@.kwet.kwee: ဆိုဗီယက်ပြည်ထောင်စုပြုကွဲခြင်း =======(တတိယပိုင်း) ကိုရီးယားစစ်ပွဲ(Korea War) ~~~~~~~~~~~~~~~~~ ဒုတိယကမ္ဘာစစ်တွင် ဂျပန်များစစ်ရှုံးပြီးနောက် ၁၉၄၅ ခုနှစ်တွင် ကိုရီးယားကျွန်းဆွယ်ကိုမဟာမိတ်တို့က အရှေ့နှင့်အနောက် ၃၈မျဥ်းပြိုင် (38th parallel of latitude ) ဖြင့် နှစ်ပိုင်း ပိုင်းခြားလိုက်သည် ။ တောင်ပိုင်းကို အမေရိကန်တို့ကထိန်းချုပ်ခွင့်ရခဲ့ပြီး မြောက်ပိုင်းဒေသကို ဆိုဗီယက်တို့မှ ထိန်းချုပ်ခွင့်ရရှိခဲ့သည် ။ထိုအခါဆိုဗီယက်လက်အောက်ခံမြောက်ကိုရီးယားမှာ ကွန်မြူနစ်နိုင်ငံဖြစ်လာခဲ့ပြီး အမေရိကန်လက်အောက်ခံ တောင်ကိုရီးယားမှာ ဒီမိုကရေစီနိုင်ငံဖြစ်လာခဲ့သည်။ ၁၉၄၈ခုနှစ်တွင် ကင်အီဆွန်း(Kim Ii Sung ) သည်မြောက်ကိုရီးယားကွန်မြူနစ်ပါတီ၏ ခေါင်းဆောင်ဖြစ်လာခဲ့သည်။ သူသည်စစ်ဝါဒီတစ်ဦးဖြစ်ပြီး ကိုးရီးယားပြန်လည်ပေါင်းစည်းရေးဟုဆိုကာ ၁၉၅၀ ခုနှစ်၊ ဇွန်လတွင် တောင်ကိုရီးယားနိုင်ငံ ဆိုးလ်(Seoul)မြို့ကို ဝင်ရောက်သိမ်းပိုက်လိုက်သည်။ ထို့နောက် မြောက်ကိုရီးယားစစ်တပ်သည် တောင်ကိုရီးယားနှင့် အမေရိကန်တပ်များအား ကိုးရီးယားကျွန်းဆွယ် တောင်ပိုင်းဒေသသို့ မောင်းထုတ်လိုက်သည်။၁၉၅၀ခုနှစ် နောက်ပိုင်းတွင် အမေရိကန်တပ်များသည် ရေတပ်အကူအညီဖြင့်တောင်ပိုင်းကို ပြန်လည် သိမ်းပိုက်ပြီး မြောက်ကိုရီးယားအထိ ထိုးစစ်ဆင်ခဲ့သည်။ ထိုအခါ ဆိုဗီယက်ရုရှားနှင့်တရုတ်တို့သည် မြောက်ကိုရီးယားဘက်မှ ကူညီကာ အမေရိကန်ဦးဆောင်သောတပ်များကို တောင်ပိုင်းသို့ ပြန်လည်တိုက်ထုတ်ခဲ့ကြသည်။ ၁၉၅၁ တွင် နှစ်ဖက်တပ်များသည်ယခင်ခွဲခြားထားသည့် ၃၈ မျဥ်းပြိုင် အနီးတွင်ခံတပ် ကတုတ်ကျင်းများတူးပြီး တပ်စွဲကာ ကြီးမားသည့်စစ်ပွဲများအား ၁၈ လ ကြာအောင် တိုက်ခိုက်ခဲ့သည်။ ၁၉၅၃ ခုနှစ်၊ ဇူလိုင်လ ၂၇ ရက် တွင် ကုလသမဂ္ဂကြား၀င်စေ့စပ်ဆွေးနွေးမှုဖြင့် မြောက်ကိုရီးယားတို့က စစ်ပွဲရပ်တန့်ရန် သဘောတူခဲ့ကြသည်။ ခရူးရှက်ခေတ်(Khrushchev) ~~~~~~~~~~~~~~~~~~ ၁၉၅၃ ခုနှစ်တွင် စတာလင် ကွယ်လွန်သည်။ စတာလင်ခေတ်လွန်သော် ခရူးရှက် (Nikita Khrushchev) အာဏာရလာသည်။၁၉၅၅ ခုနှစ်တွင် ဆိုဗီယက်ပြည်ထောင်စုမှ ဦးဆောင်ကာ ဝါဆောအဖွဲ့ (The Warsaw Pact)ကို ဖွဲ့စည်းလိုက်သည်။ ထိုအဖွဲ့တွင် ပါဝင်သောနိုင်ငံများမှာ ဆိုဗီယက်၊ အယ်ဘေးနီးယား၊ ဘူလ်ဂေးရီးယား၊ ချက်ကိုစလိုဗားကီးယား၊ အရှေ့ဂျာမနီ၊ ဟန်ဂေရီ၊ ပိုလန် နှင့် ရူမေးနီးယားတို့ ဖြစ်သည်။ ဆိုဗီယက်ကွန်မြူနစ်ပါတီ၏ အကြိမ် ၂၀ မြောက် ကွန်ဂရက်တွက် ခရူးရှက်သည် ကွယ်လွန်သူစတာလင်ကို အကြီးအကျယ်ဂုဏ်သိက္ခာချခဲ့ပြီးနောက် သူ၏ ပြန်လည်ပြင်ဆင်ရေးဝါဒကို တင်ပြခဲ့သည်။ ခရူးရှက်၏မိန့်ခွန်းအရ စတာလင်နှင့် ဆန့်ကျင်ဘက်စိတ်သဘောထားကောင်းမွန်ပြည့်ဝသူဖြစ်သည်ဟု အရှေ့ဥရောပကွန်မြူနစ်နိုင်ငံများက ယုံကြည်လာကြသည်။ ထိုအခါ ဟန်ဂေရီပြည်သူတို့က ဆိုဗီယက်၏ သြဇာအောက်မှ လွတ်မြောက်လိုသောကြောင့် ပုန်ကုန်ကြသည်။ ထိုပုန်ကန်မှုကို ဆိုဗီယက်တို့က စစ်သား၂သိန်းနှင့် တင့်ကား၂၅၀၀ စေလွှတ်ပြီး ရက်စက်စွာ နှိမ်နင်းခဲ့သည်။ ထိုအချိန်တွင် ဗြိတိသျှနှင့် ပြင်သစ်တို့သည် ဆူးအက်တူးမြောင်းအရေးအခင်းတွင် အစ္စရေးနှင့်ပေါင်းပြီး အီဂျစ်နိုင်ငံကို အနိုင်ကျင့်သည်ဟု ကုလသမဂ္ဂအဖွဲ့ဝင်နိုင်ငံအများစုက ဆန့်ကျင်ကြသောကြောင့် အခြေအနေရှုပ်ထွေးနေချိန်ဖြစ်ရာ ဆိုဗီယက်တို့က လွတ်လပ်စွာအောင်ပွဲခံနေကြတော့သည်။ခရူးရက်ကိုလည်း စတာလင်ကဲ့သို့သော အာဏာရှင်အဖြစ်မြင်ကုန်ကြတော့သည်။ ဘာလင်တံတိုင်း (Berlin Wall) ~~~~~~~~~~~~~~~~~~~ ၁၉၆၁ခုနှစ်၊ သြဂုတ်လ ၁၃ရက်တွင် အရှေ့ဂျာမနီနှင့် အနောက်ဂျာမနီကို ဆက်သွယ်မှုအားလုံးဖြတ်တောက်ရန် ဘာလင်တံတိုင်းကို အရှေ့ဂျာမနီဘက်မှ စတင်ဆောက်လုပ်သည်။ တံတိုင်းကြီးသည် ၁၂ပေမြင့်ပြီး ၁၀၃မိုင်ရှည်လျားကာ အရှေ့ဘာလင်နှင့် အနောက်ဘာလင်ကို ၂၈မိုင် ဖြတ်သွားသည်။တံတိုင်းကြီးတွင် ဖြတ်လမ်းဟူ၍ အစောင့်ချထားသော ဖြတ်လမ်း ၂ပေါက်သာရှိသည်။ အရှေ့ဂျာမနီအာဏာပိုင်များက ဘာလင်တံတိုင်းကို ဖက်ဆစ်ဆန့်ကျင်ရေးအကာအကွယ်ဟု တရားဝင်ခေါ်ဆိုခဲ့သည်။ အနောက်ဘာလင်မြို့အစိုးရကမူ လွတ်လပ်စွာသွားလာလှုပ်ရှားခွင့်အပေါ် ကန့်သတ်ချက်ကိုရည်ညွှန်းကာ မြို့တော်ဝန် ဝီလီဘရန့်(Willy Brandt) ကတီထွင်ခဲ့သော အရှက်တရားတံတိုင်း (Wall of Shame) ဟု တစ်ခါတစ်ရံရည်ညွှန်းပြောဆိုခဲ့သည်။ တံတိုင်းကြီးကာထားသော်လည်း အရှေ့ဂျာမနီမှ လူများသည် အနောက်ဂျာမနီသို့ ထွက်ပြေးခိုလှုံရန် ကြိုးစားကြသည်။ ထွက်ပြေးသူများကို အစောင့်များက ပစ်သတ်ကြသောကြောင့် သေဆုံးများလည်း ရှိသည်။ စတုတ္ထပိုင်း၌ဆက်လက်ဖတ်ရှုပါရန်

💙💙💙 KWET KWEE 💙💙💙

Open In TikTok:

Region: MM

Tuesday 30 June 2026 00:17:27 GMT