السلام عَليكُم ‏أني هُمام، عُمري 8 سنوات ‏إنـوِلدت عِند عائلة الكُل يحـچي بأخلاقها، إلى أن اتى يوم صادَف بـ 2012/10/6 فِي السُليمانية. ‏ ‏ ‏چنت طـِـفل، أفكـاري فقط شِلون اصير دكتور، وشِلون إلعَـب، وشِلون أرضي والداي. ‏ ‏ ‏وبيوم چان عِندي مَـدرسة، گـعدت على صوت والدتي تِنادي بإسـمي.. ‏ ‏ ‏فَضيلة: گوم هُمام گوم ولك راح يـِروح أبوك! ‏ ‏ ‏گعَدت، وكـعادتِي، ما احچي، بِصغري هادئ كُلش. ‏ ‏ ‏شفت أُختِي نَرجس نايـمة وأُمي مو مگعِدتها، سألت أُمي.. ‏ ‏ ‏هُمام: شنو بيها نَرجس؟ ليش ماتگعُد؟ ‏ ‏ ‏فَضيلة: مَريضة ماما، روح انتَ وباچر هي تداوم ‏ ‏ ‏هَزيت راسي وگِمت، غَسلت وجهي، ورحت يَم أُمي تبدلي مَلابسي.. ‏ ‏ ‏چانت توصيني إنو أني صَف ثاني وصِرت چـبير، بعَد ما احتاج مَجيء نرجس لأن أني صرت رجال مو طفل ومَايصير اروح وي الغربة، وأهز راسي. ‏ ‏ ‏مَشطت شعري، ونزلت وياها، شِـفت ابوية، يشرب إستِكان چاي، شافني وابتسم، وگال.. ‏ ‏ ‏قُصي: أهلاً ابني، تعال أكُل عَلمود اوصلك بطَريقي، وگام. ‏ ‏ ‏گعدت بِصفة، أكل، أُمي تسويلي لفات صِغار، خُبز وبيض. ‏ ‏ ‏كملت وگِمت، غَسلت ايدية، وشِفت أبوية گاعِد على كُرسي بالحوش، مِنتظرني، والجو حلو ودافي مَع نسمة باردة ‏ ‏ ‏لَبستني أُمي حِذائي وما چنت اعرف ليش أُمي هادئة اليوم، لَبستني چنطتي، ومشيت بإتجاه ابوية، لِزم أيدي وطلعنه.. ‏ ‏ ‏وي طلعتنه من الباب سَلم عَلينة جيراننة،وصلني أبوية للمَدرسة، چنت الطالب الهادئ، مالي حِس، ووحيد. ‏ ‏ ‏چنت أنتـظر وَقت الاستراحة بس عَلمود أشوف الغُيوم، عَلى الرغم صفنا چان كرافان، لَكن احب اشوف منظرها كامِل، وچنت أتمنى فقط ان إلمسها. ‏ ‏ ‏ ‏إجت الفرصة وشفت الغُيوم، ومَاحسيت بالوكت الطُلاب تلعَب وتركُض، ولگيت ألمُدير لازِم الجَرس، ودگه، والكل ركض للصف.. ‏ ‏ ‏ ‏رِحت للصف، وإجتنه مُعلمة بيدها قلم وأوراق، جديدة مَحد چان يعرفها، بس الغريب أكثَر مِن گالت وَين الطالب "هُمام قُصي حـسن" گمت وماعرفت شِنو اگول.. ‏ ‏ ‏ ‏باوعَتلي وگالت.. ‏ ‏ ‏إخلاص: ها انتَ.. ماعرفتني؟ أني عمة إخلاص أخت بابا ‏ ‏ ‏مَجنت فاهم شنو، بس هزيت راسي، وگالت.. ‏ ‏ ‏إخلاص: مِن يخلص الدوام، تعال للأدارة أخذك وياي عَلمود اوصلك للبيت بابا گال، لَتخاف ‏ ‏ ‏هُمام: تمام.. ‏ ‏ ‏چانت فَقط واگفة، وتسأل الطُلاب عَن اساميهُم، وأني چنت اخير رحلة، بأخر سرة، ووصلتلي وگالت مَيحتاج، وابتسمَت الي. ‏ ‏ ‏خِلص الدوام والكُل راح، ضليت