မြစ်ကြီးနားမြို့နယ်၊ မှန်ပြတောင်စစ်တပ်ဂိတ်က ကုန်ကားများကို အနည်းဆုံး သိန်း ၂၀ မှ သိန်းရာကျော်အထိ ကောက်ခံနေ၍ ကုန်သွယ်ရေး ရပ်ဆိုင်းလုနီးပါးဖြစ်နေ၊ တိုင်းစစ်ထောက် ဗိုလ်မှူးကြီး၊ ဗိုလ်မှူးစိုးမြင့်အောင်နှင့် ဗိုလ်ကြီးစံထက်ဇော်တို့က အဓိက ဦးစီး ငွေညှစ်နေ ရန်ကုန်၊ ဇွန် ၂၉ ကချင်ပြည်နယ်၊ မြစ်ကြီးနားမြို့၊ မိုင်းနားကျေးရွာအနီးရှိ မှန်ပြတောင်တွင် တပ်စွဲထားသည့် စစ်တပ်မှ အရာရှိအချို့သည် ကံပိုက်တီ-မိုင်းနား လမ်းကြောင်းတစ်လျှောက် ဖြတ်သန်းသွားလာနေသည့် ကုန်တင်ယာဉ်များကို မတရားငွေကြေးကောက်ခံနေသည့်အပြင် ဒေသခံ ကချင်ကုန်သည်များနှင့် အလုပ်သမားများကို ပစ်မှတ်ထား၍ ငွေညှစ်မှုများ၊ ပစ္စည်းသိမ်းဆည်းမှုများ ကျူးလွန်နေကြောင်း ဒေသကုန်သည်များနှင့်ပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။ ကုန်သည်များ၏ ပြောကြားချက်အရ အဆိုပါငွေကြေးကောက်ခံမှုများတွင် စစ်တပ်၏ တိုင်းစစ်ထောက် ဗိုလ်မှူးကြီးတစ်ဦး၊ ဗိုလ်ကြီး စံထက်ဇော် (ခေါ်) ဗိုလ်စံနှင့် အမှတ် ၉၀၁ တပ်မှ ဗိုလ်မှူး စိုးမြင့်အောင်တို့က ပူးပေါင်းဆောင်ရွက်၍ ငွေကြေးကောက်ခံနေခြင်းဖြစ်ပြီး ယင်းကဲ့သို့ မတရားငွေကြေးကောက်ခံနေသည်မှာ ၆ လနီးပါးရှိနေပြီဖြစ်ကြောင်း သိရသည်။ လက်ရှိတွင် ကံပိုက်တီ-မိုင်းနား လမ်းပိုင်းကို အသုံးပြုသည့် ဘိလပ်မြေတင်ယာဉ်တစ်စီးလျှင် ငွေကျပ် သိန်း ၉၀၊ ဆီဘောက်ဆာယာဉ်တစ်စီးလျှင် ငွေကျပ် သိန်း ၁၀၀ နှင့် အခြားကုန်တင်ယာဉ်များကိုလည်း တစ်စီးလျှင် ငွေကျပ် သိန်း ၂၀ မှ ၃၀ အထိ အတင်းအကျပ် ကောက်ခံနေကြောင်း သိရသည်။ ထို့ပြင် စစ်တပ်က ဗမာကုန်သည်များအပေါ် ငွေကြေးလျှော့ပေါ့ကောက်ခံမှုများ ရှိသော်လည်း ကချင်တိုင်း ရင်းသား ကုန်သည်များကိုမူ သတ်မှတ်ထားသည့် ပမာဏထက် ပိုမိုတောင်းခံလေ့ရှိပြီး လူမျိုးအလိုက် ခွဲခြားဆက်ဆံမှုများလည်း ရှိနေကြောင်း ဒေသခံများက ဆိုသည်။ "ဘိလပ်မြေကား၊ ဆီကားဆိုရင် သိန်းရာချီတောင်းတယ်။ ကချင်ကုန်သည်ဆိုရင် ပိုတောင်းတယ်။ မပေးရင် ကားကို ဆက်မသွားခိုင်းဘူး။ အခုဆိုရင် ကုန်သည်တော်တော်များများ အရှုံးပေါ်ပြီး အလုပ်ဆက်မလုပ်နိုင်တော့တဲ့ အခြေအနေဖြစ်နေတယ်" ဟု ဒေသခံကုန်သည်တစ်ဦးက ရန်ကုန်ခေတ်သစ်သတင်းဌာနသို့ ပြောဆိုသည်။ ဒေသခံများ၏ အဆိုအရ ဗိုလ်ကြီး စံထက်ဇော်နှင့် ဗိုလ်မှူး