بتحكي قالت: كنت في عِلاقة مُحرمة فترة من الزَمن.. وتاني عرفت العواقِب والحاجات البتجي من وراها، واعتزلت العلاقات المحرمة.. لكن للأسَف! جاني فُقدان شغف ناحية الزواج والحُب حتى لو كان بالحلال وبقيت شايفة إنو ماف ولد بحب بجد ويعمل كل شيء عشان يصل لأبوك ويدق بابك وينالك حلالًا.. ودي واحدة من ضرر العلاقات المحرمة تفقد الثِقة وتتعرض للخذلان وطاقتك تنتهي! وعشان كده ربنا حرمها، حاشاه أن يفعل شيئًا سدًى! في يوم، كنت مع بنات جِيرانا.. وكان عندنا لَمة وكلنا صحبات يعني.. في البيت يلي كنا فِيه، واحدة اخوها ويلي هو ود جيرانا، ناداها.. واتأخَرت مسافة، لمَا رجعت قلنا ليها ايه اتأخرتِ كده؟! قالت أخوها جاء من الشُغل دوامه صباحي وناداها عشان تكوي ليه ملابس تانِية للدوام المسائي قبل الكهرباء تقطَع وقالت لينا مُتعب نفسه الأيام دي شديد، قال لينا في وحده بحبها وعاايزها بالحلال وحاليًا بجمع في قروش الخطوبة عشان يعزَها.. وما عايز يوريهم ليها، إلا ينتهي من تجهيزاته😂 وحرفيًا قالت لينا كلها متحمسن يعرفوها لأنو حسب كلامها هو زول راحات شديدة، والعملت فيه كده اكيد ما هينة😂❤️ وحتى نحنا اتحمسنا جدًا! وفي نص الونسة رجع بي الزمن، هل في واحد فعلا بجاهد عشان يصل للبحبها؟! حتى لو كان ما جاهِز! هل حا يجهز عشانها؟! سرَحت شوية لمن نبهوني البنات.. تاني قُلت فعلًا في ناس زي دِيل لكن قِلة ربنا يكتب لينا منهم!❤️ بعد شهَر، أبوي جاء وقال لي فُلان ابن فلان اتقدم ليك كأني كنتَ بسمع طشاش طشاش! ده مش أخوهَا؟! قلت لي ابوي عيِّد الاسم قام حمر لي وقال أها فلان ابن فُلان قلت ليه بفكِر، وجري على الغُرفة! لا دقيقة، يعني البت البجهز ليها أنا؟ كيف! لالا جد؟ دعوتي اتحققت؟ كان بجهز عشاني! ما لقيت نفسي إلا وإني بتوضأ وبصلي ركعتين وبشكر ربنا جدًا، حتى إني بتذكر بكيت قدرتي! سبحان الله الحمدلله ربنا لما بعطِي بدهش! وافقت وتمت الخِطبة وجات أمَه ولبستني، وفِرحوا بي جدًا وأخته قالت لي ما قادرة أصدِق، وكل دقيقتين بتسألنِي كنتِ عارفة صح؟ وأنا أحلف لكن هي ما مصدقة، تاني خليتها في صدمتها ساي😂❤️ اتعرفنا على بعض، وفي أول يوم من العِرس سألته: هل كنت بتتعَب دوام صباحي ومسائِي عشاني أنا؟ قال لي: عشان إنتِ تستاهلي فِعلًا والعايز يصل وعنده هدف بصل والما جاهز لما يحِب بعرف يجهز كيف وقد كان إنتِ كنتِ الهدف وأنا سعيت ووصِلت ليك❤️ #كلام_من_القلب #على_عتبة_النهاية #كسلا_بورتسودان_قضارف - @alsamra600