لمسة أيدها وحچايتها.. خلن گلبي يوگف. رفعت راسي وباوعتلها مرة ثانية، بس هالمرة نظرتي تغيرت، ما چنت أباوع لأختي الصغيرة اللي أحاميها من أمها.. چنت أباوع للبنية اللي أحتلت گلبي وسكنت بي غصب عني. أنا : (بصوت ناصي ومخنوگ، وعيني بعينها) أنا : وأنا ماعندي غيرچ يا لولو.. أنتِ دنيتي كُلها. سكتت لثواني.. عيونها التقت بعيوني، حست بشي غريب بنظرتي، أبتسمت ودنگت خجلانة، خدودها صارن حمر دم.. وگامت شالت روحها ونزلت جوة بسرعة بدون ما تحچي ولا كلمة. بقيت گاعد وحدي على السطح.. أباوع للغروب وأيدي على گلبي اللي ديطگ من مكانه. عصرت أصابعي حيل، الخوف أكل روحي.. عرفت أني وگعت بمصيبة چبيرة مالها حل.. أنا حبيت بنت عمي! حبيت البنية اللي أمها تتمنى تشرب من دمي وتكرهني عماها. هذا مو حب عادي.. هذا نار جديدة أنفتحت عليّ بهالبيت، وحرب أنكتبت أواجهها، بس هالمرة الحرب مو علمود لگمة ولا علمود فلوس.. الحرب علمود روحي اللي تعلقت بيها! مرت أيام على ذيچ الصفنة اللي على السطح.. صرت أستحي أباوع بعين لولو، گلبي يفضحني وأخاف أمها تلمح نظرتي وتگبب الدنيا علينا. چنت أتهرب منها بس عيني تراقبها من بعيد. بيوم چان يوم جُمعة.. البيت هدوء، ومرت عمي طالعة لبيت أهلها. چنت گاعد بالهول وعمي گاعد گدامي يسبح بسبحته ويسمع خطبة الجُمعة من التلفزيون. فجأة دار وجهة عليّ، باوعلي بنظرة كلها حنية وحسرة بنفس الوقت. ::: حَسن.. كبرت يابعد عمك، صرت رجال طول بعرض وشاربك خط.. والدنيا أخذتنا بتعبها ونسيت أعلمك على عمود دينك، الصلاة يا بوية هي اللي تسند ظهرك من الدنيا تميل بيك. أنا : (دنگت راسي بخجل) أنا : ماعرف أصلي عمو.. محد علمني. ::: (گام على حيلة ولزم أيدي) ::: گوم بوية توضى وخلي نصلي سوة.. الصلاة تبرد الگلب وتريح البال، وأنتَ گلبك شايل هموم أكبر من عُمرك. گمت توضيت مثل ما علمني.. فرشت السجادة بصفة وحطيت التُربة. چانت أول مرة أوگف بين أيدين رب العالمين بهالوعي.. من حطيت گصتي على التُربة، حسيت كُل هموم بيت عمتي، وتعب الشغل بالسوگ، ونار گلبي اللي شبت جديد.. كلها بردت وراحت. غطيت وجهي بيدي ودعيت بگلبي دعوة وحدة (يا ربي، أحفظها الي، ولا تحرمني من شوفتها). خلصنا صلاة.. عمي باس راسي، لبس وطلع للديوانية يشوف أصدقائه. بقيت گاعد على السجادة ومسند ظهري على الحايط.. حسيت بحركة خفيفة بالباب. رفعت راسي.. لولو واگفة بالباب، لابسة چادر صلاة أبيض بي ورد ناعم، وشعرها طالع شوية من گدام.. چانت طالعة مثل الملاك اللي نزل من السمة بس الي. ::: تقبل الله حَسن.. أنا : منا ومنچ يا لولو. أجت تمشي على كيف، وگعدت بصفي على طرف السجادة.. مدت أيدها وطلعت من جيب الچادر سُبحة خضرة صغيرة، خرزاتها تلمع. ::: هاي السُبحة ضامتها ألك من زمان.. من رحت وية بيبي للزيارة أشتريتها وعجبتني، بس أستحيت أنطيكياها گدام ماما.. سبح بيها حتى كُل ما تلزمها تتذكرني وتدعيلي. لزمت السُبحة من أيدها.. چانت باردة بس حرگت گلبي من الفرحة، حطيتها بين كفوفي وعيني ما نزلت من عيونها. أنا : (أبتسمت وصوتي بي رجفة خفيفة) أنا : أدعيلچ بدون سُبحة.. أنتِ كُل دعائي يا لولو، ماكو سجدة أسجدها أذا ما أسمچ بيها. ::: (دنگت راسها وخدودها صارن حمر، أبتسمت بخجل ولعبت بطرف الچادر) ::: وأنا هم دعيتلك اليوم.. دعيت الله يوفقك وتصير أحسن واحد بالدنيا، حتى من أكبر.. أفتخر بيك وأگول للكل هذا حَسن أخوي وسندي. كلمة (أخوي) زرفت گلبي، بس بنفس الوقت كلامها خلاني أطير لسابع سماء.. حسيت نفسي ملكت الدنيا كُلها بهاللحظة. كلمات بسيطة منها خلتني أنسى كُل قساوة أمها وكل تعب السنين. گامت على حيلها تريد تطلع.. وگفت بالباب والتفتت عليّ. ::: حَسن.. الصلاة كُلش لايگتلك، طالع تجنن وأنتَ تصلي. عافتني وراحت ترگض غرفتها.. وأنا بقيت گاعد بمكاني، لازم السُبحة الخضرة حيل على صدري وأضحك بصوت ناصي مثل المخبل . بذاك اليوم، حلفت أهديلها عُمري كُلة بس حتى أشوف هالضحكة مرسومة على وجهها. #fyp #foryou #fypシ゚ #pppppppppppppppp #viral - @.a..191