စိုးမြင့်အောင်တို့သည် အောက်ခြေမှ ကောက်ခံရရှိသည့် ငွေများကို နေ့စဉ်စုဆောင်း၍ အထက်အရာရှိထံ ခွဲတမ်းပေးပို့နေကြောင်း၊ ဗိုလ်ကြီး စံထက်ဇော်မှာ မှန်ပြတောင်တောင်ခြေတွင် တိုက်ရိုက်ထိုင်ကာ ငွေကြေးကောက်ခံနေပြီး ဗိုလ်မှူး စိုးမြင့်အောင်မှာ ငှက်ပျောစိုက်ခင်းများအနီးတွင် ဒေသခံများ၏ ဆိုလာပြားများ၊ မီးစက်များနှင့် စက်သုံးဆီများကို အဓမ္မသိမ်းယူမှုများ ပြုလုပ်နေကြောင်း သိရသည်။ ထို့ပြင် ဗိုလ်ကြီး စံထက်ဇော်နှင့် အဆင်မပြေသည့် ကုန်သည်များကို ဗလမင်းထင်တံတားအရောက်တွင် ရဲတပ်ဖွဲ့ကို အသုံးပြု၍ ဖမ်းဆီးစေခြင်းများ ပြုလုပ်လေ့ရှိကြောင်း၊ ဗိုလ်မှူး စိုးမြင့်အောင်ကလည်း ငှက်ပျောစိုက်ခင်းများရှိ ကချင်အလုပ်သမားများကို မူးယစ်ဆေးဝါးအမှုဖြင့် ချောက်တွန်းဖမ်းဆီးစေပြီး ငွေညှစ်မှုများ ပြုလုပ်နေကြောင်း ဒေသခံများက ပြောဆိုသည်။ "အပေးအယူမတည့်တဲ့သူဆိုရင် ရဲနဲ့ဖမ်းခိုင်းတာ၊ မူးယစ်အမှုဆင်တာတွေ ရှိတယ်။ အလုပ်သမားတွေလည်း မနေရဲတော့လို့ တချို့ငှက်ပျောခြံတွေတောင် နေရာပြောင်းကုန်ပြီ" ဟု ဒေသခံတစ်ဦးက ပြောသည်။ ဒေသခံများ၏ ပြောကြားချက်အရ ကချင်လွတ်မြောက်ရေးတပ်မတော် (KIA/KIO) ထိန်းချုပ်ထားသည့် လမ်းပိုင်းများတွင် ငွေကြေးကောက်ခံမှုမရှိသော်လည်း စစ်တပ်နှင့် ပြည်သူ့စစ်များ ထိန်းချုပ်ထားသည့် နောင်ချိန်းဂိတ်နှင့် မှန်ပြတောင်ဂိတ်တို့တွင် ငွေကြေးတောင်းခံမှုများ အဆမတန် မြင့်တက်နေသဖြင့် ကချင်ဒေသခံကုန်သည်များမှာ အရင်းအနှီးများ ဆုံးရှုံးလာပြီး လုပ်ငန်းအချို့ကို ရပ် ဆိုင်းထားရသည့် အခြေအနေသို့ ရောက်ရှိနေကြောင်း သိရသည်။ ဒေသခံ ကချင်တိုင်းရင်းသားများက ၎င်းတို့အပေါ် ကျူးလွန်နေသည့် ငွေညှစ်မှုများ၊ ပစ္စည်းအဓမ္မသိမ်းယူမှုများနှင့် လူမျိုးရေးခွဲခြားဆက်ဆံမှုများကို ချက်ချင်းရပ်တန့်စေလိုကြောင်း၊ ဖြစ်စဉ်များနှင့်ပတ်သက်၍ ဘက်မလိုက်အဖွဲ့အစည်းများ၊ ဘာသာရေးအဖွဲ့အစည်းများနှင့် နိုင်ငံတကာ ကချင်အဖွဲ့အစည်းများထံ တိုင်ကြားစာများ ပေးပို့သွားမည်ဖြစ်ကြောင်း ဒေသကုန်သည်များက ပြောဆိုကြသည်။ ဓာတ်ပုံ- အကြမ်းဖက်စစ်တပ်၏ စစ်ဆေးရေးဂိတ်များ။ (ပုံအဟောင်းကို အသုံးပြုထားပါသည်။)@ZayarTBZ 7.1News🍉 @ZayarTBZ 11 News #ဒေသသတင်းရင်းမြစ် #မြန်မာသတင်း #ပြည်တွင်းသတင်း #စစ်တပ်ယုတ်မာမှုပေါင်းစုံငါတို့အသိဆုံး #zayartbz - @zayartbz7news