فرحتنا ما دامت.. وضحكة لولو اللي أشتريتها بفلوس تعبي، نباگت مني بأبشع طريقة. بيوم رجعت من المدرسة تعبان.. الجو چان مغيم خنگة وصوت الرعد يدگ بالگاع. طبيت للطارمة، وسمعت صوت بچي لولو عالي ومختنگ.. طيرت الجنطة من أيدي وركضت للمطبخ. شفت منظر شل گلبي شل.. مرت عمي لازمة لولو من شعرها، وبيدها الثانية السوار الأحمر اللي جبتة ألها. ::: (تصرخ وتجر بشعر لولو) ::: منين جبتي هذا السوار ولچ؟ تبوگين فلوسي من الجنطة وتصرفين من وراي يا تربية السزز؟ لولو چانت تفرفح وتبچي، وتأشر عليّ من شافتني بالباب. لولو : والله ما بگت.. ماما والله حَسن جابة الي، هو أشتراه بفلوسة! مرت عمي هدت لولو.. ودارت وجهها عليّ، عيونها چانت تطگ شرار. ::: هااا.. صار بيها حَسن! منين جبت الفلوس ياليتيم؟ تبوگ بيتي وتشتري لبتي حتى تسوي روحك شريف براسي؟ أنا : (تقدمت ووگفت گدام لولو أحاميها، وصوتي يرجف من القهر) أنا : ما بگتچ ولا مديت أيدي على فلس منچ! هاي فلوس حمالتي وتعبي بالسوگ، أشتريت بي لأختي شي بخاطرها، شحارگ دمچ أنتِ؟ ::: (رفعت أيدها وضربتني راشدي فر وجهي فر.. طنين صار بأذني، چانت أول مرة أحد يمد أيدة عليّ) ::: وتطول لسانك ببيتي بعد؟ بفلوس حمالتك مو؟ دنگت للكاع.. شمرت السوار الأحمر بكل قوتها، ودعست عليه برجلها حيل لحد ما طگطگن الخرزات وتكسرن.. لولو شهگت ووگعت عالگاع تلم بالخرز المكسور وتبچي بصوت يگطع النياط. عافتنا وركضت لغرفتي.. رحت وراها أشوف شتسوي. گامزت على فراشي، شالت الدوشگ مالتي ولگت الفلوس اللي ضامهن (تعبـي كلة . چانن تقريباً 15 ألف لميتهن ألف ألف). أخذتهن كلهن وحطتهن بجيبها. أنا : خالة رجعي فلوسي.. فدوة ذني ضامهن للكتب وللمدرسة والشتوية جاية! ::: (دفعتني حيل ليورة وطلعت) ::: هاي فلوس اللگمة اللي تاكلها ببيتي.. وفلوس الكهرباء والماي اللي تصرفهن، تحمد ربك مخليتك عايش ويانة وما ذابيتك بالشارع أچدي! وگفت بمكاني مصدوم.. خدي يحرگني من الراشدي، وگلبي يحرگني أكثر على كسرة لولو وعلى تعبي اللي راح گدام عيني وما گدرت أسوي شي. عمي چان طالع لشغلة وما يرجع لليل، وحتى لو رجع.. شراح أگلة؟ راح تصير مشكلة چبيرة وأخاف يطردوني وابتعد عن لولو. رجعت للمطبخ.. لگيت لولو گاعدة بالگاع، لامة الخرزات الحمر بحضنها ومغطية وجهها تبچي.. نزلت لمستواها، حضنتها حيل وگمت أبچي وياها.. أنا : كافي لولو.. كافي يابعد روحي، والله أشتريلچ عشرة غيرة بس تكبرين. ::: (تشهگ وتمسح بدموعها بظهر أيدها) ::: ماريد سوار.. أريد أموت وأروح يم أهلك، بيتنا يخنگ حَسن. بچينا ثنينا بذاك اليوم على حظنا.. وعلى السوار اللي تكسر، وعلى طفولتنا اللي نباگت غصب عنا. كبرت بهذا اليوم ودفنت أخر ذرة طفولة بگلبي، وحلفت يمين.. راح أصير رجال أكسر خشم الدنيا، وأطلع لولو من هذا البيت لو كلفني عمري. مرت السنين.. كبرت وصار عُمري 16 سنة، ولولو صارت بنية بعُمر 14.. كبرنا وكبرت ويانة همومنا بهالبيت. طولت وعرضت، صرت رجال أشتغل ورا المدرسة، وبيدي خشنة من التعب.. عودت نفسي أصير صلب مثل الحجر گدام الكل، بس گدامها.. أرجع هذاك حَسن اللي يرجف گلبه على أقل شي يخصها. چنت مفكر اللي بگلبي تجاهها هو خوف الأخ على أخته، أو يتيم يدور سند.. لحد ما أجة ذاك اليوم اللي گلبي فضحني بي! چنت گاعد العصرية على السطح، الجو بي برودة خفيفة وريحة مطر بالجو. گاعد أصلح بالراديو العتيـگ مال عمي ومركز بي. سمعت صوت خطواتها الناعمة عالدرج.. صعدت وبيدها صينية بيها أستكان چاي وقطعة كيك. ::: الله يساعدك حَسن.. جبتلك چاي أعرفك دايخ وراسك يوجعك. حطت الصينية گدامي.. وگعدت بصفي. الهوى طير خصلة من شعرها الأسود ونزلت على وجهها.. رفعت أيدها ترجع شعرها ورة أذنها.. وهنانا رفعت راسي وعيني وگعت على عيونها. چانت أول مرة أركز بيها هيج.. صفنت بوجهها، عيونها الوساع، رموشها الكثيفة، ولمعة برائتها. ماعرف شصارلي بذاك اللحظة! حسيت گلبي دگ دگة سريعة غريبة، فززت كلشي بية.. مو دگة الخوف من عمتي، ولا دگة القهر اللي متعود عليها.. دگة حارة خلت الدم يصعد لراسي وتخربط أنفاسي. ::: (باوعتلي بأستغراب وميلت راسها) ::: حَسن شبيك صفنت؟ بية شي بوجهي؟ تراب؟ فزيت من صفنتي.. دنگت راسي بسرعة للكاع وبلعت ريگي گوة، سحبت أستكان الچاي، وأيدي چانت ترجف رجفة خفيفة فظحتني. أنا : لا.. ماكو شي، بس دخت شوية من الشغل. ::: (تقربت مني أكثر، وحطت أيدها الناعمة على أيدي اللي لازمة الأستكان، چانت أيدها دافية) ::: اذا تعبان عوف الشغل حَسن.. لا تهلك روحك، أنتَ تتعب هواي، وأنا ماعندي غيرك بهالدنيا يخاف عليّ ويهتم بية. #fyp #foryou #fypシ゚ #pppppppppppppppp #viral - @.a..191