürəm. Qaynanmış qabıqları tavaya əlavə edirəm. Hər 1 kq qarpız qabığı üçün 2,5 stəkan şəkər və 3 stəkan su istifadə edirəm. Hamısını qarışdırıb orta odda 30 dəqiqə bişirirəm. Sonra üzərinə vanil və mixək əlavə edib daha 5 dəqiqə bişirirəm. Daha sonra tavanı ocaqdan götürüb ən azı 2 saat kənarda saxlayıram ki, şərbəti yaxşı çəksin. Sonra yenidən orta odda bişirirəm. Təxminən 1–2 saat, şərbət demək olar ki, tam çəkilənə qədər bişirmək lazımdır. Ara-sıra qarışdırıram ki, hər tərəfi bərabər bişsin. Tavanın dibində təxminən yarım stəkan şərbət qaldıqda hazırdır. Qabıqları süzüb şərbətini ayırıram və rəngləmə mərhələsinə keçirəm. İstəyə görə qida boyası əlavə edirəm. Quru boya istifadə edirsinizsə, üzərinə bir az şərbət əlavə edib qarışdırın. Əvvəlcə 50–70°C temperaturda sobada 1–2 saat quruduram. Sonra isə açıq havada 2 gün saxlayıram. Tam quruduqdan sonra aylarla xarab olmadan saxlamaq mümkündür. İnanın, marketdə satılanlardan daha dadlı olur. Həm çox ləzzətlidir, həm də qarpız qabığını dəyərləndirmək üçün əla üsuldur. 🍉✨ - @karimoffss