حاير وين إروح، المَدرسة كُلها كرافانات، وما إندَل الإدارة، لِمحتها من بِعيد.. ‏ ‏ ‏تأشِر بإيدها، رحتلها أركُض، ولزمت أيدي وگالت يلا خلي نروح، وأشرت عَلى كرافان، وگالت هذي الإدارة، هَزيت راسي ومشينة.. ‏ ‏ ‏وِصلنة للبيت دگت الباب، مَره، ومَرتين، ومَحد يفتح، إستغربت، وگالت خَلي اخذك وياي للبيت خاف طالعين.. ‏ ‏ ‏هُمام: لا.. أريد بابا وماما.. ‏ ‏ ‏إخلاص: لَتخاف حبيبي، أني عَمتك.. زين اوديك يم بيبي وجدو؟ ‏ ‏ ‏هُمام: اي.. ‏ ‏ ‏رِحنه لبيت جدي، وطول الطَريق ساكتة وقَلقانة، وأني چنت خايف، كِل ما أتذكر صوت امي وهية توصيني ما اروح مَع الغربة، لأن ماشايف عماتي ولا مره. ‏ ‏ ‏شفت باب بيت جدو، فلتت ايدي، وركضت دگيت الباب، وعَمتِي صارت وراي، وطُلع جدو، سلمت عليه فَرحان، وبنَفس الوَقت قلق على اهلي، وعَمتي سلمت وراحت.. ‏ ‏ ‏طبيت يَم بيبي، سألتني شِنو صار، سولفتلها كُلشي، وسكتت، ضَلت تقرأ قُرآن، ورحت يم جدو بالحوش.. ‏ ‏ ‏گاعد على كُرسي، وصافن، وگلتله.. ‏ ‏ ‏هُمام: جدو.. وين بابا وماما خاف هسة ينتظروني ‏ ‏ ‏إلتفت جدو، وگال.. ‏ ‏ ‏حَـسن: جدو هسة ييجون، نرجوسة مريضة وودوها للدكتور، إن شاء الله مابيها شي. ‏ ‏ ‏سكتت ورحت للمطبخ چنت جوعان كُلش بس أستحي اطلب، چنت أتمنى أُمي موجودة، الي تقرأ عيوني، وتعرُف شنو اريد برمشة عَين.. ‏ ‏ ‏بعد ثواني، سمعت خطوات، باوعت، لگيتها بيبي، گالت.. ‏ ‏ ‏أمل: ها بيبي.. جوعان اصبلك؟ ‏ ‏ ‏هزيت راسي، چنت مستحي، بس إبتسمتلي، وگالت.. ‏ ‏ ‏أمل: هَسة نسوي لـ هُمام أحلى ماعون، بي تمن، وبي مرگة، وأني اوكلة.. وسكتت ‏ ‏ ‏چنت خجلان، وإبتسم مع كُل كلمة تحچيها،وعم صمت وهية دَتصب الاكل،بس بصعوبة شوية.. ‏ ‏ ‏وكِسر الصَمت صوت دك الباب، ركَضت اشوف منو، وشفت جدو فِتح الباب، وطلع رجال، وگال الرجال بتوتر ويرجف.. ‏ ‏ ‏الرِجال: السلام عليكُم، أنتوا اهل قُصي حـسن؟ ابو نرجس.. ‏ ‏ ‏حَـسن: وعليكُم السلام، أي احنة، شبي قُصي؟ ‏ ‏ ‏تنهد الرجال وأيده ترجف، مَچنت فاهم، بس من سمعت اسم ابوية حاولت اركز، اريد اعرف شبي ابوية؟ ‏ ‏ ‏الرِجال: عَمي، قدر الله وما شاء فعَل.. بس قُصي چان طالع بالسيارة،وياه زوجتة وبنية صغيرة، وچان الطَريق إزدحام..وو ‏ ‏حَـسن: دحچي ابني مو نشفتة لگلبي شبيهم؟ ‏ ‏ ‏الرِجال: ااا.. صار حادث، وتوفوا كُلهم.. ‏مَاتوقعت بعَد هالكلمات حَياتي راح تتغيَر، وَتصير أحلامي مُجرد خَيال. #fyp #fypシ゚ #pppppppppppppppp #viral - @hh2.m3