Mbrëmjen e datës 27.06.2026, rreth orës 22:00, po udhëtoja në rrugën e Dukatit, nga Orikumi në drejtim të Palasës. Në errësirë të plotë, ku një pjesë e mirë e drejtuesve përdorin dritat e gjata duke e bërë pothuajse të pamundur të kuptosh pozicionin e mjeteve përballë, ndodhi ajo që askush nuk dëshiron ta përjetojë. Siç duket qartë edhe në pamjet filmike, një automjet që po kthehej drejt hotelit Acros më preu rrugën. Në vend që të ndalonte, vazhdoi manovrën duke më bllokuar çdo mundësi për t'u rikthyer në korsinë time. Në ato sekonda vendosa të bëj atë që m'u duk zgjedhja më njerëzore: të shmang një përplasje që mund të kishte pasoja shumë më të rënda, edhe pse kjo do të thoshte të dëmtoja automjetin tim dhe pronën private. Policinë e njoftova vetë dhe u vura në dispozicion pamjet filmike që tregonin se çfarë kishte ndodhur. Megjithatë, sipas interpretimit ligjor të rastit, përgjegjësia ra mbi mua, sepse nuk pati kontakt mes automjeteve. U gjobita dhe çdo dëm material mbeti përgjegjësia ime. Këshilla që mora ishte edhe më e hidhur: për t'u dëmshpërblyer, duhej të kisha bërë kontakt me automjetin tjetër. Me fjalë të tjera, nëse do të zgjidhja të përplasesha, ndoshta do të kisha pasur më shumë të drejta sesa duke bërë çdo përpjekje për ta shmangur aksidentin. Kjo më shtyn të bëj një pyetje që shkon përtej ligjit. A mjafton që një vendim të jetë i ligjshëm, nëse ai nuk i jep asnjë vlerë veprimit që synon të mbrojë jetën dhe të minimizojë pasojat? Ligji duhet të zbatohet, por ai nuk duhet të humbasë kurrë dimensionin moral. Përndryshe, rrezikojmë të edukojmë shoferë që mësojnë se është më e leverdishme të përplasen sesa të shmangin një tragjedi. Unë bëra zgjedhjen time. Zgjodha jetën përpara dëmshpërblimit. Financiarisht më kushtoi, por moralisht nuk pendohem asnjë çast. Po ju, çfarë do të kishit zgjedhur në vendin tim? #RealLife #Dukat #Aksident #UdhëtoniMeKujdes - @kelvin.sheja