@omeralsodee: النجاح في النهاية ما قصة قروش ساي، ولا شهادة معلقة في الحيطة، ولا صورة تنزلها والناس تقول ليك “مبروك يا دكتور”. النجاح الحقيقي مرات بيكون إنك تقوم الصباح وإنت لسه عندك رغبة تحاول، رغم التعب، رغم الخسارات، ورغم الإحساس إنو الدنيا مرات ماشّة ضدك. في السودان، الناس اتعودت تشوف النجاح بصورة معينة: وظيفة محترمة، عربية، سفر، أو اسم معروف. لكن الحياة علمتنا إنو في ناس ناجحين شديد وهم لسه بيكافحوا كل يوم عشان يكملوا الطريق. لأنو النجاح ما محطة، النجاح قدرة الزول على الاستمرار بدون ما يفقد نفسو. أحيانًا بتلقى زول قاعد في وردية طويلة، مرهق، وما عندو رفاهية الأحلام الكبيرة، لكنو لسه بعالج الناس بأمانة… دا ناجح. وتلقى أم بتتحمل البيت والظروف والحرب والغلاء ولسه تضحك لأولادها… دي ناجحة. وتلقى طالب سقط مرة واتنين لكن رجع وقف تاني… دا فهم النجاح أكتر من ناس كتار. المشكلة إنو أغلبنا بربط قيمتو بالنتائج. لو نجحنا نفرح، ولو فشلنا نحس إننا ما بنسوى. لكن الحقيقة إنو الإنسان أكبر من نتيجة امتحان، وأعمق من رقم في كشف، وأغلى من رأي الناس فيهو. النجاح مرات يكون في الحاجات الصغيرة البنعملها وما منتبهين ليها: إنك ما تستسلم.❤ إنك تحافظ على أخلاقك في زمن صعب❤. اللهم إني اسالك النجاح والتوفيق ف هذا الطريق.❤

Ømër. Àłśøüdę

Open In TikTok:

Region: SD

Friday 03 July 2026 14:05:54 GMT