Ғам-ташвиш, сиқилишдан қутулиш ва истиғфор дуоси. Эй ғамга ботган, эй ташвиш чеккан, эй қарздор бўлган инсон! Эй дардга чалинган, эй қийинчиликка учраган! Эй дили сиқилган, эй бошига оғир кун тушган! Эй бало ва фитналар ичида қолган, хуллас, бошидан торлик ва мушкуллик ўтаётган ҳар бир инсон! Бунинг ечими битта! Мен сизга «буни синаб кўринг-чи, нима бўларкин» демайман, балки «буни албатта бажаринг ва Аллоҳдан сизни хурсанд қиладиган натижани кўринг!» дейман. Ҳа, Аллоҳдан сизни шод этадиган нарсаларни кўрасиз. «Хўш, у нима экан?» деб сўрасангиз, у — истиғфорни кўпайтиришдир! «Астағфируллоҳаллазий лаа илаҳа илла ҳув» (Ўзидан ўзга илоҳ бўлмаган Аллоҳдан мағфират сўрайман). Ҳаммамиз биргаликда айтайлик: «Астағфируллоҳаллазий лаа илаҳа илла ҳув», «Астағфируллоҳаллазий лаа илаҳа илла ҳув», «Астағфируллоҳ». Бу калимани ҳамда **«Лаа илаҳа иллаллоҳ»**ни тилингиздан қўйманг — эртаю кеч, кундузию оқшом, юрганингизда ҳам, уловда кетаётганда ҳам, ёнбошлаб ётганда ҳам доим айтиб юринг. Зеро, Аллоҳ таоло Қуръонда шундай марҳамат қилади: «Улар Аллоҳни турган, ўтирган ва ёнбошлаган ҳолларида зикр қиладилар...» (Оли Имрон сураси, 191-оят). Шундай экан, Аллоҳдан гўзал хушхабарлар ва яхшиликларни кутаверинг! - @ramazonifori1