Réponse à @🎟️ الغرام🩵 الحلقـة الثـانية عشـر 12 : فـگْـدْ لْـيَـحْجلِّـي ... مـا كِـيـفُ مـاهُ بـــرْدلِّ گاعدة منى مع النينة جداتها واحذاها صك سفر اسغير ... گالت لهم عنها تبغي تگيس بادية اهلها تعطي ايام مع بوها وتستراح اشوي ... ذيك الساعة فات عاد شهر 8 ولخريف بادئ ... وباديتهم هومَ گاع تخرف حتت ارضها گاسية واسحابها ياسرة ماشاء الله ... وكانها امللي تعطي ايام عن الحافظ وتنصله من اخلاگها ... تلفن لها ميمين خالها عنو اراهو الگدام ... وادعت جداتها وخالتها واعيال خالها ولمينة والعزة اللي ماتبغيها تمشي عنها ... تعودت عليها وصحبتها وخصوصا عاگب عرس لمينة ومشيها عنهم ... خاظت شور ميمين والين ركبت نگز ميمين شور امو ... استغلت هي الفرصة وخرصت دار القاسم ... يغير ماشافت فيها حركة ... الا اثرو مافات نگز ذاك الوقت الرابعة ...جَ ميمين بعد وگيمو شور بادية اهل منى ... ---------- اوعات التبرة امع اصباح سابگ يوعه الشيخ وفتحت صكها الفيه تلفونها الكانت عندها ... گلعت منو رقمها الفيه ودارته فتلفون ثانية اسغيرة ... ومحات ذاك فر اللي فذيك تلفون بيهللي املانه املااانه... ولانعرف بعد محدها تمحي محادثتها مع الرجالة والل صورها متفسخة وخايفة الشيخ يشوفهم ماتخاف من مولانه ؟.... طرحت تلفونها القديمة فالصك ...بلا فايدة اتلات اصلا جاب لها الشيخ آخر نگشة من تلفونات ... تلفونها بعد ذيك اسغيرة دارت لها صامت ولمتها فصكها من تحت اياك ماتزعجها وتنترها الا وقتها هي رافة عليها ... رجعت شور الشيخ گعدت احذا راصو ... وتلات توخظ ايدها عليه ... حس بيها الشيخ ورفّد فيها عينيه ... انتر ايدها شورو وحبها ... وعدل گعدتو ... التبرة : كوم صلّى ... خرص الشيخ الوقت ذا هي عادت الگايلة ... البارح بعدنهم ماروحو وبعدنهم مارگدو امللي ... عدل وگفتو گايس الدوش ... اتوظى وسوّك وخاظ شور هو الگدام يصلّى ... دخلت التبرة مللي الدوش وسوكت وصگلت وجهها ورطبته ... خاظت ونترت ملحفة بيظة ... ولا احتاجت لديرلها المسك مُمسكة ومعدلة حالتها ... دخلت فيها وكعدت كدام اكوافيز وتكحلت ودارت اشوي اعل فمها ... حاسة هي عنها طفلة شبيبة من رأسٍ إلى قدمِ ... وذاك بعد ماه كذيب ... يغير مولانا الين ينعم اعل وحدة منا بالجمال يالة اتگيد نعمتها وتستر راصها ولايشوف ذاك الجمال كون حد حلال عليه ... خاظت شورو وعدلت گعدتها احذا لماعين ... وصبت كاس حسين ... والشيخ الا يخرصها عاجبتو وحامد مولانه اعل عنو شدها ... التبرة : كتلك نحن لاهي نسكنو وحدنا والل مع اهلك .. عدل الشيخ گعدتو وگالها : كنت نبغي نسكنو مع الخلطة الدار فم اكبيرة ماشاء الله وتكثريهم شگايلة ... ما ازيان ذاك عند التبرة بيهللي لاهي يخسر ياسر من برامجها ...التبرة: كنت نبغي نسكنو وحدنا ذا ماتله زمن استنسيب واتخوطير اعل لنساب ... الشيخ : الا اعتبريهم اهلك ... ماتكلمت يغير نعتتلو عن ذاك ما ازيان عندها ... الشيخ : كان فم ابرتماه احذا الخلطة الا فنفس الشارع ينكرا الين نجبرو مزال خالگ نگبظوه ... التبرة طاعنها بذا من عزة الاهل والقرب منهم هي تبغيه يگيس بيها ارض ما اخبارهم منها شي گاع يغير اشبه ذا بعد من لگعاد معاهم اعل لفراش ... التبرة: اوكى بيبي مافيه مشكلة ... اتبسم الشيخ وحاز شورها ..... --------- عاگب المغرب وصلت منى وميمين ... جبرو اسحاب مالها ياسر وافية ... والجو باارد وامونك ... نگزت منى وگاست بوها اللي ماكان عالم بمجيها گاع ... سلمت عليه ووكف هو شور ميمين ... جاتها سلمى والطاهرة يسلمو عليها وعدلو اشراب واتاي ... فذاك جاهم عمها هي ومشاو عنهم لعليات شور اهل عالي وفاو جماعتهم الهيه ... ومنى متوحشة سلمى وكل شي اخلگ لها اتردو عليها ... كون امردة القاسم مافات جبرت لها فرصة بيها الطاهرة اللي گاعدة احذاهم ... بات بعد ميمين معاهم ذيك الليلة اعل برنامج عنو يصبح راجع ل انواكشوط ... ---------- نگز القاسم وعدل روتينُ واطلع الفوگ ذيك الليلة حامية وكوراه مگطوع وفرصة امللي لعل تطلع العراد ... يغير باب اهل ميمين لو ايام بذيك الگفلة ... وعادو هو اگريب يقنط ويبغي بعد الا يعود ايگد يدخل دار اهل ديدي ويگبظ منى منهم ويزوگ بيها ... ماه مجبورة والرفم مكفول .. فوكفتو ذيك شاف العزة گايسة بوتيك ماه ابعيد منهم يغير امللي اگرب لو هو منهم ... نگز بالعجلة يدور يجبرها وتعطيه شي من اخبار منى لاتعود كاع حاسة بشي... اوگف فبلد فم اورا البوتيك باشوي مايراعو فيه اهل ديدي بيهم تگدام اديار لخرات ... تم فم مشرك الها الين شافها راجعة وعاد مقابلها عيط عليها ... العزة وگفت الين سمعتو وخرصت ذا هي الكهلات اللي الگدام مايراعو فيها ... تگدمت شورو واسالمت معاه ... القاسم : العزة منى اياك ماه حاسة ابشي ؟ تلفونها خاسرة ؟ هي امالها .. العزة : منى امشات ... - @nahaa70