Réponse à @mynye.. القاسم : العزة منى اياك ماه حاسة ابشي ؟ تلفونها خاسرة ؟ هي امالها .. العزة : منى امشات ... اعطاتو الصدمة خرصها متفاجئ :مشات شور اش؟! ... العزة : البادية ... القاسم : اينت ومع من ولاش ماتعلمني ذا شنه ... العزة:مشات اليوم مع ميمين ... ماتكلم ومصدوم وباگي فيه ذا الين عادت ماشة لاش ماتعلمو توادعه شنه سبب عليه ذا اللي اتعدل فر ... قاطعت العزة تخمامه وهي تگول : القاسم فتصل مع منى ... القاسم : مافهمت ! ... العزة : انا لاهي نعود واقعية معاك الحگ مر فالوذنين يغير الا هو الخالگ منى تعرف عنك يسوا العدلت مالاهي يعطوهالك اهلها وخصوصا النينة بيهللي متمسكة بتقاليد وعادات قديمة منى ذا ماگالتولك يغير هو البيها تحاول توفى ذي لخبار وافطن اشيان عندها الين سمعت ذا عنك ولاكلمتك فيه يغير لاهي انگولك انا الحگ ، خليها عنك عيش حياتك وخرص لحد ثاني بيهللي منى مستحيل تشدها وتفراغ الوقت هي ماه من طافيلاته نبغيك تمحي رقمها وتخليها عنك تنساها وتنساك وكلكم يعوضه الله خير .... كزُّت ايدها اعل الززواية وتخطات عنو ماشة ... خلاتو واگف فم ... علمت منى بامردة امو واخبارو؟ يغير هو ماكان جاحدها الا ماگط ج موجبها ... وهو ماكان شاك عنها تگد توفه منو اعل سبة امردة ماعندو بيها علاقة حتى امو مظلومة فيها ... والا عادت ماه گابظتو بيها كيف گالت العزة وبيها الا اهلها ولاتبغي تعلقو بيها ،ماتوادعه؟ ماتصارحه؟ كان لاهي يتفهمها والل بعد يحاول ... ولعادت گاع تبغيه مايالة توفه منو ولاتستسلم بالعجلة ... ارجع مع وطياته ومثقّل هو ومتخلطين مشاعره ... مايعرف كانُ يتلفن لها يستفهم منها ،والل يعدل ذا الگالت لو العزة ... يغير ذاك اشكيف تعداله ؟ هو لحگت فيه حزة ماتله لفصال وراها بسيط ... يغير الين عادت هي خترت اگرب اطريگ ،ماغالبو هو يتوطى اعل كرامته وعزته لها ... ----------- دخلت لمينة الدار الساعة الثامنة ورا المغرب ... طرحها كابر وگالها لاهي يگبظ شي من عند حد من اصحابو وراجع ... دخلت جبرت لغنية معاها امرأة ثانية ماتعرفها ولاه من خالات ولا عمات كابر بيهللي جبرتهم فر وعادت تعرفهم وذيك امنادمة بعد وجهها ماعليه السكينة... فسخت انعايل وسلمت عليهم ... خرصت ذا هومه ما احذاهم اشراب گالت عن اثر لمرة مالها ياسر معاهم ... گاست البوتيك وگبظت حالة اشراب ناظرتها اعل سرفاية وطرحت حذاها كيسان ... وجابتولهم ودخلت هي فواحد من لبيوت ماتبغي تطلع احذاهم مع ان الدار لفوك فيها بيوت ماهم الا بيت ارگادها هي يغير خايفة من الچف يويلها... تمت فالبيت تخرمز تلفونها الين سمعت حس لغنية عيطت ب أسمها ... استغربت بيهللي ماگط سماتها والين تعود لاهي تتكلم معاها الا تفليشي بلكلام الماه مونك.. وگفت بعد شورها تعرف شدور ... لغنية مدت لها كاس اخلاط فيه اللبن وعصير ... گبظت لمينة منها ومستغربة من ذا اتعيديل الطاري ... گاست بيتها واتلات تشربو تفگدت كلام گط گالتولها امها ... " يمنتي انتي اتباني جاية لمرة ماتبغيك لعادت كاع ماه كارهتك لدرجة عنها ماتلفنت تخطبك وفالخطبة ماجات والعرس كامل كيفت ذاك ، معناها عنك حرولي تكسبي اخلاگها ولاتتگداي معاها فشي خاسر ولاتگبظي شي عاطيتولك ينتكل والل ينشرب والل يندار " طرحت لمينة الكاس ومشعرن جلها ... وگفت مع الكوة اللي كان مستكيرها طايح وكبت ذاك اللي فالكاس منها ... استغفرت وخاظت كاردة الكاس وطرحتولهم ... ورجعت لبلدها ... ------------ تفاااااعلو ولباگي اعليه انا 🥀🔥🔥🔥 #fooorrryyooouuuupppaaagggge #شعب_الصيني_ماله_حل😂😂 - @nahaa70