@youngsoldiers007: កងកម្ម៉ង់ដូម៉ៃហ្វក (MIKE FORCE) ទាហានស្អែកស្លាប់ ឬទាហានកន្សែងស អង្គភាពទ័ពពិសេសខ្មែរ សម័យសង្រ្គាមសុីវិល (អត្ថបទកែសម្រួល និងផ្សាយឡើងវិញ) កងកម្ម៉ង់ដូម៉ៃហ្វក (MIKE FORCE / Mobile Strike Force Command / កងប្រតិបត្ថិការកម្ទេចចល័ត) ជាអង្គភាពទ័ពពិសេសប្រមូលផ្តុំដោយជនជាតិភាគតិចនៅអតីតវៀតណាមខាងត្បូង​ និងទឹកដីកម្ពុជាក្រោម ដែលបង្កើតឡើងនៅឆ្នាំ១៩៦៤ ហ្វឹកហ្វឺន​នឹងបំពាក់​អាវុធ​ដោយកងទ័ពពិសេសសហរដ្ឋអាមេរិក ជាកងទ័ពសម្រាប់ប្រើក្នុងប្រតិបត្តិការ សំរាប់ឆ្មក់វាយប្រហារ ប្រឆាំងឧទ្ទាមកម្ម ជួយសង្គ្រោះ និងរំដោះទីតាំងនានាពីទាហានកុំមុយនិស្ត នាកំលុងសម័យសង្រ្គាមវៀតណាម (១៩៦៤-១៩៧៥)។ ក្នុងនោះផងដែរមានបងប្អូនខ្មែរក្រោម ប្រមានរាប់ពាន់នាក់ បានចូលបំរើក្នុងអង្គភាពទ័ពម៉ៃហ្វកនេះ ហើយនៅពេលសង្រ្គាមសុីវិលនៅកម្ពុជាបានឆាបឆេះឡើងនៅឆ្នាំ១៩៧០​ រដ្ឋាភិបាលកម្ពុជា បានស្នើរសុំតាមរយះសហរដ្ឋអាមេរិក សុំឲ្យលោក សឹង​ ​ងុកថាញ់ (អតីតមេដឹកនាំខ្មែរសេរី និងជាអតីតនាយក​រដ្ឋមន្ត្រី​ខ្មែរ​ ដេីមកំណេីតខ្មែរក្រោម)​ ដែលជាមេដឹកនាំទាហានម៉ៃហ្វកនៅកម្ពុជាក្រោម ឲ្យបញ្ចូនទាហានម៉ៃហ្វកខ្មែរក្រោមមកកម្ពុជា ហើយបងប្អូនខ្មែរក្រោម ជាទាហានម៉ៃហ្វកជាច្រើនពាន់នាក់ បានស្មគ្រ័ចិត្ត ចូលមកជួយកងទ័ពរដ្ឋាភិបាលខ្មែរ ច្បាំងទប់ទល់នឹងពួកកុំមុយនិស្ត។ នៅចុងខែមិនា ឆ្នាំ១៩៧០ ទាហានម៉ៃហ្វក រលកទី១ត្រូវបានដឹកជញ្ជូនដោយទ័ពអាកាសអាមេរិក បញ្ចូនមកប្រទេសកម្ពុជា ទាំងកណ្តាលអាធ្រាតចុះចតនៅវាលយន្តហោះ អតីតបន្ទាយបារាំង នៅតំបន់ដាក់ដាំ នៃខេត្តមណ្ឌលគីរី ដើម្បីរក្សាស្ថិរភាពជាបន្ទាន់នៅបែកខាងអាគ្នេយ៍កម្ពុជា ជាតំបន់ភូមិសាស្រ្តក្តៅដែលងាយរងគ្រោះពីការវាយប្រហាររបស់ទាហានកុំមុយនិស្ត។ កងកម្ម៉ង់ដូម៉ៃហ្វូកមានភាពល្បីរន្ទឺខ្លាំង ខាងប្រយុទ្ធលើសមរភូមិ ដោយគេល្បីថាទាហានម៉ៃហ្វកមួយនាក់ អាចប្រឈមមុខនឹងទាហានកុំមុយនិស្តជាច្រើននាក់ នេះជារឿងពិតដោយនៅតាមសមរភូមិមួយជាច្រើនដូចជានៅ ខេត្តតាកែវ ព្រៃវែង ស្វាយរៀង ទន្លេបិទ អ្នកលឿង ទាហានកុំមុយនិស្ត បានបាត់បង់ជីវិតរាប់រយនាក់ក្នុងពេលប្រយុទ្ធ តែទាហានម៉ៃហ្វកវិញពលី និងខូចខាតសម្ភារៈសឹកតិចតួចបំផុត។ ខ្មែរយើងចាស់ៗពីដើមច្រើនហៅ ទាហានម៉ៃហ្វក ដែលមានដើមកំណើតខ្មែរក្រោម ថាទាហានកម្ពុជាក្រោម ទាហានសឹងង៉ុកថាញ់ ទាហានកន្សែងស ឬទាហានស្អែកស្លាប់ ដោយសារនិមិត្តសញ្ញាក្បាលខ្មោចតំណាងឲអង្គភាពទ័ពពិសេសម៉ៃហ្វក។ ទ័ពម៉ៃហ្វកជាទូទៅគ្រងឯកសណ្ឋានប្រយុទ្ធប៉ារ៉ាក្រលាខ្លា (Tiger Stripe Camouflage) របស់ទ័ពពិសេសសហរដ្ឋអាមេរិក ហើយពាក់ស្បែកជើងប្រយុទ្ធខ្មៅ ដែលបន្សល់ឈ្មោះល្បីថា ស្បែកជើងម៉ៃហ្វកដល់សព្វថ្ងៃ។ ឯកសណ្ឋានប្រយុទ្ធប៉ារ៉ាក្រលាខ្លា (Tiger Stripe Camouflage) របស់ទ័ពម៉ៃហ្វក នៅបន្តប្រើប្រាស់ដោយអង្គភាពទ័ពពិសេសរបស់ប្រទេសមួយចំនួននៅលើពិភពលោក ដូចជាទ័ពពិសេសហ្វីលីពីនជាដើម។ ទ័ពម៉ៃហ្វកបានរំសាយនៅឆ្នាំ១៩៧៥ ហើយយុទ្ធជនម៉ៃហ្វកខ្មែរក្រោម ជាច្រើនពាន់នាក់បានពលីជីវិតការពារសេរីភាពជាតិខ្មែរ ពីក្រញាំពួកកុំមុយនិស្តខ្មែរក្រហម ដល់ទីបញ្ចប់រហូតដល់ពេលខ្មែរក្រហមឡើងកាន់អំណាចនៅឆ្នាំ១៩៧៥។

Young Soldier

Open In TikTok:

Region: KH

Sunday 28 June 2026 21:22:16 GMT