@uaqyt_tv: Түркістанда қызметтік міндетін атқарған полицей қаза тапты: министр көңіл айтты Түркістан қаласында болған қайғылы жол-көлік оқиғасы салдарынан патрульдік полиция батальонының аға инспекторы Бауыржан Қонысбеков қызметтік міндетін атқару кезінде қаза тапты. Әлеуметтік желіде тараған бейнежазбадан соқтығыстың өте қатты болғаны байқалады. Оқиға салдарынан екі қызметтік полиция көлігіне айтарлықтай зақым келген. Көліктердің бірінің алдыңғы бөлігі толықтай жарамсыз күйге түскен. Қазіргі уақытта жол апатының нақты мән-жайы анықталып жатыр. Осы қайғылы оқиғаға байланысты Ішкі істер министрі Сәденов Ержан Сапарбекұлы марқұмның отбасы мен жақындарына көңіл айтты. «Қызметтік міндеттерін атқару кезінде қаза тапқан Түркістан қаласы полиция басқармасы патрульдік полиция батальонының аға инспекторы полиция капитаны Бауыржан Қонысбековтың туған-туыстары мен жақындарына көңіл айтамын. Ішкі істер министрлігі марқұмның отбасына жан-жақты қолдау көрсетеді», – деді министр.