مرت أيام وأنا أحاول ألملم روحي وأبتعد.. أطلع من الصبح ما أرجع ألا بالليل، بس حتى لا ألمحها ولا أشوف ضحكتها اللي صارت لغيري. چنت أظن أني شفت أسوء شي بحياتي من شفت نظرتها لـ كرار، بس ما چنت أدري أنو المكتوب راح يكسر ظهري ويحرك البيت بكبره! بيوم چنت راجع من الشغل الظهر.. الشمس تسمط والشارع فارغ. وصلت لـباب بيتنا، وبمجرد ما حطيت أيدي على الباب.. سمعت صريخ يرج الكاع رج.. صريخ يبزع الروح ويگطع النياط! طيرت الباب ودخلت أركض.. طبيت للهول، وتجمد الدم بعروگي من المنظر. لولو.. لولو اللي چنت أخاف عليها من الهوى الطاير، چانت مشمورة بالگاع، ملابسها مشگگة، وشعرها مكفوش، ومرت عمي فوگ راسها لازمة (صوندة) وتضرب بيها بكل قوتها بدون رحمة! ::: (تصرخ وتضرب بيها وتلطم على وجهها) ::: ولچ يا سواد وجهي! يا فضيحتي وعاري گدام العالم! أبن أختي يسوي بيچ هيج؟ أنتِ رخصتي روحچ يالفاجـ..رة! أنتِ خليتي يتقربلچ! لولو چانت تفرفح بالگاع، تتلوى من الوجع، وتغطي وجهها بيديها اللي ترجف.. لولو : (بصوت مبحوح ومگطع من البچي) لولو : ماما فدوة عوفيني.. والله چذب.. والله العظيم غصب عني.. سد حلگي ماما.. ضحك عليّ وكسرني.. ماما فدوة راح أموت! ::: (تجرها من شعرها حيل وتدفرها برجلها) ::: وتگولين غصب؟ كرار خابرني يگول هي ذبت روحها عليّ بغرفتها! تتبلين على أبن أختي يا صخام وجهي؟ شلون أباوع بوجه ابـوچ هسه؟ موتچ على أيدي اليوم! الكلمات دگن براسي مثل الطلقات.. (غصب عني.. كسرني.. كرار).. استوعبت الصار.. الكارثة اللي وگعت على راس البنية البريئة.. النذل أستغل برائتها، أستغل غياب أمها وتقربلها وأغتـ..صبها، وبدل ما أمها توگف وياها.. دتقتلها وتصدگ أبن أختها الكلب! ما حسيت على روحي شلون ركضت.. دفعت مرت عمي دفعة بكل طاقتي، طارت ليغاد ووگعت على ظهرها.. وگعت على ركبي بالكاع گدام لولو.. رفعت راسها لحضني، چانت تنزف من شفتها، وعيونها اللي چانت تلمع صارت عبارة عن رعب وكسرة ما تنجبر. أنا : (صوتي يرجف ودموعي تنزل لا أرادياً) أنا : لولو.. لولو ياروح أخوچ.. باوعيلي شبيچ؟ فتحَت عيونها گوة.. من شافتني، چلبت بياختي حيل مثل الغريگ اللي لزم خشبة.. وبچت بچية شگت صدري شگ. لولو : حَسن.. حَسن أذاني.. والله أذاني.. گلي أحبچ وأريد أخطبچ.. بس أجة للبيت وماكو أحد.. سد حلگي حَسن ومگدرت أدفعة.. كسرني وأخذ شرفي وعافني، وماما تگلي أنتِ ردتي! حَسن أريد أموت.. فدوة أكتلني وخلصني! گمت أرجف.. كل خلية بجسمي گامت تنفض، عروگ رگبتي أحسها راح تطگ.. باوعت لمرت عمي اللي گامت وتگوم تسب وتغلط، عفتها تحچي ونزلت راسي بست گصة لولو.. أنا : (بصوت هادئ بس بي موت) أنا : أنتِ أنظف منهم كُلهم يا لولو.. وغلاتچ عندي، حقچ يرجع لو أطبگ السما على الكاع. شلتها بين أيدية بهدوء، چانت خفيفة چنها ريشة مكسورة.. صعدتها لغرفتها، غطيتها بالبطانية، ومسحت الدم عن وجهها. طلعت من الغرفة وقفلت الباب عليها حتى لا توصلها أمها. نزلت للهول.. مرت عمي واگفة تباوعلي بخزرة. ::: شبيك مسويلها روحك بطل؟ وخر من طريقي خلي أغسل عاري بيدي قبل لا يجي عمك ويذبحنا كلنا! مجاوبتها ولا بحرف.. رحت گبل للمطبخ.. فتحت المجر، سحبت أكبر سچينة بي، لمعتها گدام عيني، وطلعت للشارع.. طلعت للشارع، الشمس تضرب براسي بس ما أحس بحرارتها.. حرارة دمي چانت أقوى. السچينة بيدي ضاغط عليها بكل حيل، عيوني ما تشوف غير لون الدم، وصوت صريخ لولو يتردد بأذني. أمشي بخطوات سريعة، أريد أوصل لبيت خالتها، أطلعة من غرفتة وأذبحـ..ـة بالشارع وأشرب من دمة. فجأة.. طلعتلي من لفة الفرع، وگفت گدامي وسدت طريقي. چانت (شاة زنان). ::: على وين يالسبع؟ عيونك تجـدح نار وبيدك سچينة.. ناوي تعدم روحك؟ أنا : (دفعتها من چتفها حيل وصحت بيها) أنا : وخري من دربي شاة زنان! لا تتدخلين بشي ما يخصچ، اليوم أشرب من دم كلب نكس وأغسل عار. ::: (ما وخرت، لزمت أيدي اللي بيها السچينة حيل، وباوعت بعيوني بنظرة قوية وثابتة) ::: تغسل عار؟ تذبحة وتنسجن وتصير بطل مو؟ والمسكينة اللي حابسة روحها فوگ منو يحاميها؟ تعوفها لأمها تنهش بلحمها؟ لو تعوفها لعمك يذبحها حتى يسد حلگ الوادم؟ كلامها ضربني مثل راشدي صحاني من غيبوبتي. وگفت بمكاني، أيدي بدت ترجف، والسچينة وگعت من أيدي للكاع بصوت رن بالشارع الفارغ. أنا : (حطيت أيدية على راسي وصرخت بصوت مخنوگ) أنا : لعد شسوووووي؟ أگعد وأتفرج عليه كسرها ودمر حياتها؟ شسوووي گليلي؟ نار بگلبي راح تحرگني! #fyp #foryou #fypシ゚ #pppppppppppppppp #viral - @.a..191