داستانی ڕاپەڕینی شاری سلێمانی و ڕزگارکردنی «ئەمنە سوورەکە» لە ٨ی ئازاری ١٩٩١، وەک یەکێک لە درەوشاوەترین و کاریگەرترین وێستگەکانی مێژووی هاوچەرخی گەلی کورد دەناسرێت. ئەم ڕووداوە مێژووییە، کە تەنیا دوو ڕۆژ دوای دەستپێکردنی ڕاپەڕینی گشتیی شارەکە لە ٧ی ئازاردا گەیشتە لوتکە، بە پاڵەوانێتی و قوربانیدانی پۆلێک گەنجی چاونەترس تۆمارکرا کە مێژووی ناوچەکەیان گۆڕی. لە کاتی گەمارۆدانی ناوەندی سەرکوتکاری بەعس (ئەمنە سوورەکە)، مەفرەزەیەک لە کوڕە ئازاکانی گەڕەکی بەختیاری بە فەرماندەیی شەهید کەمالی ئایشێ قەڵەو دەستبەجێ چوونە پێشەوە. شەهید کەمال بە دۆشکا دوازدە و نیوەکەی و ورە بەرزەکەیەوە، ڕۆڵێکی سەرەکی لە هێرشبردن و خاپوورکردنی ئەو قەڵا دڕندەیەی بەعسدا گێڕا. حیزبی بەعس لەو سەردەمەدا دڵڕەقترین پیاوکوژ و ئەشکەنجەدەرانی لەو ناوەندەدا کۆکردبووەوە بۆ چاوترسێنکردنی هاووڵاتیان، بە جۆرێک بە سەدان گەنجی بێتاوان لەوێدا بێسەروشوێن کرابوون. بەهۆی ئەم دۆخە سەختەوە، تێکشکاندنی ئەو دەزگا داپلۆسێنەرە لە سلێمانی گرنگییەکی ستراتیژیی هەبوو و بوو بە هەوێن و پاڵنەری سەرەکی بۆ ڕاپەڕینی شارەکانی تری وەک هەولێر، دهۆک و دواتریش کەرکووک. دوای دوو ڕۆژ لە بەرگری و شەڕی قارەمانانە، لە ئێوارەی ٨ی ئازاردا، شەهید کەمال بەسەر پشتی ئۆتۆمبێلێکی مێک زەمینییەوە بە خۆی و دۆشکەکەیەوە بە خێرایی لە گەڕەکی سەهۆڵەکەوە بەرەو ئەمنە سوورەکە تێپەڕی بۆ یەکلاکردنەوەی شەڕەکە. دوای ماوەیەکی کەم، دەنگی هاوار و هەلهەلەی سەرکەوتن لەلایەن هاووڵاتیانەوە بەرزبووەوە و مژدەی ئازادکردنی تەواوەتی ئەمنە سوورەکە ڕاگەیەندرا. لە دەوروبەری کاتژمێر ٨ی ئێوارەی ئەو ڕۆژەدا، کۆتایی بە دێوەزمەی بەعس لە شارەکەدا هێنرا و خەندە و شادمانی گەڕایەوە سەر لێوی تەواوی دانیشتووانی سلێمانی. ئەم داستانە کەم وێنەیە کە تێیدا قارەمانانی وەک شەهید کەمالی ئایش و شەهید ئاکۆی مام ڕەزا و تەواوی شەهیدانی کوردستان گیانی خۆیان بەخشی، بە یەکێک لە پڕشنگدارترین ڕۆژەکانی مێژووی نەتەوەیی دادەنرێت. بیروەرەی و گێڕانەوەی کاک کامەران عومەر سەریع - @shahidserwanderashay