د شپږیزې لیګ په اړه مهمې لارښوونې دا چې سبا، چهارشنبه، په خوست کې د شهید رحمت ولي مسرور ملي کرکټ لوبغالي کې د شپږیزې لیګ (T20) سیالۍ پیلېږي، نو د دې لپاره چې له لوبو بشپړ خوند واخلئ او په ارامه فضا کې خپل اتلان له نږدې وګورئ، مهرباني وکړئ لاندې لارښوونو ته پوره پاملرنه وکړئ: ۱. پارکېنګ: ستاسو د موټرو او نورو نقلیه وسایطو لپاره د میدان په جنوب، شرق او غرب لوري کې د پارکېنګ ځانګړي ځایونه برابر شوي دي. کولی شئ خپل وسایط هلته په منظم ډول پارک کړئ. ۲. د اوداسه او لمانځه اسانتیاوې: ستاسو د سهولت لپاره د میدان په شرق او غرب برخو کې د اوداسه او لمانځه مناسب ترتیبات نیول شوي دي، ترڅو وکولای شئ خپل عبادتونه په اسانۍ ترسره کړئ. ۳. د ناستې او سیوري ځایونه: د لوبغالي دننه د ناستې لپاره ستاسو لپاره د سیوري مناسب ترتیبات نیول شوي دي، ترڅو له ګرمۍ او باران څخه خوندي پاتې شئ او لوبې په آرامه فضا کې وګورئ. ۴. خوراکي توکي: د میدان دننه منظم خوراکي پلورنځي په نظر کې نیول شوي دي، نو تاسې کولی شئ د اړتیا وړ خوراکي توکي له هماغه ځایه ترلاسه کړئ. ۵. امنیتي تدابیر: ستاسو د خوندیتوب لپاره په زیات شمېر امنیتي ځواکونه پر دندو ګمارل شوي دي. مهرباني وکړئ د راتګ پر مهال په ټولو امنیتي کمربندونو کې له امنیتي ځواکونو سره بشپړه همکاري وکړئ، تلاشي په درناوي ومنئ او د هغوی لارښوونې تعقیب کړئ. ۶. د قوانینو مراعات: لوبغالي ته د هر هغه شي له راوړلو ډډه وکړئ چې د اسلام، ملي ارزښتونو او د کرکټ د لوبې له اصولو سره په ټکر کې وي. ۷. د لوبغاړو درناوی: د لوبو پر مهال خپل اتلان په ښو، مثبتو او هڅوونکو الفاظو بدرګه کړئ، او له بې‌ځایه، نامناسبو او مزاحمو الفاظو څخه جدي ډډه وکړئ. ۸. د VIP ساحې په اړه: په سږني پړاو کې د VIP ساحه محدوده شوې ده، نو زموږ لپاره ټول راتلونکي میلمانه قدرمن او VIP دي. هیله ده د ټکټ تر ترلاسه کولو وروسته په خپلو ټاکل شوو او مشخصو ځایونو کې کېنئ. په پای کې، له ټولو خوستوالو هیله کېږي چې د خپلې مېلمه پالنې رښتینی انځور وړاندې کړي او د خپلو اتلانو درناوی د تل په څېر په ښه ډول وساتي. د یو ښکلي، منظم او پُر امنه لیګ د ترسره کېدو په هیله! 🙏 احسان ولي مسرور د خوست کرکټ پرمختیایي ادارې آمر - @boadofficial0