@cherok67: #koya بۆ ئەو کەسەی کە بوو بە گەورەترین برین و لە دووریشەوە حوکمی ڕۆحم دەکات... ئەمشەویش، لە کاتێکدا کە هەموو جیهان لە بێدەنگییەکی قووڵدا نوقم بووە، من لێرە پاڵم بە دیوارە ساردەکانی تەنیاییەوە داوە و بە دیار یادی تۆوە، پارچە بە پارچەی ناخم دەسوتێم. نازانم چەند شەو، چەند مانگ، یان چەند ساڵە کە من لەم دۆخەدام؛ تەنها ئەوە دەزانم کە لەو ڕۆژەی تۆ بەجێتهێشتم، ژیان لای من بەهای خۆی لەدەستدا و کات لەسەر کاتژمێری ڕۆیشتنی تۆ فۆرماتی گرت. دەمەوێت بۆ یەک دواجار، بەم نامە درێژ و پڕ لە حەسرەتە، ناخی خۆمت بۆ ڕووت بکەمەوە و پێتبڵێم کە من هێشتا لێرەم، لە هەمان ئەو شوێنەی کە تێیدا جێتهێشتم، بە دیار هەمان ئەو بەڵێنانەی کە داتن و شکانت، من هەر چاوەڕێتم... بەڵام ئازارەکە لێرەدا کۆتایی نایەت، کێشە گەورەکە ئەوەیە کە ئەم چاوەڕوانییەی من وەک خۆکوژییەکی هێواش وایە؛ چونکە من لە ناوەڕاستی تەمومژێکی وا کوشندەدا دەژیم، کە سەرەڕای هەموو شتێک، سەرەڕای ئەم بێدەنگییە درێژخایەنەت، لە ناخی ناخمەوە اصڵەن نازانم هیچ نیەتی هاتنەوەت هەیە یان نا.! ئەم ناڕوونییە، ئەم بێسەروشوێنییەت، لە هەر خەنجەرێکی تیژ زیاتر دڵم لەتومەت دەکات. ڕۆژانە هەزاران جار لە خۆم دەپرسم: ئایا بیرم دەکات؟ ئایا ئەویش وەک من شەوان بە دیار وێنەکانمانەوە دەگری؟ یان نا، ڕەنگە زۆر لەمێژ بێت منی لە یادەوەرییەکانیدا ناشتبێت و لە باوەشێکی تردا، لەژێر ناوێکی تردا، خەریکی چنینی ژیانێکی نوێ بێت؟ عەقڵم، دۆستەکانم، و تەنانەت لۆژیکی ژیانیش هاوارم بەسەردا دەکەن و پێم دەڵێن: "بەسە! خۆت سووک مەکە بە دیار عەشقێکەوە کە خاوەنەکەی پشتت تێکردووە"، پێم دەڵێن پیاو نابێت تەمەنی بە دیار سەرابێکەوە بەفیڕۆ بدات. بەڵام ئەم دڵە شێت و بریندارەی من، ئەم دڵە گەمژەیەم کە تەنها فێری وەفاداری بووە بۆ تۆ، هیچ یاسا و عەقڵێک ناناسێت. ئەو وەک منداڵێکی بێناز کە دایکی جێی هێشتبێت، کڕنووش بۆ یادگاری و شوێنپێکانت دەبات و ئامادە نییە دەرگاکە بە ڕووی کەسی تردا بکاتەوە. تەمەنم خەریکە لە دەست دەچێت و غەریبییەکت لە ناخمدا چەکەرەی کردووە کە تەندروستی و ڕۆحم دەخوات. سەیر بکە چۆنم لێهاتووە! هەر کاتێک لە کۆڵانەکەمان دەنگی پێیەک دێت، یان سێبەرێک لە پەنجەرەکەمەوە ڕەت دەبێت، دڵم لە سنگمدا باز دەدات و خەریکە بتەقێت، دەڵێم خودایە عاجز مەبە، کەرەم بکە و با ئەمە خۆی بێت کە گەڕاوەتەوە... بەڵام کاتێک دەبینم تەنها ڕێبوارێکی غەریبەیە، دنیا بەسەر سەرمدا دەڕوخێت و دەبێت دووبارە بە چاوی پڕ لە فرمێسکەوە، پارچەکانی دڵم لەسەر زەوییەکە کۆبکەمەوە و چاوەڕوانییەکی نوێ دەستپێبکەمەوە. مرۆڤ چۆن دەتوانێت هێندە دڵسۆزی چاوەڕوانییەک بێت کە کۆتاییەکەی تەنها داڕووخان و سوتانە؟ من لە جەنگێکی بەردەوامدام لەگەڵ تێپەڕبوونی کاتدا. ئەگەر ڕۆژێک لە ڕۆژان، ویژدانت بەخەبەر هات و بڕیارت دا بگەڕێیتەوە بۆ لای ئەم عەشقە شێواوە، بزانە کە لێرە مرۆڤێک هەیە تەمەنی خۆی بە ته‌واوی کردووەتە قوربانی تەنها چرکەیەک بینینەوەت و باوەشی وەک خۆی گەرم ماوەتەوە؛ بەڵام ئەگەر نیەتی هاتنەوەشت نییە و بەیەکجاری منت لە پەڕەی خەیاڵت سڕیوەتەوە، تەنها ئەمە بزانە: تۆ ڕۆشتیت و ژیانی خۆتت تاقیکردەوە، بەڵام چاوەڕوانییەکی بکوژ و برینێکی ئاواتت لە ناو سنگمدا جێهێشت، کە تا دواین هەناسەی ژیانم، وەک خوێنێکی سوور و گەرم لە دڵمەوە دەتکێت و قەت، قەت سارێژ نابێت. من لێرە دەمێنمەوە، بە دیار ئەم ئازارەوە، تەنانەت ئەگەر ئەم چاوەڕوانییە ببێتە هۆی کۆتایی تەمەنیشم و ببێتە دواین شت کە لەم دنیایەدا ئەزموونی دەکەم، چونکە ژیان بێ تۆ تەنها جەستەیەکی بێ ڕۆحە و مردنێکی خاوە کە بە دیار خەیاڵتەوە دەیکێشم. 💔

حــاجــی🎖️

Open In TikTok:

Region: IQ

Wednesday 01 July 2026 14:38:46 GMT