🫴 နိုင်ငံခြားကပြန်လာရင်လည်း ဒီအလုပ်ပဲပြန်လုပ်ရမှာတဲ့။ ကျွန်တော်စင်္ကာပူမလာခင်က ရွာကလူတွေပြောတာကြားခဲ့ဖူးသည်။ “နိုင်ငံခြားသွားလို့လည်း ရွာပြန်ရောက်ရင် တောင်သူပဲလုပ်ရမှာ” တဲ့။ မတူဘူးဗျ မတူဘူး။ ရွာပြန်ရောက်လို့ တောင်သူပဲပြန်လုပ်ရမယ်ဆိုရင်တောင် နိုင်ငံခြားမှာ အလုပ်လုပ်နေတဲ့နှစ်တွေအတောအတွင်း မိသားစုကို ကောင်းကောင်းထောက်ပံ့နိုင်မယ်။ ငွေကိုဘယ်လိုရှာရတယ်၊ ဘယ်လိုသည်းခံရတယ် ဆိုတာတွေကို ကောင်းကောင်းနားလည်လာပြီး personal growth အများကြီးဖြစ်လာမယ်။ ဘာသာစကားကျွမ်းကျင်လာမယ်။ မတူကွဲပြားတဲ့လူမျိုးတွေ၊ဓလေ့တွေ၊နေထိုင်ပြုမူပုံတွေ စတဲ့စတဲ့ အသစ်အဆန်းတွေကို လက်တွေ့ကျကျခံစားလာရမယ်။ ရွာပြန်ရောက်လို့ တောင်သူပြန်လုပ်ရမယ်ဆိုရင်တောင် ကမ္ဘာကြီးကို မြင်ခဲ့ဖူးတဲ့သူဖြစ်နေပြီ။ အတွေ့အကြုံတွေရခဲ့ပြီ။ ပြီးတော့ ကိုယ်တိုင်ကရော၊ကိုယ့်အိမ်ကပါ ငွေကိုသေချာ စုဆောင်းခဲ့ကြမယ်ဆိုရင် ထွက်လာတုန်းကထက် သာတဲ့အခြေအနေကိုရောက်မှာတော့အမှန်ပဲ။ 🫴ဒီလောက်ငွေတွေအများကြီးကုန်ပြီး နိုင်ငံခြားသွားမယ့်အစား ရွာမှာအရင်းအနှီးထောင်ပြီး စီးပွါးရေးလုပ်မှာပေါ့တဲ့။ ဒါဆို ရင်းဖြစ်ရဲ့လား။ တကယ်ရော လုပ်ဖြစ်မှာတဲ့လား။ မသေချာတာတွေကို ပြောနေမယ့်အစား ထောင်မြင်လို့ ရာစွန့်လိုက်တာ ပိုမကောင်းဘူးလား။ 💦 တစ်ပတ်မှာ တစ်ရက်ပဲလှရတဲ့နိုင်ငံခြားတဲ့။ ဒါဆို ကိုယ့်အိမ်မှာရော နေတိုင်းလှလို့လား။ ဘယ်ဘဝမဆို highlight တစ်ခုတည်းနဲ့ မတည်ဆောက်ထားဘူး။ ဘယ်မှာပဲနေနေ လှတဲ့နေ့တွေရှိသလို ပင်ပန်းတဲ့နေ့တွေဟာလည်း ဒွန်တွဲရှိစမြဲပဲ။ နိုင်ငံခြားမှာက တစ်ပတ်တစ်ရက်ပဲလှရရင်တောင် ၂၄နာရီမီးမပျက်၊အင်တာနက်အပြည့်ရ၊ ဘာပေါ်တာ၊ဘာလေကြောင်း၊ဘာစစ်ကြောင်းမှမရှိဘူး။ အလုပ်လုပ်ရတဲ့နေ့တွေအတွက်ကလည်း တန်တဲ့လစာရပြီးသား။ ကိုယ်တိုင်က တစ်ပတ်မှာ တစ်ရက်ပဲ လှချင်လှမယ်။ ဒါပေမဲ့ သူတို့ ပို့ပေးတဲ့ ငွေကြေးကြောင့် မြန်မာနိုင်ငံက မိသားစုတွေမှာတော့ “တစ်နှစ်ပတ်လုံး၊ လှလှပပနဲ့ အဆင်ပြေပြေ” နေနိုင်ကြတာကို မေ့ထားလို့မရပါဘူး။ 🍃 ဒါကြောင့် လူငယ်တွေကိုပြောချင်တာက ကိုယ့်မှာအရည်အချင်းတွေရှိရင် ကိုယ်နဲ့ကိုက်ညီတဲ့ အရပ်တွေဆီ ခြေလှမ်းပြီး ကြိုးစားလိုက်စမ်းပါ။ ရွာမှာပဲ ဇာတ်မြှုပ်ပြီး နေမသွားနဲ့။ ကိုယ့်အရည်အချင်းတွေကို ကမ္ဘာကြီးကိုထုတ်ပြလိုက်စမ်း။ စိန်တစ်ပွင့်ဟာ ကျောက်ပုံကြားညပ်နေရင် တန်ဖိုးရှိမှန်းမသိကြရဘူး။ နေရာမှန်ကိုရောက်မှ၊သူ့နေရာနဲ့သူရောက်မှ တန်ဖိုးအစစ်တွေ ထွက်လာနိုင်တာ။ ဒါကြောင့် “မိုးရွာတုန်း