@cawabemedia_: Waziri wa Mambo ya Ndani ya Nchi, Patrobas Katambi, amekanusha madai ya kuvunja Katiba kufuatia agizo lake la kusitisha mikutano ya hadhara, akisema hatua hiyo ilizingatia misingi ya Katiba na sheria za nchi zinazohusu mikusanyiko na maandamano. Akizungumza na waandishi wa habari, Katambi ameeleza kuwa kwa mujibu wa sheria, waandaaji wa maandamano au mikutano ya hadhara wanapaswa kuwasilisha taarifa ya maandishi kwa Kamanda wa Polisi wa Wilaya husika angalau saa 48 kabla ya tukio, wakieleza mahali, muda na madhumuni ya mkusanyiko huo. Amesema Jeshi la Polisi lina mamlaka ya kusimamisha mkusanyiko endapo litabaini kuwa unaweza kuhatarisha usalama wa raia, amani au maslahi ya umma. Ufafanuzi huo unafuatia ukosoaji kutoka kwa baadhi ya wanasiasa, wanasheria na wanaharakati waliodai kuwa Waziri huyo alivunja Katiba baada ya agizo alilolitoa Bungeni jijini Dodoma la kumwagiza Mkuu wa Jeshi la Polisi, Camilius Wambura, kusitisha utoaji wa vibali vya mikutano ya hadhara. Katambi amesema agizo hilo lililenga kuimarisha usalama wa nchi na kuzuia vitendo vya uhalifu vinavyoweza kujitokeza, akieleza kuwa Serikali imebaini uwepo wa viashiria vya tishio la usalama vinavyohitaji tahadhari. Amesisitiza kuwa Serikali itaendelea kutekeleza wajibu wake wa kulinda usalama wa wananchi huku ikizingatia Katiba, sheria na maslahi mapana ya taifa.

cawabemedia

Open In TikTok:

Region: TZ

Thursday 02 July 2026 13:29:14 GMT