ရေခံ” ဆိုသလိုပဲ၊ ကိုယ့်မှာ ခွန်အားရှိတုန်း၊ အရွယ်ကောင်းတုန်းမှာ နိုင်ငံခြားထွက်ပြီး ငွေရှာတာ၊ အတွေ့အကြုံ ရှာတာက ရေရှည်အတွက် အကောင်းဆုံး လမ်းစတစ်ခုပါ။ ပြည်တွင်းမှာ ဘယ်လောက်ပဲ ကြိုးစားကြိုးစား နိုင်ငံရေး၊စီးပွားရေး အခြေအနေတွေကြောင့် “လက်ခမောင်းခတ်တော့ လက်မောင်းပြုတ်” ဆိုသလို ငွေစုမိဖို့ ခဲယဉ်းနေတဲ့ အချိန်မျိုးမှာ နိုင်ငံတကာ လုပ်ငန်းခွင်တွေဆီ ခြေဆန့်ဖို့ စဉ်းစားသင့်ပါတယ်။ 🫴🤍မိဘတွေကိုလည်းပြောပြချင်တယ်။ သားသမီးကို နိုင်ငံခြားလွှတ်တယ်ဆိုတာ ပိုက်ဆံရှာခိုင်းတာ မဟုတ်ဘူး။ ဘဝကို သင်ယူခိုင်းတာ။ မိဘတိုင်းက သားသမီးကို ကိုယ့်အနားမှာပဲ ရှိစေချင်ကြတယ်။ ဒါပေမယ့် ငှက်တစ်ကောင်ကို အမြဲလှောင်အိမ်ထဲမှာ ထားရင် ပျံသန်းတတ်မှာ မဟုတ်ဘူး။ နိုင်ငံခြားရောက်သွားတဲ့ လူငယ်တစ်ယောက်ဟာ— ကိုယ့်အဝတ်ကိုယ်လျှော်တတ်လာတယ်။ ကိုယ့်ပိုက်ဆံကိုယ် စီမံတတ်လာတယ်။ ကိုယ့်ပြဿနာကိုယ် ဖြေရှင်းတတ်လာတယ်။ လူပေါင်းစုံနဲ့ ဆက်ဆံတတ်လာတယ်။ ကမ္ဘာကြီးကို ပိုကျယ်ကျယ်မြင်တတ်လာတယ်။ ဒီလိုအရာတွေကို စာအုပ်ထဲကနေ သင်ယူလို့မရဘူး။ အတွေ့အကြုံကပဲ သင်ပေးနိုင်တယ်။ တချို့မိဘတွေက “အဝေးသွားရင် ပင်ပန်းမှာစိုးတယ်” လို့ တွေးကြတယ်။ ဟုတ်ပါတယ်။ ပင်ပန်းမယ်။ အိမ်လွမ်းမယ်။ အခက်အခဲတွေလည်း ကြုံမယ်။ ဒါပေမယ့် အဲဒီအခက်အခဲတွေကပဲ ကလေးတစ်ယောက်ကို လူကြီးတစ်ယောက်ဖြစ်လာအောင် ပုံသွင်းပေးတာ။ မိဘက သားသမီးတွေအတွက်လမ်းခင်းပေးနိုင်တယ်။ ဒါပေမယ့် ဘဝတစ်လျှောက်လုံး လက်တွဲမခေါ်သွားနိုင်ဘူး။ တစ်နေ့ မိဘမရှိတော့တဲ့အချိန်မှာတောင် ကိုယ့်ခြေထောက်ပေါ် ကိုယ်ရပ်တည်နိုင်တဲ့ လူတစ်ယောက်ဖြစ်ဖို့က ပိုအရေးကြီးတယ်။ ဒါကြောင့် သားသမီးကို နိုင်ငံခြားလွှတ်တယ်ဆိုတာ ဝေးသွားစေချင်လို့ မဟုတ်ဘူး။ ပိုသန်မာတဲ့ လူတစ်ယောက်ဖြစ်လာစေချင်လို့ ဖြစ်တယ်။ တစ်ခါတလေ မိဘတစ်ယောက်ရဲ့ အကြီးမားဆုံးမေတ္တာက အနားမှာ ဖက်ထားတာ မဟုတ်ဘူး။ ကမ္ဘာကြီးထဲကို ရဲရဲဝံ့ဝံ့ လွှတ်ပေးလိုက်တာ ဖြစ်တယ်။ ☘️ဆိုတော့ ဒီလိုပြောလို့ နိုင်ငံခြားကို ကောက်ကာငင်ကာကြီး ထလာဖို့မလုပ်လိုက်နဲ့ဦး။ ကိုယ်သွားမယ့်နိုင်ငံရဲ့ ဘာသာစကားကိုတတ်အောင်သင်သွား။ အစတည်းက ဘာမှမတတ်ရင် နောက်လည်းတတ်လာမှာမဟုတ်ဘူး။ ဘယ်နိုင်ငံရောက်ရောက် ဘာသာစကားရရင် ခေါင်းတစ်လုံးသာတာမို့ နိုင်ငံခြားထွက်ဖို့အစီအစဉ်ရှိရင် ဘာသာစကားကို သေသေချာချာလေ့လာကြလော့ လို့ပြောရင်း စာကိုဒီမှာပဲ နိဂုံးချုပ်ပါရစေခင်ဗျာ့။ ဖတ်ရှုပေးလို့ ကျေးဇူးတင်ပါတယ်ဗျာ🤍။ - @phoenixz7